الماتى جاستارى الداعى رەفەرەندۋمدى پىكىرسايىس ارقىلى تالقىلادى.
«تۇران» ۋنيۆەرسيتەتىندە كونستيتۋسياعا ەنگىزىلەتىن تۇزەتۋلەرگە بايلانىستى ازاماتتاردىڭ ءومىرىنىڭ وزگەرۋىن ءتۇسىندىرۋ ماسەلەلەرىنە ارنالعان «كونستيتۋسيا بويىنشا ازاماتتاردىڭ ءومىرى» تاقىرىبىندا پىكىرسايىس ءوتتى. پىكىرتالاس جوو قابىرعاسىندا وفلاين جانە ونلاين فورماتتا بولدى.
"ۋنيۆەرسيتەتىمىزدىڭ بەلسەندى جاستارى ءوز باستاماسىمەن رەفەرەندۋمدى تالقىلاۋ ءۇشىن پىكىرسايىس وتكىزۋدە. نەگىزگى تاقىرىپ – «كونستيتۋسيا بويىنشا ازاماتتاردىڭ ءومىرى». پىكىرتالاس لد (لينكولن-دۋگلاس) فورماتىندا ءوتتى. ياعني ستۋدەنتتەرىمىز بىر-بىردەن ەكى تاراپقا ءبولىنىپ، رەفەرەندۋمنان كەيىن قازاقستان ازاماتتارى ومىرلەرىنىڭ وزگەرەتىنى تۋرالى ويلارىمەن ءبولىستى"، – دەدى جاستار ءىسى جونىندەگى كوميتەت باسشىسى مانسۇر ءالىموۆ.
پىكىرسايىستان كەيىن ايتىلعان ويلار «دوڭگەلەك ۇستەل» باسىندا تالقىلاندى. جالپى، شاراعا جوو-نىڭ ەڭ بەلسەندى ستۋدەنتتەرى مەن ىشكى ۇيىمداردىڭ باسشىلارى قاتىستى.
"رەفەرەندۋم – بۇل جاڭا ومىرگە قادام. بۇگىنگى «دوڭگەلەك ۇستەل» مەن پىكىرتالاس بارىسىندا ستۋدەنتتەرىمىز وسىنداي ويعا كەلدى. سونداي-اق، 5 ماۋسىم كۇنى ءبارىنىڭ داۋىس بەرىپ، بۇل ماڭىزدى مەملەكەتتىك باستامانى قولدايتىندارىن ايتتى"، – دەدى مانسۇر ءالىموۆ.