وزبەكستان مەن تاجىكستاندا اقش-تىڭ اسكەري بازالارى پايدا بولۋى مۇمكىن

ءقازىر كەلىسسوزدەر جۇرگىزىلىپ جاتىر.

اقش وزبەكستان مەن تاجىكستانعا بۇرىنعى اۋعانستان ۇكىمەتىنىڭ اسكەري-اۋە كۇشتەرىنىڭ (اۋە كۇشتەرى) ۇشقىشتارى ۇرلاپ، ەكى مەملەكەتتىڭ اۋماعىندا قوندىرعان 60-تان استام اسكەري ۇشاقتار مەن تىكۇشاقتاردى قالدىرۋعا مۇمكىندىك بەرەدى. ونىڭ ورنىنا ورتالىق ازيا رەسپۋبليكالارى امەريكاندىق قارۋلى كۇشتەردى ورنالاستىرۋ ءۇشىن ءوز اۋماقتارىن بەرۋگە ءتيىس بولادى. بۇل جونىندە ءقازىر كەلىسسوزدەر جۇرگىزىلۋدە، دەپ حابارلايدى Almaty-akshamy.kz Inbusiness.kz سىلتەمە جاساپ. 

«تاليبان» باسقىنشىلارىنىڭ قوزعالىسى باستالعان ۋاقىتتا اۋعان اۋە اسكەري ۇشقىشتارى وتباسىلارى مەن ارىپتەستەرىن وسى اۋعانستان اۋە كۇشتەرىنىڭ ۇشاقتارى مەن تىكۇشاقتارى كۇشىمەن وزبەكستان مەن تاجىكستانعا جەتكىزگەن. بۇل اۆياتەحنيكانى ءبىر كەزدەرى امەريكا قۇراما شتاتتارى اۋعانستانعا بەرگەن بولاتىن. پەنتاگوننىڭ مالىمەتىنشە، وزبەكستاندا ۇرلانعان اۆياتەحنيكانىڭ 46 بىرلىگى، تاجىكستاندا — 18 بىرلىگى قالعان. ونىڭ ىشىندە - مي-17، UH-60 تىكۇشاقتارى جانە PC-12، C-208، AC-208 جانە A-29 ۇشاقتارى.

تاليبان ونى اۋعانستانعا قايتارۋدى تالاپ ەتەدى، ويتكەنى ولار بۇل ۇشاقتار مەن تىكۇشاقتاردى اۋعان مەنشىگى دەپ سانايدى.

اقش وزبەكستان مەن تاجىكستان ۇكىمەتتەرىنە تەرروريزممەن كۇرەس اياسىندا وسى ەلدەرمەن اسكەري ىنتىماقتاستىق تۋرالى بەيرەسمي كەلىسىمنىڭ ورنىنا ۇرلانعان اۆياتەحنيكانى وزدەرىنە قالدىرۋعا رۇقسات بەرۋدى جوسپارلاپ وتىر.