تاۋەلسىزدىك كەزەڭىندە نەگىزى قالانعان «ءارالۋاندىعىمىز – بىرلىكتە» قاعيداتى قازاقستاننىڭ سان قىرلى مادەنيەتى مەن ءداستۇرىن باعا جەتپەس بايلىعىمىزعا اينالدىردى. ىرىس-ىنتىماق پەن وتانشىلدىق رۋح ۇلتتىق كودىمىزدىڭ ۇيىتقىسى بولىپ وتىر.
قاسىم-جومارت توقايەۆ.
2017 جىلدىڭ باستى وقيعالارى
- 28ء-شى دۇنيەجۇزىلىك قىسقى ۋنيۆەرسيادا.
- حالىقارالىق «ەكسپو-2017» مامانداندىرىلعان كورمەسى.
- كونستيتۋسيالىق رەفورما: مەملەكەتتiك بيلiك تارماقتارى اراسىنداعى وكiلەتتiكتەردىڭ قايتا ءبولiنۋi.
- دۇنيەجۇزى قازاقتارىنىڭ V قۇرىلتايى.
- قازاق ءتىلىن لاتىن الىپبيىنە كوشىرۋ تۋرالى پرەزيدەنت جارلىعى.
25 قاڭتاردا 28ء-شى دۇنيەجۇزىلىك قىسقى ۋنيۆەرسيادانىڭ الاۋىن جاعۋ ءراسىمى بولدى. وعان ەلباسى نۇرسۇلتان نازاربايەۆ قاتىستى.
بۇل ۋنيۆەرسيادا ەلىمىزدىڭ تاۋەلسىزدىگى تاريحىندا حالىقتىڭ بىرلىگىن نىعايتۋعا ىقپال ەتكەن سپورت سالاسىنداعى ەڭ ءىرى وقيعا بولىپ سانالادى.
«اتقارىلعان جۇمىستاردىڭ ءبارىن جاستار ءۇشىن جاسادىق. ۋنيۆەرسيادانىڭ الەۋمەتتىك ينفراقۇرىلىمى، سپورت نىساندارى بىزگە ۇزاق جىل بويى قىزمەت ەتەتىن بولادى»، – دەدى قازاقستان پرەزيدەنتى .
9 ماۋسىمدا ەلوردادا حالىقارالىق «ەكسپو-2017» مامانداندىرىلعان كورمەسىنىڭ اشىلۋ ءراسىمى ءوتتى. سالتاناتتى راسىمدە ءسوز سويلەگەن ەلباسى 115 مەملەكەت پەن 22 حالىقارالىق ۇيىم قاتىسىپ جاتقان ەكسپو كورمەسىن قازاقستاننىڭ تمد جانە شىعىس ەۋروپا ەلدەرى اراسىنان ءبىرىنشى بولىپ وتكىزىپ وتىرعانىن اتاپ ءوتتى. «ەلورداداعى ەكسپو حالىقارالىق كورمەسى – جاھاندىق كەڭىستىكتە ەلىمىزدى تانىتۋدىڭ جانە «قازاقستان» ۇلتتىق برەندىن ىلگەرىلەتۋدىڭ جاڭا بەلەسى. ءبىز «بولاشاقتىڭ ەنەرگياسى» تاقىرىبىن ۇسىنا وتىرىپ، عىلىمي پروگرەستىڭ بەل ورتاسىندا بولۋدى قالايمىز»، – دەدى نۇرسۇلتان نازاربايەۆ.
2017 جىلى قازاقستاندىق تالانتتى ءانشى ديماش قۇدايبەرگەن ناۋرىز ايىندا «Top Chinese Music Awards» («ازياداعى ەڭ اتاقتى ءانشى») نوميناسيانىڭ جەڭىمپازى اتاندى. ال، ءساۋىر ايىندا قىتايدىڭ «Singer 2017» ءان بايقاۋىنا قاتىسىپ، ەكىنشى ورىندى جەڭىپ الدى. بۇگىندە قازاقتىڭ دارىندى قارا بالاسى الەمدى مويىنداتقان ونەر جۇلدىزى.
