الماتىدا مەكتەپ وقۋشىلارىنا ارنالعان جاساندى ينتەللەكت بويىنشا ءبىر جىلدىق ءبىلىم بەرۋ باعدارلاماسى باستالدى. وندا مەملەكەتتىك مەكتەپتەردىڭ 10 مىڭ وقۋشىسى ءبىلىم الىپ، بايقاۋدان كەيىن ولاردىڭ ىشىنەن 1 مىڭ وقۋشى junior-ازىرلەۋشى بىلىكتىلىگىن الادى. باعدارلامانىڭ پراكتيكالىق بولىمىندە جاساندى ينتەللەكتىنى قولدانىپ، 1 مىڭ سيفرلىق ءونىم جاسالادى.
«بۇگىن ءبىز سيفرلىق دامۋدىڭ جاڭا دەڭگەيىنە شىقتىق. الماتى جاساندى ينتەللەكتىنى قولدانا وتىرىپ، وزىق شەشىمدەردى ەنگىزىپ، ماماندار دايارلايتىن ورتالىققا اينالىپ كەلەدى»، – دەدى الماتى قالاسى سيفرلاندىرۋ باسقارماسى باسشىسىنىڭ مىندەتىن اتقارۋشى مەيرام دۇيسەكوۆ.
جىل سوڭىنا دەيىن قالادا ەكى جاڭا ءبىلىم بەرۋ ورتالىعى اشىلادى. ءبىرىنشىسى – TUMO الماتى دەپ اتالاتىن، 12–18 جاستاعى جاسوسپىرىمدەرگە ارنالعان كرەاتيۆتى تەحنولوگيالار ورتالىعى. ول باعدارلامالاۋ مەن روبوتوتەحنيكادان باستاپ، گەنەراتيۆتى جاساندى ينتەللەكت، انيماسيا جانە جاڭا مەدياعا دەيىنگى 15 باعىتتى قامتيدى. TUMO ادىستەمەسىن ءقازىردىڭ وزىندە 12 ەل قولدانۋدا.
ەكىنشى جوبا – 18 جاستان اسقان جاستارعا ارنالعان العاشقى peer-to-peer جاساندى ينتەللەكت مەكتەبى – Tomorrow School. مۇندا وقۋ بارىسىنا ءمۇعالىم ارالاسپاي، ناقتى ءىستى شەشۋ تاجىريبەسى قولدانىلادى. الماتىداعى جاڭا سيفرلىق ءبىلىم بەرۋ ەكوجۇيەسىنىڭ ىرگەتاسى بولعالى تۇرعان بۇل مەكتەپتەر بولاشاق مامانداردى دايارلاۋعا باعىتتالعان.
جاڭا مەكتەپتەر مەن ستارتاپتارعا ارنالعان باعدارلاما قالانىڭ سيفرلىق ەكوجۇيەسىنىڭ نەگىزگى ەلەمەنتىنە اينالىپ، زامان تالابىنا ساي مامانداردى دايارلاۋعا كومەكتەسەدى.
سونىمەن قاتار، قالادا ءىت جانە ستارتاپ ەكوجۇيەسىن دامىتۋعا ارنالعان ءۇش جىلدىق باعدارلاما ىسكە قوسىلماق. ونىڭ ماقساتى – كولىك، تۇرعىن ۇي-كوممۋنالدىق شارۋاشىلىق، ەكولوگيا، مەديسينا، قوعامدىق قاۋىپسىزدىك پەن ءبىلىم بەرۋ سالالارىندا الماتىنى جاساندى ينتەللەكت شەشىمدەرىن كەڭىنەن قولداناتىن پيلوتتىق الاڭعا اينالدىرۋ.
باعدارلاما اياسىندا 300-گە دەيىن جوباعا قولداۋ كورسەتىلىپ، ونىڭ كەمىندە 15ء-ى قالالىق ينفراقۇرىلىمعا ەنگىزىلەدى. 15 مەملەكەتتىك قۇرىلىم جاساندى ينتەللەكتپەن جۇمىس ىستەۋدى ۇيرەنىپ، شەشىمدەردى سىناۋعا ارنالعان تەحنولوگيالىق قۇرالدار قۇرىلماق. جوباعا 100 ميلليون دوللار كولەمىندە ينۆەستيسيا تارتۋ جوسپارلانىپ وتىر.