الماتىنىڭ №7 قالالىق كلينيكالىق اۋرۋحاناسىنىڭ نەيروحيرۋرگتەرى جاساندى ينتەللەكت تەحنولوگياسىنىڭ كومەگىمەن يشەميالىق ءينسۋلتى بار 77 جاستاعى ناۋقاسقا ءساتتى وتا جاسادى.
قارت ەر ادام اۋرۋحانانىڭ قابىلداۋ بولىمشەسىنە ينسۋلتتىڭ ايقىن كلينيكالىق بەلگىلەرىمەن – سول جاعىنىڭ سالدانۋى، سوزدەرىنىڭ بۇزىلۋى جانە بەت بۇلشىق ەتتەرىنىڭ شالا سالدانۋىمەن شۇعىل تۇردە جەتكىزىلگەن. اۋرۋ باستالعاننان بەرى شامامەن ءبىر ساعات قانا وتكەن، ءدال وسى ۋاقىت ارالىعىن دارىگەرلەر «التىن ساعات» دەپ اتايدى. بۇل كەزدە ەمدەۋدىڭ ءساتتى ءوتۋ مۇمكىندىگى جوعارى.
پاسيەنتكە جەدەل تۇردە كومپيۋتەرلىك توموگرافيا (كت) جۇرگىزىلدى. قان قۇيىلۋدىڭ نەمەسە يشەميانىڭ قالىپتاسقان وشاعىنىڭ ايقىن بەلگىلەرى انىقتالماعانىنا قاراماستان، كت دەرەكتەرى RAPID- مامانداندىرىلعان جاساندى ينتەللەكت باعدارلاماسىمەن قوسىمشا وڭدەلدى. بۇل جۇيە ينسۋلتتىڭ بەلگىلەرىن ەرتە انىقتاۋعا جانە ترومبتى الىپ تاستاۋ وپەراسياسىن جۇرگىزۋدىڭ كەرەكتىگىن انىقتاۋعا مۇمكىندىك بەرەدى.
«ومىرلىك كورسەتكىشتەر بويىنشا ترومبتى الىپ تاستاۋ وپەراسياسى ءساتتى جۇرگىزىلدى. بىرنەشە كۇننەن كەيىن پاسيەنت اياققا تۇرا باستادى. بۇل جاعداي جوعارى تەحنولوگيالىق كومەك كورسەتىلەتىن ستاسيونارعا ۋاقىتىلى ءتۇسۋدىڭ ماڭىزدىلىعىن، سونداي-اق شەشىم قابىلداۋدا جاساندى ينتەللەكتتىڭ اتقاراتىن ءرولىن ايقىن كورسەتەدى»، – دەدى №7 قالالىق كلينيكالىق اۋرۋحانانىڭ تامىرلىق نەيروحيرۋرگيا بولىمشەسىنىڭ نەيروحيرۋرگ-دارىگەرى ايبەك تۇرالييەۆ.
دارىگەر يشەميالىق ينسۋلت كەزىندە ۋاقىتتىڭ شەشۋشى ماڭىزعا يە ەكەنىن اتاپ ءوتتى: حيرۋرگيالىق ارالاسۋ نەعۇرلىم ەرتە جاسالسا، مي جاسۋشالارى سوعۇرلىم از زاقىمدالادى جانە تولىق قالپىنا كەلۋ مۇمكىندىگى اناعۇرلىم جوعارى بولادى. قولدانىلاتىن RAPID باعدارلاماسى ميدى ASPECTS شكالاسى (0-دەن 10 باللعا دەيىن) بويىنشا باعالايدى جانە ورتاڭعى مي ارتەرياسى باسسەينىندەگى زاقىمدانۋ دارەجەسىن انىقتاۋعا كومەكتەسەدى.
وپەراسيادان كەيىن پاسيەنت ينسۋلت بولىمشەسىندە ودان ءارى ەمىن جالعاستىردى. بارلىق ەمدەۋ، ونىڭ ىشىندە وپەراسيالىق ارالاسۋ دا، ءمامس جۇيەسى اياسىندا الەۋمەتتىك مەديسينالىق ساقتاندىرۋ قورىنىڭ قاراجاتى ەسەبىنەن جۇرگىزىلدى.
الماتى قالاسى №7 قكا-نىڭ ينسۋلت ورتالىعىنىڭ مەڭگەرۋشىسى، قوعامدىق دەنساۋلىق ساقتاۋ باسقارماسىنىڭ باس شتاتتان تىس ينسۋلتولوگى جاننا دۇيسەمبايەۆا ءوز كەزەگىندە قان اينالىمى جۇيەسى اۋرۋلارىنىڭ قازىرگى قوعامنىڭ ماڭىزدى مەديسينالىق-الەۋمەتتىك پروبلەمالارىنىڭ ءبىرى بولىپ قالا بەرەتىنىن اتاپ ءوتتى. بۇل حالىقتىڭ سىرقاتتانۋشىلىق جانە ءولىم-جىتىم قۇرىلىمىنداعى، العاشقى مۇگەدەكتىككە سەبەپ بولاتىن جوعارى ۇلەسىمەن بايلانىستى.
«ينسۋلت – بۇل جاي عانا مەديسينالىق ماسەلە ەمەس. بۇل بۇكىل دەنساۋلىق ساقتاۋ جۇيەسىنە، ءاربىر وتباسىنا، بۇكىل قوعامعا قويىلعان ۇلكەن سىناق. ءبىزدىڭ ءارقايسىمىز – دارىگەر، مەدبيكە، وڭالتۋ مامانى – كۇن سايىن وسى كۇرەستىڭ الدىڭعى شەبىندە تۇرىپ، ادامدارعا جوعالتقان فۋنكسيالارىن، ءۇمىتىن جانە ءومىر ساپاسىن قايتارۋعا كومەكتەسەمىز. ەلىمىزدە جىل سايىن 40 مىڭنان استام جاڭا ينسۋلت جاعدايى تىركەلەدى، ونىڭ 5 مىڭى العاشقى 10 كۇندە، ال تاعى 5 مىڭى ميداعى اپاتتى باستان وتكەرگەننەن كەيىن ءبىرىنشى اي ىشىندە قايتىس بولادى»، – دەيدى جاننا دۇيسەمبايەۆا.
دارىگەرلەر اتاپ وتكەندەي، جاساندى ينتەللەكت تەحنولوگيالارىن ەنگىزۋ دياگنوستيكانىڭ دالدىگىن ايتارلىقتاي ارتتىرادى جانە ءاربىر مينۋت ومىرگە ءقاۋىپ توندىرەتىن اسا ماڭىزدى جاعدايلاردا شەشىم قابىلداۋدى جەدەلدەتەدى.
جىل سايىن 29 قازاندا ينسۋلتپەن كۇرەس كۇنى اتالىپ وتەدى. بۇل ءىس- شارانىڭ ماقساتى – حالىقتى ءينسۋلتتىڭ زارداپتى سالدارى تۋرالى حاباردار ەتۋ جانە مەديسينالىق كومەككە ۋاقىتىلى جۇگىنۋدىڭ ماڭىزدىلىعىن ەسكە سالۋ. دۇنيەجۇزىلىك دەنساۋلىق ساقتاۋ ۇيىمىنىڭ دەرەگى بويىنشا، ينسۋلت اۋرۋى الەمدەگى ءولىم مەن مۇگەدەكتىكتىڭ باستى سەبەپتەرىنىڭ ءبىرى بولىپ قالا بەرەدى، بۇل دەرت جىل سايىن ميلليونداعان ادامنىڭ ءومىرىن قيىپ وتىر.