2017 جىل قازاقستان ءۇشىن مەرەيلى دە، ايتۋلى، كۇردەلى وقيعالارعا تولى جىل بولدى. ەكسپو-2017، شىۇ مەن يىۇ-نىڭ ءسامميتى، بۇۇ قاۋىپسىزدىك كەڭەسىنە مۇشەلىك، دۇنيەجۇزى قازاقتارىنىڭ قۇرىلتايى، قازاقستان حالقى اسسامبلەياسى، حالىقارالىق بايىتىلماعان ۋران بانكىن اشۋ، سيريا جونىندەگى استانا پروسەسى، ۋنيۆەرسيادا سياقتى ايتۋلى وقيعالار قازاقستانعا تورتكۇل دۇنيەنىڭ نازارىن اۋدارىپ، ەلىمىزدىڭ الەم قاۋىمداستىعى الدىنداعى ابىرويىن اسقاقتاتتى.
سىرتقى ساياساتقا ۇڭىلسەك، 2017 جىلدىڭ 1 قاڭتارىندا قازاقستان رەسپۋبليكاسى بۇۇ قاۋىپسىزدىك كەڭەسىندەگى تۇراقتى ەمەس مۇشەسى رەتىندەگى جۇمىسىنا كىرىستى.
نۇر-سۇلتاندا وتكەن شىۇ ءسامميتىنىڭ (5-9 ماۋسىم 2017 جىل) ماڭىزى زور بولدى. ونىڭ باستى وقيعاسى – شىۇ قۇرامىنا ءۇندىستان مەن پاكىستان يسلام رەسپۋبليكاسىن مۇشەلىككە قابىلداۋ پروسەدۋراسىنىڭ اياقتالۋى ەدى.
29 تامىزدا قازاقستان جانە بۇكىل الەم ءۇشىن ايتۋلى وقيعا بولدى – ماگاتە-نىڭ از بايىتىلعان ۋران حالىقارالىق بانكى اشىلدى.
ىشكى ساياساتقا كەلسەك، ەلباسى 2017 جىلدىڭ باسىنان باستاپ مەملەكەت پەن قوعامدى جاڭارتۋدىڭ ءۇش باعىتىن ىسكە قوستى. ولار: كونستيتۋسيالىق رەفورما؛ ەكونوميكانى جاڭعىرتۋ؛ قوعامدىق سانانى جاڭارتۋ. بۇلار قازاقستاندا ءۇشىنشى جاڭعىرۋدىڭ باستالعانىن بىلدىرەدى.ونىڭ باستى باعدارى – قازاقستاننىڭ جاڭا جاھاندىق احۋالدا باسەكەگە قابىلەتتىلىگىن قامتاماسىز ەتەتىن، XXI عاسىردىڭ ورتاسىندا الەمدەگى ەڭ دامىعان وتىز مەملەكەتتىڭ قاتارىنا قوسىلۋعا جاعداي تۋعىزاتىن ەكونوميكالىق ءوسۋدىڭ جاڭا مودەلىن قۇرۋ. بەلگىلەنگەن ساياسي رەفورمانىڭ ماقساتى – مەملەكەتتىك باسقارۋدىڭ تيىمدىلىگىن ارتتىرۋ جانە مەملەكەتتىڭ حالىق الدىندا ەسەپ بەرۋىن قامتاماسىز ەتۋ، پرەزيدەنت پەن بيلىكتىڭ زاڭ شىعارۋشى تارماعىنىڭ اراسىندا وكىلەتتىكتەردى قايتا ءبولۋ، مەملەكەتتىك شەشىمدەردى دايىنداۋ مەن قابىلداۋ ۇدەرىسىندەگى ازاماتتىق قوعامنىڭ ءرولىن كۇشەيتۋ. ۇسىنىلىپ وتىرعان رەفورمانىڭ ءمانى – بيلىك وكىلەتتىكتەرىن پرەزيدەنتتەن پارلامەنت پەن ۇكىمەتكە قايتا بولۋدە، تۇتاستاي ساياسي جۇيەنى دەموكراتيالاندىرۋدا جاتقان ەدى. ياعني، پارلامەنتتىڭ ۇكىمەت جاساقتاۋداعى ءرولىن كۇشەيتۋ، مينيسترلەر كابينەتىنىڭ دەپۋتاتتار كورپۋسى الدىنداعى جاۋاپكەرشىلىگىن ارتتىرۋ، سونىمەن بىرگە، ۇكىمەتتىڭ وكىلەتتىلىگىن كەڭەيتۋ قاجەت. ماقسات – ەلدى باسقارۋدىڭ نەعۇرلىم ءتيىمدى، ورنىقتى، زاماناۋي جۇيەسىن قۇرۋ.
