الماتىلىق كارديولوگتار جاساندى ينتەللەكت كومەگىمەن جۇرەكتىڭ ۋلترادىبىستىق زەرتتەۋىن جۇرگىزۋدى مەڭگەردى
الماتى قالالىق كارديولوگيا ورتالىعىندا وزىق دياگنوستيكا جانە ەمدەۋ ادىستەرىنىڭ نەگىزدەرى شەڭبەرىندە «POCUS تۇجىرىمداماسى: كلينيكالىق تاجىريبەدە قولدانۋ جانە ءموبيلدى ۋلترادىبىستىق دياگنوستيكادا جاساندى ينتەللەكتى قولدانۋدىڭ ارتىقشىلىعى» تاقىرىبىندا شەبەرلىك سىنىبى ءوتتى.
ءىس-شاراعا ارنايى شاقىرىلعان شەتەلدىك دارىگەر Hatem Soliman Aboumarie (Royal Brompton and Harefield Hospitals، London، UK) قاتىستى.
جىل وتكەن سايىن جاساندى ينتەللەكت ءومىردىڭ ءار ءتۇرلى سالاسىنىڭ اجىراماس بولىگىنە اينالىپ كەلەدى. مەديسينا سالاسى دا شەتتە قالعان جوق.
POCUS (Point-of-Care Ultrasound) تۇجىرىمداماسى دارىگەرلەر ناۋقاستى تەكسەرۋ كەزىندە-اق، قوسىمشا ۋلترادىبىستىق دياگنوستيكالىق پروسەدۋراعا جولداماسىز، وزدەرى ۋلترادىبىستىق زەرتتەۋ جۇرگىزەتىن ءتاسىلدى بىلدىرەدى. مۇنداي ءتاسىل ەمدەلۋشىنىڭ جاعدايىن ىڭعايلى جانە جىلدام باعالاۋعا مۇمكىندىك بەرەدى. دەمەك دياگنوستيكا ۋاقىتى قىسقارتىلىپ، دەرەۋ ەمدەۋدى باستاۋ مۇمكىن بولادى.
"بۇل تۇجىرىمدامانى كلينيكالىق تاجىريبەدە قولدانۋ ءبىرقاتار ايقىن ارتىقشىلىققا يە. بىرىنشىدەن، ول جوعارى ساپالى دياگنوستيكانىڭ قولجەتىمدىلىگىن جاقسارتادى ءارى مەديسينالىق قاتە ىقتيمالدىعىن ازايتادى. دارىگەرلەر پالاتادا، جەدەل جاردەمدە نە شۇعىل كومەك كورسەتۋ بولىمدەرىندە ناۋقاسقا ۋلترادىبىستىق زەرتتەۋدى بىردەن تەز ءارى ءتيىمدى تۇردە جۇرگىزىپ، ناۋقاس ءومىرىن ساقتاپ قالا الادى"، - دەيدى قالالىق كارديولوگيالىق ورتالىق ديرەكتورى روزا قۋانىشبەكوۆا.
سونىمەن قاتار، ءموبيلدى ۋلترادىبىستىق دياگنوستيكادا جاساندى ينتەللەكتى پايدالانۋدىڭ ارتىقشىلىعى ۋلترادىبىستىق زەرتتەۋ ارقىلى جينالعان ۇلكەن كولەمدەگى دەرەكتى وڭدەۋ جانە تالداۋ كونتەكستىندە ايقىن بولادى. ماشينالىق وقىتۋ جانە جاساندى ينتەللەكت الگوريتمدەرى الىنعان كەسكىندەردى تالداۋدى اۆتوماتتاندىرۋ، ناتيجەلەردى ينتەرپرەتاسيالاۋ پروسەسىن جەڭىلدەتۋ جانە دياگنوستيكالىق دالدىكتى ارتتىرۋعا مۇمكىندىك بەرەدى.
جاساندى ينتەللەكتى پايدالانۋ ۋلترادىبىستىق دياگنوستيكانى ءار ءتۇرلى ءموبيلدى قۇرىلعىلار مەن قوسىمشالارعا بىرىكتىرۋدى جەڭىلدەتەدى.
«ياعني، دياگنوستيكالىق جانە ەمدەۋ پروسەسىنە قاتىسۋشىلار - باسقا ماماندىق دارىگەرلەرى، ماسەلەن، ەمدەۋشى دارىگەر، نە مەدبيكەلەر - ۋلترادىبىستىق زەرتتەۋدى پايدالانا الادى جانە جۇرگىزە الادى. مۇنداي سەزبەكتەر قۇرىلعىنىڭ شاعىن ولشەمى مەن سالماعىنا بايلانىستى توتەنشە جاعداي مەديسيناسىندا كەڭىنەن قولدانىلادى. ۆيزۋالدى اقپاراتتى سمارتفونعا سىمسىز تاسىمالداۋدى پايدالانۋ، ستاندارتتى ۋلترادىبىستىق اپپاراتقا قاراعاندا تومەن قۇنى ولاردى توتەنشە جاعدايدا، سونىڭ ىشىندە تابيعي جانە تەحنوگەندىك اپات كەزىندە پايدالانۋدى جەڭىلدەتەدى. ءوز كەزەگىندە ءبىز جاقىن ارادا بۇل تاجىريبەنى ءبىزدىڭ ورتالىقتا ەنگىزۋدى جوسپارلاپ وتىرمىز»، - دەيدى روزا قۋانىشبەكوۆا.
وسىلايشا، POCUS تۇجىرىمداماسى ءموبيلدى ۋلترادىبىستىق دياگنوستيكادا جاساندى ينتەللەكتى قولدانۋمەن بىرگە ناۋقاستىڭ جاعدايىن تەز، ءدال جانە قولجەتىمدى دياگنوستيكالاۋعا مۇمكىندىك بەرەدى، بۇل سايىپ كەلگەندە ەمدەۋ ناتيجەسىن جاقسارتۋعا جانە مەديسينالىق كومەك الۋ ۋاقىتىن قىسقارتۋعا سەپتىگىن تيگىزەدى.
جاساندى ينتەللەكتىڭ ارقاسىندا اۋرۋدى دالىرەك انىقتاۋعا، ونىڭ كەزەڭى مەن دامۋىن بىلۋگە بولادى.
شارا بارىسىندا ءپورتاتيۆتى ۋلترادىبىستىق دياگنوستيكالىق جۇيەنى قولدانۋ ارقىلى ءار ءتۇرلى جۇرەك پاتولوگياسى بار ناۋقاستار بويىنشا ءدارىس وقىلىپ، زەرتتەۋلەر جۇرگىزىلدى.
شەبەرلىك ساباعى قاتىسۋشىلاردىڭ كاسىبي ءبىلىمىن تولىقتىرىپ قانا قويماي، قالانىڭ مەديسينا سالاسىنىڭ دامۋىنا زور ۇلەس قوستى.