بۇگىندە عالىمدار عىلىمي-زەرتتەۋ جانە كوممەرسيالىق ماقساتتا جاساندى ينتەللەكتتى دامىتۋ مەن ەنگىزۋدە مول جەتىستىكتەرگە جەتتى.
اكۋستيكالىق تالداۋدىڭ كومەگىمەن جاساندى ينتەللەكت پاركينسون اۋرۋىن، پسيحيكالىق بۇزىلىستاردى، ءتىپتى كەيبىر جۇرەك قان-تامىرى سياقتى ءبىرقاتار نيەۆرولوگيالىق دەرتتەردىڭ دە دامۋ ىقتيمالدىعىن داۋىسپەن-اق انىقتاي الادى، دەپ حابارلايدى Almaty-akshamy.kz «حابار 24» سايتىنا سىلتەمە جاساپ.
ءداستۇرلى ەمەس بەينە ساۋندترەكتەرىن جاساندى ينتەللەكت ارقىلى اۆتوماتتى تۇردە اۋدارۋدىڭ جاڭا ءادىسىن الەم كومپانيالارى اينالىمعا دەندەپ ەنگىزە باستادى. وسى سالادا قىزمەت كورسەتىپ كەلە جاتقان ۋكراينالىق فاۋندەرلەردىڭ كومەگىمەن قۇرالعان شۆەيساريالىق كومپانيا ەندى قىزمەتىن قازاق تىلىندە دە ۇسىناتىن بولدى.
«بۇل جاساندى ينتەللەكت ارقىلى كەز كەلگەن بەينەنى 67 تىلگە جانە 60 ديالەكتىگە اۋدارۋعا مۇمكىندىك جاسالعان. جاقسى جاڭالىقتىڭ ءبىرى سول – ەندى ماتەريالدى قازاق تىلىنەن دە، قازاق تىلىنە دە اۋدارۋعا بولادى. ءبىز ءىرى كومپانيامىز جانە جەكە تۇلعالارمەن جۇمىس جاسايمىز»، - دەيدى ۋكراينا ونەركاسىپ جانە كاسىپكەرلەر وداعىنىڭ ۆيسە-پرەزيدەنتى، جوبا قۇرىلتايشىسى دەنيس كراسنيكوۆ.
جاساندى ينتەللەكت بەينە جازبانىڭ جۇزدەن 99 پايىز ءدال اۋدارماسىن سول مەزەتتە ۇسىنادى ءارى اۋدارما داۋسى قازاقى قوڭىر ماقامدا. قۇرىلتايشىلاردىڭ ايتۋى بويىنشا، مۇنداي روباتتار قارجى مەن ۋاقىت ۇنەمدەۋدە دە مول سەپتىگىن تيگىزبەك ءارى نارىقتاعى ءداستۇرلى اۋدارماعا قاراعاندا جۇمىسى جيىرما پايىزعا ارزان. ءبىراق جوبا ماقساتى – قاراجاتتا عانا ەمەس، ماقسات – ۇلتتىق تىلدەردى دارىپتەۋ، - دەيدى Vidby قۇرىلتايشىلارى.
«ءبىزدىڭ كومپانيانىڭ ميسسياسى – اۋدارما كەزىندە الەم حالىقتارىنىڭ تىلدىك تازالىعىن ساقتاۋ، بەينەكونتەنتتى دامىتۋعا جاعداي جاساۋ جانە ەڭ باستىسى - انا تىلدە ءبىلىم الۋعا مۇمكىندىك ۇسىنۋ»، - دەيدى ۋكراينا ونەركاسىپ جانە كاسىپكەرلەر وداعىنىڭ ۆيسە-پرەزيدەنتى، جوبا قۇرىلتايشىسى دەنيس كراسنيكوۆ.
ءدال ءارى ساپالى بەرىلەتىن اۋدارماعا قوسا، باعدارلامالىق قۇرال دىبىستىق فايلدان كەز كەلگەن شۋ مەن مۋزىكانى اۆتوماتتى تۇردە ءوزى الىپ تاستاپ، جاساندى ينتەللەكت ارقىلى ادام ءسوزىن انىقتاپ، ونىڭ اۋدارماسىن دىبىستاي الادى. بۇل رەتتە وعان ونلاين رەداكتور كومەككە كەلمەك، بۇل ۆيدەوداعى ديالەكتىلەر مەن بىرەگەي اتاۋلاردى اۋدارۋ كەزىندە قولدانىلادى. تاعى ءبىر مۇمكىنشىلىك – SubRip ءسۋبتيترى، وسى قوسىمشا ارقىلى جوعارى ساپالى سۋبتيترلەردى جاساۋعا جاعداي جاسالعان، بۇل قىزمەت قوسىمشا اقىسىز قولجەتىمدى.