پرەزيدەنتتىڭ قۇزىرىندا كونستيتۋسيانى قورعاۋ، بيلىك تارماقتارى اراسىنداعى قارىم-قاتىناس، ىشكى جانە سىرتقى ساياسات، قورعانىس پەن قاۋىپسىزدىك اياسىنداعى ستراتەگيالىق فۋنكسيالار ساقتالدى.
2017 جىلدىڭ قاڭتارىندا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى پرەزيدەنت جولداۋى جاريالاندى. وندا ەل ەكونوميكاسىنىڭ جاڭا تەحنولوگيالىق فورماسىنا كوشۋدى كوزدەگەن باعدارلار انىقتالدى.
الماتىدا 29 قاڭتار مەن 8 اقپان ارالىعىندا وتكەن قىسقى ۋنيۆەرسيادا سپورت الەمىندەگى ايتۋلى وقيعالاردىڭ ءبىرى بولدى. ۋنيۆەرسياداعا 57 ەلدەن 2 مىڭنان استام سپورتشى قاتىستى. جارىس سپورتتىڭ 12 ءتۇرى بويىنشا ءوتتى، 85 مەدال جيىنتىعى جۇلدەگە تىگىلدى. قازاقستاننىڭ جاس سپورتشىلارى تۋعان ەلدىڭ تورىندە تاماشا ونەر كورسەتىپ، كوماندالىق ەسەپ بويىنشا ەكىنشى جۇلدەلى ورىننان كورىندى، 11 التىن،8 كۇمىس، 17 قولا مەدالعا يە بولدى.
ۇكىمەتكە «سيفرلى قازاقستان» باعدارلاماسىن جاساۋ، سونداي-اق الەمنىڭ تۇكپىر-تۇكپىرىنەن كاسىپكەرلەر مەن ينۆەستورلاردى تارتۋ ءۇشىن ەكسپو-2017 نىساندارىنىڭ بازاسىندا IT-ستارتاپتار حالىقارالىق تەحنوپاركىن جاساۋ تاپسىرىلدى.كونستيتۋسيالىق رەفورما مەن جولداۋدان سوڭ ىلە-شالا قوعامدىق سانانى جاڭعىرتۋ ماسەلەلەرىنە ماڭىز بەرىلدى. 2017 جىلدىڭ 12 ساۋىرىندە پرەزيدەنتتىڭ «بولاشاققا باعدار: رۋحاني جاڭعىرۋ» اتتى ماقالاسى جاريالاندى.
ەلىمىزدە 2017 جىلى 9 ماۋسىمدا ەكسپو-2017 حالىقارالىق مامانداندىرىلعان كورمەسى اشىلدى. سالتاناتقا 17 مەملەكەت پەن ۇكىمەت باسشىلارى قاتىستى. مەرەكەنىڭ ورتالىعى «نۇر الەم» – الەمدەگى ەڭ ۇلكەن سفەرالىق عيماراتقا اينالدى. ەكسپو-2017 كورمەسىنە جۇزدەن استام ەل، ءىرى ترانسۇلتتىق كومپانيالار جانە 18 حالىقارالىق ۇيىمدار قاتىستى. ءۇش ايدىڭ ىشىندە كورمەنى كورۋگە ءتورت ميلليونعا جۋىق ادام كەلدى، ولاردىڭ اراسىندا – 180 ەلدەن كەلگەن جارتى ميلليون تۋريست بار.
