جۇمباق جاعدايدا قايتىس بولعان بالانىڭ تۋىستارى قۇزىرلى ورگاننان ءمان-جايدى تەزىرەك انىقتاۋدى سۇرايدى، دەپ حابارلايدى اlmaty-akshamy.kz ينفورمبيۋرو اقپاراتتىق باعدارلاماسىنا سىلتەمە جاساپ.
جەتىنشى قاباتتان پاتەر جالداپ، تەرەزەدەن سەكىرىپ كەتكەن اسىلجان ابدۋللايەۆ اقتوبەدەگى اۆياسيا ۋچيليششەسىنىڭ كۋرسانتى. قىسقى دەمالىسقا ۇيىنە كەلگەن بوزبالانى اكەسى الماتىعا جول ءجۇرۋ ءۇشىن تاكسيگە مىنگىزىپ جىبەرگەنىن ايتادى. ونىڭ تالدىقورعاندا سۋيسيد جاساعانىن ەستىگەندە توبەلەرىنەن جاي تۇسكەندەي كۇي كەشكەن. مارقۇمنىڭ اتا-اناسى بالاسىن ولىمگە بازبىرەۋلەر يتەرمەلەۋى مۇمكىن ەكەنىن ايتتى.
"ءوزىنىڭ ءومىرىن قيمايدى عوي ەندى. تاكسيدەن تۇسە سالا 3 ساعاتقا پاتەر جالداعان. كىنالى ادام بار. سول ادام تابىلسا دەيمىن"، – دەدى مارقۇمنىڭ اكەسى اسحات مىڭجاساروۆ.
كوز جۇمعان كۋرسانتتىڭ اناسى ۇلىنىڭ مىنەزى جاقسى بولعانىن ايتتى.
"كىشكەنتايىنان ءتاپ-تاتتى، ەرەكشە بالا بولدى. وزىمە قاتتى جاقىن بولدى. اكەسى دە، مەن دە ەرەكشە جاقسى كوردىم. مىنەزى وتە جاقسى. سىنىبىمەن دە، ءوز ورتاسىمەن دە جاقسى ارالاستى. جايناپ تۇرعان بالا ەدى. ۇيدەن شىققاندا دا كوڭىل-كۇيى جاقسى بولدى"، – دەدى انارگۇل مىڭجاساروۆا.
قايعىلى وقيعاعا قاتىستى تەرگەۋ باستاعان پوليسيا جاس جىگىتتىڭ مۇنداي سۇمدىق قادامعا نە ءۇشىن بارعانىن انىقتاۋعا كىرىستى.
"پوليسەيلەر ءوزىن-وزى ولتىرۋگە جەتكىزۋ فاكتىسى بويىنشا سوتقا دەيىنگى تەرگەپ-تەكسەرۋدى باستادى. قاجەتتى ساراپتامالار تاعايىندالىپ، تەرگەۋ ارەكەتتەرى جۇرگىزىلۋدە"، – دەدى جەتىسۋ وبلىستىق پوليسيا دەپارتامەنتىنىڭ رەسمي وكىلى مەرۋەرت مورياكوۆا.