الماتى زاماندىق تەحنولوگيالاردى ەنگىزۋدى جالعاستىرىپ، جاساندى ينتەللەكتى قوعامدىق قاۋىپسىزدىك پەن قالالىق ينفراقۇرىلىمدى باسقارۋدا كادەگە جاراتىپ كەلەدى. جي قوعامدىق كولىكتى باسقارىپ، جول جاعدايىن باقىلاپ، ءتارتىپ بۇزۋشىلىقتى انىقتاپ، ءورتتى ەرتە بايقاۋ سياقتى مىندەتتەردى شەشۋگە كومەكتەسەدى. وڭىرلىك كوممۋنيكاسيالار قىزمەتىنىڭ الاڭىندا الماتى قالاسى سيفرلاندىرۋ باسقارماسى باسشىسىنىڭ مىندەتىن اتقارۋشى مەيرام دۇيسەكوۆ وسىلاي دەدى.
قالاداعى نەگىزگى جوبانىڭ ءبىرى – احۋالدىق ورتالىق. مۇندا ماشينالىق وقىتۋ مەن ۇلكەن دەرەكتەردى تالداۋ ادىستەرى قولدانىلادى. جۇيە جولداعى قوزعالىستى سارالاپ، كولىك اعىنىن رەتتەۋگە مۇمكىندىك بەرەدى. سونداي-اق Open Almaty پلاتفورماسىنا تۇسكەن وتىنىشتەر تالدانىپ، تۇرعىنداردىڭ سۇرانىسىنا سايكەس شەشىم قابىلدانادى.
جاساندى ينتەللەكت بەينەمونيتورينگ جۇيەسىندە دە ىسكە قوسىلعان. الگوريتمدەر ادامداردىڭ كوپ جينالۋىن، كۇدىكتى ارەكەتتەردى، توبەلەستى، قارۋدى، ءورت پەن ءتۇتىندى انىقتايدى. سونىمەن قاتار ءتارتىپ بۇزۋشىلىقتاردى بەلگىلەپ، ادامدار مەن كولىكتەردى سيپاتتاما بويىنشا ىزدەي الادى. جىل سوڭىنا دەيىن بەينەاناليتيكانىڭ جاڭا مودۋلدەرى قوسىلادى. ولار رۇقساتسىز قوقىس توگىلگەن ورىندار مەن تولىپ كەتكەن كونتەينەرلەردى انىقتاپ، قوعامدىق كولىكتەگى بەينەاعىندى تالدايدى.
«جولداردىڭ جاعدايىنا دا ەرەكشە نازار اۋدارىلىپ وتىر. وتكەن جىلدىڭ قازان ايىنان باستاپ جي نەگىزىندەگى مونيتورينگ جۇيەسى ىسكە اسىرىلدى. جول جابىنى تۋرالى دەرەكتەر اۆتوبۋستار مەن جەدەل جاردەم كولىكتەرىنە ورناتىلعان بەينەتىركەگىشتەر ارقىلى جينالادى»، – دەدى سپيكەر.
الماتى تاجىريبەسى كورسەتكەندەي، جاساندى ينتەللەكت پەن سيفرلاندىرۋ – قالا ءومىرىنىڭ ماڭىزدى بولىگىنە اينالىپ كەلەدى.