25 قاڭتار
28ء-شى دۇنيەجۇزىلىك قىسقى ۋنيۆەرسيادا الاۋىن جاعۋ راسىمىنە قاتىسقان ەلباسى نۇرسۇلتان نازاربايەۆ سالتاناتتى ءىس-شاراعا قاتىسۋشىلاردى الماتىداعى عالامات سپورت مەرەكەسىنىڭ باستالۋىمەن قۇتتىقتادى. ۋنيۆەرسيادا الماتى قالاسىندا 2017 جىلى 29-شى قاڭتار مەن 8ء-شى اقپان ارالىعىندا، سپورتتىڭ 12 ءتۇرى بويىنشا ءوتتى.
21 ناۋرىز
ەلباسى ناۋرىز مەيرامىنا ارنالعان مەرەكەلىك ءىس-شاراعا قاتىستى. مەملەكەت باسشىسى «سارىارقا» ۆەلوترەگىندە وتكەن ءىس-شاراعا قاتىسۋشىلارعا ارناعان سوزىندە بارلىق قازاقستاندىقتاردى ناۋرىز مەيرامىمەن قۇتتىقتاپ، وتانداستارىمىز بۇل مەرەكەنى تۋىستارىمەن جانە دوستارىمەن بىرگە قارسى الۋدى داستۇرگە اينالدىرعانىن اتاپ ءوتتى. مىڭجىلدىق تاريحى بار ناۋرىز ەلدىڭ ەڭ جاقسى كورەتىن جانە اسىعا كۇتەتىن مەيرامى ەكەنىن، ول ادامنىڭ ۇلتى مەن ءدىني ۇستانىمىنا قاراماي تويلانىپ كەلە جاتقانىن ايتتى.
27-28 ناۋرىز
قازاقستان پرەزيدەنتى بىرىككەن اراب امىرلىكتەرىنىڭ ۆيسە-پرەزيدەنتى، پرەمەر-مينيسترى، دۋباي امىرلىگىنىڭ بيلەۋشىسى، شەيح مۇحاممەد بەن راشيد ءال ماكتۋممەن كەزدەستى. كەلىسسوز بارىسىندا ساۋدا-ەكونوميكا، قارجى جانە ينۆەستيسيا سالالارىنداعى ءوزارا ءىس-قيمىل ماسەلەلەرى قارالدى. مەملەكەت باسشىسى بىرىككەن اراب امىرلىكتەرىنە جۇمىس ساپارى اياسىندا دۋباي حالىقارالىق قارجى ورتالىعى (DIFC) باسشىلىعىمەن دە كەزدەستى.ەلباسى كەزدەسۋ بارىسىندا DIFC قىزمەتىمەن جانە ورتالىقتىڭ بۇدان ءارى قاراي دامۋ پەرسپەكتيۆاسىمەن تانىستى.
20 سءاۋىر
مەملەكەت باسشىسى شىعارماشىلىق زيالى قاۋىم وكىلدەرىمەن كەزدەستى. كەزدەسۋگە بەلگىلى جازۋشىلار بەكسۇلتان نۇرجەكەيەۆ، دۋلات يسابەكوۆ جانە سماعۇل ەلۋبايەۆ قاتىستى.ەلباسى ونەردىڭ، شىعارماشىلىقتىڭ ەل-جۇرت پەن بۇكىل قوعام ومىرىندە ماڭىزدى ورىن الاتىنىن ايتا كەلىپ، شىعارماشىلىق زيالى قاۋىم وكىلدەرىنە ساتتىلىك تىلەدى، سونداي-اق ولارعا ەل تاۋەلسىزدىگىن نىعايتۋعا قوسقان ۇلەستەرى ءۇشىن العىسىن ءبىلدىردى. اڭگىمە بارىسىندا ەل ءومىرىنىڭ مادەني-گۋمانيتارلىق سالاسىمەن قاتار، قوعامدىق-ساياسي سالاداعى كەڭ اۋقىمدى ماسەلەلەر قوزعالدى. اتاپ ايتقاندا، لاتىن الىپبيىنە كوشۋ، دەموگرافيالىق احۋال، كوشى-قون ساياساتى، ءۇش تىلدە ءبىلىم بەرۋ جۇيەسىن ەنگىزۋ، تاعى دا باسقا ماسەلەلەر قامتىلدى.
