جاستار ساياساتىنىڭ تۇجىرىمداماسى بەكىتىلدى

ول 2023-2027 جىلدارعا ارنالعان.

تۇجىرىمداما 6 ءبولىم جانە 7 تاراۋدان تۇرادى. وندا قازىرگى جاستار اراسىنداعى وزەكتى ماسەلەلەر، ولارعا الەۋمەتتىك جەلىلەردىڭ اسەرى، وسكەلەڭ ۇرپاقتىڭ دەنساۋلىعى مەن جاستارعا پاتريوتتىق تاربيە بەرۋ باعىتىنداعى تالداۋلار مەن ۇسىنىستار قامتىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«جاستار ساياساتىنىڭ تۇجىرىمداماسى ەگەمەندى قازاقستاننىڭ جاڭا سىن-قاتەرلەرى تۇرعىسىنان جاستاردىڭ ءوزىن-وزى دامىتۋعا قولايلى جاعداي جاساۋعا باعىتتالعان پروسەستەردى قامتيدى. سونداي-اق جاستاردى قوعامعا الەۋمەتتىك جانە ەكونوميكالىق تۇرعىدان ينتەگراسيالاۋ سالاسىنداعى نەگىزگى مىندەتتەر مەن باسىمدىقتاردى ايقىندايدى. قازاقستاننىڭ ۇلتتىق ەكونوميكاسىنىڭ حالىقارالىق ارەناداعى باسەكەگە قابىلەتتىلىگى ءىس جۇزىندە ادامي كاپيتال تۇرعىسىنان رەسپۋبليكانىڭ بولاشاعىنا سالىنعان ستراتەگيالىق ينۆەستيسيالار بولىپ ەسەپتەلەتىن جاستاردىڭ دامۋ جاعدايىنا تىكەلەي بايلانىستى»، - دەلىنگەن قۇجاتتا.

اقپارات جانە قوعامدىق دامۋ مينيسترلىگىنىڭ اقپاراتىنا قاراعاندا، تۇجىرىمداماداعى جوسپارلاردى كەزەڭ-كەزەڭىمەن ورىنداۋ ساپالى جاستار ساياساتىن قالىپتاستىرۋعا مۇمكىندىك بەرەدى.

«تۇجىرىمداما جاستار ساياساتى سالاسىنداعى ءىس-قيمىلداردىڭ ءبىرىڭعاي الگوريتمىن قۇرۋعا، قۇقىقتىق الاڭدا بەكىتىلگەن جاستار الەۋەتىن ىسكە اسىرۋدى ىنتالاندىرۋ تەتىكتەرى مەن قۇرالدارىن قايتا قاراۋعا جانە وزەكتەندىرۋگە مۇمكىندىك بەرەدى»، - دەپ تۇسىندىرمە بەرىلگەن تۇجىرىمداعا.

ۆەدومستۆو بولجامىنشا، تۇجىرىمدامانى ىسكە اسىرۋ ناتيجەسىندە 2027 جىلعا قاراي كاسىپكەرلىكتى دامىتۋ جوبالارىنا قاتىساتىن جاستاردىڭ ۇلەسى 10% دەيىن ارتپاق. بۇعان قوسا، NEET ساناتىنداعى جاستاردىڭ سانىن 5،8% دەيىن تومەندەتۋ جوسپارلانعان.