كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا باسقارما ءتوراعاسى رۇستەم تولەۋتايەۆتىڭ جەتەكشىلىگىمەن انەستەزيولوگتار مەن كارديوحيرۋرگتار توبى بيىل ءۇشىنشى جۇرەك ترانسپلانتاسياسىن جاسادى.
دونورلىق جۇرەكتى العاشقى رەت ترانسپلانتاسيالاۋ كلينيكادا 2023 جىلى جۇرگىزىلگەن بولاتىن. بۇگىنگى كۇنى بارلىعى 4 ترانسپلانتاسيا جاسالدى.
دونور – الماتىنىڭ ورتالىق قالالىق كلينيكالىق اۋرۋحاناسىنا تۇسكەن 63 جاستاعى ايەل ادام، دارىگەرلەر مي ءولىمىن تىركەگەن.
جۇرەك 36 جاستاعى الماتىلىق ەر ادامعا سالىندى. ول ديلاتاسيالىق كارديوميوپاتيا، سول جاق قارىنشا قۋىسىندا ترومب، شىعارىلۋ فراكسياسى وتە تومەن (24%) سوزىلمالى جۇرەك قىزمەتىنىڭ جەتكىلىكسىزدىگىنە شالدىققان. ەمدەۋ ناتيجە بەرمەگەن سوڭ، وعان كارديوۆەرتەر-دەفيبريللياتور يمپلانتاسيالانعان جانە جۇرەك ترانسپلانتاسياسىنا ۇمىتكەرلەر تىزىمىنە ەنگىزىلگەن.
«وكىنىشكە قاراي، سوڭعى كەزەڭدەگى سوزىلمالى جۇرەك قىزمەتىنىڭ جەتكىلىكسىزدىگىنە شالدىققان ناۋقاستار سانى جىلدان جىلعا ارتىپ كەلەدى. الايدا دونورلىق ورگانداردىڭ تاپشىلىعىنا بايلانىستى جۇرەككە مۇقتاج بارلىق ناۋقاستارعا ترانسپلانتاسيا جاساۋ مۇمكىن بولماي وتىر. ءبىزدىڭ پاسيەنتكە ۇزاق كۇتۋدىڭ قاجەتى بولمادى – سايكەس دونور تابىلدى. وسى كۇردەلى ۇدەرىستى ۇيىمداستىرۋ جانە ۇيلەستىرۋ ىسىندە ۇلكەن قولداۋ كورسەتكەن رەسپۋبليكالىق ترانسپلانتاسيا جانە جوعارى تەحنولوگيالىق مەديسينالىق قىزمەتتەردى ۇيلەستىرۋ ورتالىعىنا جانە ونىڭ باسشىسى ايدار كەنجەتايۇلىنا العىسىمىز شەكسىز. سوڭعى جىلدارى ورتالىق ەلىمىزدە ترانسپلانتولوگيا قىزمەتىن دامىتۋ باعىتىندا بەلسەندى جۇمىس اتقارىپ كەلەدى. سونداي-اق قالاداعى مەديسينالىق ۇيىمدارداعى ارىپتەستەرىمىزگە كومەگى ءۇشىن، ال دونور وتباسىنىڭ پاراساتتى شەشىمى مەن ومىرلەردى قۇتقارعانى ءۇشىن ريزاشىلىعىمىزدى بىلدىرەمىز»، – دەدى كلينيكانىڭ ءبىرىنشى باسشىسى رۇستەم تولەۋتايەۆ.
كارديوحيرۋرگيا بولىمشەسىنىڭ مەڭگەرۋشىسى ماقسات جاقايەۆتىڭ ايتۋىنشا، جۇرەك ترانسپلانتاسياسى – جۇرەك قىزمەتى جەتكىلىكسىزدىگىنىڭ سوڭعى ساتىسىنداعى ەڭ ءتيىمدى ەمدەۋ ءادىسى. بۇل وپەراسيا باسقا ەمدەۋ تاسىلدەرى ناتيجە بەرمەي، ناۋقاستىڭ جاعدايى اسا اۋىر بولعان كەزدە جاسالادى. قازىرگى ۋاقىتتا پاسيەنتتىڭ جاعدايى تۇراقتى، وڭ ديناميكا بايقالۋدا. ول رەانيماسيا بولىمشەسىنەن ءپروفيلدى بولىمشەگە اۋىستىرىلدى. ەندى وعان تولىققاندى ءومىر سۇرە الادى.
دونور تۋىستارىنىڭ كەلىسىمىنىڭ ارقاسىندا دارىگەرلەر 6 ادامنىڭ ءومىرىن ساقتاپ قالدى. جۇرەكتەن بولەك، بىرنەشە ماڭىزدى مۇشەلەر - باۋىر، وڭ جانە سول بۇيرەك، ەكى كوزدىڭ قابىعى (روگوۆيسا) ترانسپلانتاسيالاندى.