7 مامىر
مەملەكەت باسشىسى وتان قورعاۋشى كۇنىنە جانە قازاقستان رەسپۋبليكاسى قارۋلى كۇشتەرىنىڭ 25 جىلدىعىنا ارنالعان اسكەري پارادقا قاتىستى.
ەلباسى بارشا قازاقستاندىقتاردى جانە پارادقا قاتىسۋشىلاردى قازاقستان رەسپۋبليكاسى قارۋلى كۇشتەرىنىڭ 25 جىلدىعىمەن قۇتتىقتادى. بۇل ەل تاۋەلسىزدىگى تاريحىنداعى ەڭ اۋقىمدى پاراد بولدى.پارادقا بەس مىڭنان استام ادام جانە 400 اسكەري تەحنيكا قاتىستى.
13-15 مامىر
ەلباسى «ءبىر بەلدەۋ، ءبىر جول» اتتى حالىقارالىق ىنتىماقتاستىق فورۋمىنىڭ جۇمىسىنا قاتىسۋ ءۇشىن قحر استاناسى بەيجىڭ قالاسىنا باردى. فورۋمنىڭ سالتاناتتى اشىلۋ ءراسىمى اياسىندا ءبىرقاتار مەملەكەتتەردىڭ كوشباسشىلارىمەن كەزدەسۋ وتكىزدى. فورۋم اياسىندا وتكەن «تىعىز ىنتىماقتاستىققا ارنالعان ساياسي بىرلەسكەن قىزمەت» اتتى «دوڭگەلەك ۇستەل» جيىنىنا قاتىسۋشىلار الدىندا ءسوز سويلەگەن ەلباسى قحر ءتوراعاسى سي ءسزينپيننىڭ ەۋرازيادا ەجەلگى جىبەك جولىن جاڭا، زاماناۋي فورماتتا قايتا جانداندىرۋ يدەياسى الەمدە جاڭا گەوەكونوميكالىق پاراديگما قالىپتاستىرۋعا مۇمكىندىك بەرەتىنىن اتاپ ءوتتى. ونىڭ تابىستى ىسكە اسۋى، جيناقتاپ العاندا، 4،4 ملرد. ادام تۇرعىندى قامتيتىن ەلدەرگە پايدا اكەلەدى.
9 ماۋسىم
ەلوردادا حالىقارالىق «ەكسپو-2017» مامانداندىرىلعان كورمەسىنىڭ اشىلۋ ءراسىمى ءوتتى. ەلباسى 115 مەملەكەت پەن 22 حالىقارالىق ۇيىم قاتىسىپ جاتقان ەكسپو كورمەسىن قازاقستاننىڭ تمد جانە شىعىس ەۋروپا ەلدەرى اراسىنان ءبىرىنشى بولىپ وتكىزىپ وتىرعانىن اتاپ ءوتتى. «نۇر-سۇلتانداعى ەكسپو حالىقارالىق كورمەسى – جاھاندىق كەڭىستىكتە ەلىمىزدى تانىتۋدىڭ جانە «قازاقستان» ۇلتتىق برەندىن ىلگەرىلەتۋدىڭ جاڭا بەلەسى. ءبىز «بولاشاقتىڭ ەنەرگياسى» تاقىرىبىن ۇسىنا وتىرىپ، عىلىمي پروگرەستىڭ بەل ورتاسىندا بولۋدى قالايمىز»، – دەدى نۇرسۇلتان نازاربايەۆ.
