«پەرزەنت» بالالار ۇيىندە ورىن العان توتەنشە جاعدايدان كەيىن «AMANAT» پارتياسى الماتى قالالىق فيليالىنىڭ «جاستار رۋحى» جاستار قاناتى العاشقى كۇننەن باستاپ بالالارعا قولداۋ كورسەتۋ جۇمىستارىنا كىرىستى. وقيعا سالدارىنان عيماراتتىڭ ءبىرقاتار بولمەلەرى جارامسىز كۇيگە ءتۇسىپ، مەكەمەگە شۇعىل تازالاۋ جانە قالپىنا كەلتىرۋ شارالارى قاجەت بولدى.
ءۇش كۇن ىشىندە ۇيىم ەرىكتىلەرى اۋماقتى تازالاۋ، بۇلىنگەن بولمەلەردى قالپىنا كەلتىرۋ، بالالارعا جاڭا جاتىن ورىندارىن دايىنداۋ جانە كۇندەلىكتى قاجەتتى زاتتاردى قامتاماسىز ەتۋ باعىتىندا اۋقىمدى جۇمىس اتقاردى.
وسى كەزەڭدە 150-دەن استام ەرىكتى ءوز ەركىمەن كەلىپ، بالالاردىڭ جاعدايىن جاقسارتۋعا ۇلەس قوستى. ولار ورتتەن زارداپ شەككەن اۋماقتى تازالاپ، جارامسىز زاتتاردى شىعارىپ، بولمەلەردى رەتكە كەلتىرىپ، بالالاردىڭ ءقاۋىپسىز ءارى جايلى ورتادا بولۋىنا جاعداي جاساۋعا كۇش سالدى.
«AMANAT» پارتياسى الماتى قالالىق فيليالى «جاستار رۋحى» جاستار قاناتىنىڭ ءتوراعاسى دىلدابەك ديداربەك جۇماعالي ۇلى رەسمي پىكىرىندە بىلاي دەدى:
«بۇل وقيعا ءبارىمىزدىڭ جۇرەگىمىزگە اۋىر ءتيدى. وسىنداي قيىن ساتتە جاستاردىڭ بىرلىگى، جاناشىرلىعى جانە جاۋاپكەرشىلىگى ەرەكشە كورىندى. “پەرزەنت” بالالار ۇيىندەگى بالالار – ءبىزدىڭ ءوز باۋىرلارىمىز. ولاردىڭ قاۋىپسىزدىگى مەن جايلىلىعى ءۇشىن قولدان كەلگەن كومەكتى كورسەتۋ – ورتاق مىندەتىمىز. جاستار تاعى دا حالىقپەن بىرگە ەكەنىن دالەلدەدى».
«جاستار رۋحى» الداعى ۋاقىتتا دا قاجەتتىلىك تۋىنداعان جاعدايدا كومەك جۇمىستارىن جالعاستىرىپ، بالالار ءۇيىنىڭ قالىپتى جاعدايعا كەلۋىنە قولداۋ كورسەتۋدى جوسپارلاپ وتىر.