16 ماۋسىم
نۇرسۇلتان نازاربايەۆ «جاڭا ەنەرگيا – جاڭا ەكونوميكا» اتتى ح استانا ەكونوميكالىق فورۋمىنىڭ پلەنارلىق وتىرىسىنا قاتىستى. «شانحاي ىنتىماقتاستىق ۇيىمىنا ءۇندىستان مەن پاكىستان كىرگەن سوڭ 3 ميلليارد ادامدى قامتيتىن نارىعى بار جاڭا جاھاندىق ويىنشى پايدا بولدى. شانحاي ىنتىماقتاستىق ۇيىمى ەلدەرىن ۇلى جىبەك جولىن جاڭعىرتۋ باعدارلاماسىمەن قامتۋ جاڭا ەكونوميكالىق ءسۋبوڭىردى قالىپتاستىرادى»، – دەدى قازاقستان پرەزيدەنتى.
23 ماۋسىم
دۇنيەجۇزى قازاقتارىنىڭ V قۇرىلتايى ءوتتى. نۇرسۇلتان نازاربايەۆ ەلورداعا الەمنىڭ 39 ەلىنەن كەلگەن دۇنيەجۇزىلىك قۇرىلتايدىڭ بارلىق قاتىسۋشىلارىنا ارناپ ءسوز سويلەدى.ەلباسى رۋحاني جاڭعىرۋ اياسىندا ىسكە اسىرىلىپ جاتقان 6 جوباعا، سونىڭ ىشىندە قازاق ءقارپىنىڭ لاتىن الىپبيىنە كوشۋى، گۋمانيتارلىق باعىتتاعى ۇزدىك 100 وقۋلىقتى قازاق تىلىنە اۋدارۋ، «تۋعان جەر»، «قازاقستاننىڭ كيەلى جەرلەرىنىڭ گەوگرافياسى»، «جاھانداعى زاماناۋي قازاقستاندىق مادەنيەت»، «قازاقستانداعى 100 جاڭا ەسىم» سياقتى جوبالارعا ەرەكشە توقتالدى. مەملەكەتىمىز بەن قوعام تاراپىنان قانداستارىمىزدى قولداۋدىڭ ماڭىزدىلىعىن ايتىپ، «وتانداستار» قورىن قۇرۋدى تاپسىردى. «قور دۇنيەجۇزى قازاقتارىنىڭ قاۋىمداستىعىمەن بىرلەسىپ، قانداستارىمىزعا قولداۋ كورسەتۋدىڭ تەتىكتەرىن انىقتاپ، ءتيىستى كەشەندى باعدارلاما ازىرلەۋى قاجەت»، – دەدى ەلباسى.
4 شىلدە
امەريكا قۇراما شتاتتارىنىڭ پرەزيدەنتى دونالد ترامپ امەريكا حالقى اتىنان نۇرسۇلتان نازاربايەۆتى جانە قازاقستان حالقىن ورتالىق ازيادا العاش رەت ۇيىمداستىرىلىپ وتىرعان حالىقارالىق «ەكسپو-2017» مامانداندىرىلعان كورمەسىنىڭ وتكىزىلۋىمەن قۇتتىقتادى. «پرەزيدەنت مىرزا، «ەكسپو-2017» كورمەسى ارقىلى ەنەرگەتيكالىق قاۋىپسىزدىك ماسەلەلەرى جونىندەگى جاھاندىق ديالوگتى ودان ءارى ىلگەرىلەتۋدەگى ءسىزدىڭ كوزقاراسىڭىز بەن كوشباسشىلىعىڭىز ءۇشىن سىزگە جانە قازاقستانعا ءىلتيپاتىمدى بىلدىرەمىن. ءوزارا سىيلاستىق پەن ورتاق مۇددەگە نەگىزدەلگەن اقش-قازاقستان اراسىنداعى ستراتەگيالىق سەرىكتەستىك ودان ءارى نىعايا تۇسەدى دەپ سەنەمىن»، – دەلىنگەن حاتتا.
29 تامىز
ەلباسى ماگاتە-نىڭ تومەن بايىتىلعان ۋران بانكىنىڭ اشىلۋ راسىمىنە قاتىستى.
ءراسىم بارىسىندا قازاقستان پرەزيدەنتى ماگاتە-نىڭ باس ديرەكتورى يۋ.امانوعا ءۇلبى مەتاللۋرگيا زاۋىتىنىڭ اۋماعىندا ورنالاسقان تومەن بايىتىلعان ۋران بانكىنىڭ سيمۆولدىق كىلتىن تابىس ەتتى.مەملەكەت باسشىسى قۇتتىقتاۋ سوزىندە بۇگىنگى شارانىڭ قازاقستان مەن بۇكىل الەمدىك قوعامداستىق ءۇشىن ماڭىزى زور ەكەنىن اتاپ ءوتتى. مەملەكەت باسشىسى جاھاندىق يادرولىق قاۋىپسىزدىكتى ساقتاۋدىڭ قاجەت ەكەنىن ايتىپ، قازاقستاندا اشىلعان تومەن بايىتىلعان ۋران بانكى تەك بەيبىت اتومعا عانا ارنالاتىنىن اتاپ ءوتتى.
9 قىركۇيەك
قازاقستان پرەزيدەنتى تۇركيا رەسپۋبليكاسىنىڭ پرەزيدەنتى رەجەپ تاييپ ەردوعانمەن كەزدەستى.
ر.ەردوعان نۇرسۇلتان نازاربايەۆقا وڭىرلىك پروبلەمالاردى شەشۋگە باعىتتالعان بىتىمگەرشىلىك قىزمەتى ءۇشىن ەرەكشە العىسىن ءبىلدىردى.تۇركيا پرەزيدەنتى بيىلعى 14 قىركۇيەكتە قازاق ەلىنىڭ استاناسىندا وتەتىن سيرياداعى جاعدايعا قاتىستى كەزدەسۋدىڭ ماڭىزدىلىعىنا توقتالىپ، ونىڭ جەنيەۆا كەلىسسوزدەرىنە وڭ ىقپال ەتەتىنىنە سەنىم ءبىلدىردى.
26 قازان
قازاق ءتىلى ءالىپبيىن كيريلليسادان لاتىن گرافيكاسىنا كوشىرۋ تۋرالى پرەزيدەنت جارلىعى شىقتى.
قازاق ءتىلى ءالىپبيىنىڭ كيريلليسادان لاتىن گرافيكاسىنا كوشىرىلۋىن قامتاماسىز ەتۋ ماقساتىندا ۇكىمەتكە قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا قۇرۋ،قازاق ءتىلى ءالىپبيىنىڭ 2025 جىلعا دەيىن لاتىن گرافيكاسىنا كەزەڭ-كەزەڭىمەن كوشۋىن قامتاماسىز ەتۋ مىندەتتەلدى.
9 قاراشا
مەملەكەت باسشىسى قازاقستان مەن رەسەيدىڭ ءحىV ءوڭىرارالىق ىنتىماقتاستىعى فورۋمىنا قاتىستى. بۇل فورۋم قازاقستان مەن رەسەي اراسىنداعى قارىم-قاتىناستىڭ جانە ىنتىماقتاستىقتىڭ اجىراماس ءارى ماڭىزدى بولىگىنە اينالدى.
5 جەلتوقسان
وسىدان 100 جىل بۇرىن، ياعني 1917 جىلعى 5 جەلتوقساندا ورىنبوردا قازاق زيالىلارى ۇيىمداستىرعان ءىى جالپىقازاق سەزى ءوز جۇمىسىن باستاعان بولاتىن. وسىعان وراي، ەلىمىزدىڭ بارلىق وڭىرلەرىندە، وقۋ ورىندارى مەن عىلىمي ينستيتۋتتاردا القالى جيىندار، كونفەرەنسيالار ۇيىمداستىرىلدى. ەلورداداعى ەكسپو كونگرەسس ورتالىعىندا «رۋحاني جاڭعىرۋ: الاش جانە ازاتتىق يدەياسىنىڭ ساباقتاستىعى» اتتى حالىقارالىق عىلىمي-تاجىريبەلىك كونفەرەنسيا ءوتتى. كونفەرەنسياعا قاتىسۋشىلار الاش ارىستارىن ۇلىقتاپ، ولاردىڭ مۇرالارىن زەرتتەۋدى جۇيەلەپ، جاس ۇرپاقتى پاتريوتتىق رۋحقا تاربيەلەۋ ءىسىن الاش مۇراتتارىمەن ساباقتاستىرۋ ماسەلەلەرى كورىنىس تاباتىن قارار قابىلدادى.
15 جەلتوقسان
نۇرسۇلتان نازاربايەۆ قازاقستان رەسپۋبليكاسىنىڭ تاۋەلسىزدىك كۇنىنە ارنالعان سالتاناتتى جيىنعا قاتىسۋشىلاردى جانە قازاقستان حالقىن ۇلتتىق مەرەكەمىز – تاۋەلسىزدىك كۇنىمەن قۇتتىقتادى. ەلباسى تاۋەلسىزدىك جىلدارىندا قازاقستان جىلدام وسۋگە قول جەتكىزىپ قانا قويماي، الداعى ۋاقىتتا ورنىقتى دامۋ ءۇشىن بەرىك نەگىز قالاعانىن ايتتى.
جىل ءتۇيىنى
2017 جىل تاۋەلسىزدىك جىلناماسىندا ەرەكشە ءىز قالدىرعان وقيعالارعا تولى بولدى، ەلباسى تۇجىرىمداعانداي، جارقىن جانە اۋقىمدى وقيعالارىمەن ەستە قالدى. ەلوردانىڭ جانە بۇكىل ەلىمىزدىڭ اجارىن اشقان «ەكسپو» كورمەسى بەدەلىمىزدى بيىكتەتىپ، ابىرويىمىزدى اسقاقتاتتى. قىسقى ۋنيۆەرسيادا مەن حالىقارالىق «ەكسپو-2017» كورمەسى قازاقستاندىقتارعا جانە شەتەلدىك قوناقتارعا سپورت پەن تەحنولوگيانىڭ تاماشا مەرەكەسىن تارتۋ ەتتى. قازاقستان يسلام ىنتىماقتاستىعى ۇيىمىنىڭ ءسامميتىن جوعارى دەڭگەيدە وتكىزدى.
اتا زاڭعا وزگەرىس ەنگىزىلىپ، مەملەكەتتىك باسقارۋ جۇيەسىن جەتىلدىرۋ ءۇشىن ماڭىزدى قادام جاسالدى.بولاشاقتىڭ باعدارىن ايقىندايتىن رۋحاني جاڭعىرۋ جولى باستالدى.
بۇل جىل قازاق ءتىلىنىڭ جاڭا ءالىپبيى قابىلدانعان تاريحي شەشىم ارقىلى ەستە قالدى. قازاق ەلى ساياساتتا، ەكونوميكادا، سپورت سالاسىندا ماڭىزى زور حالىقارالىق شارالارعا باستاماشى بولدى. تاتۋلىق پەن تۇراقتىلىقتىڭ مەكەنى – قازاقستان ەل مەن ەلدىڭ اراسىن جاقىنداتتى. الەمنىڭ ءار تۇكپىرىنەن كەلگەن سپورت ساڭلاقتارى قىسقى ۋنيۆەرسيادا تورىندە باس قوستى. بارشا مۇسىلمان ەلدەرىنىڭ باسشىلارى قاتىسقان جيىن ءوتتى. 2017 جىلى قازاق ەلى ون سەگىز ميلليون حالقى بار ەڭسەلى ەلگە، مەرەيلى مەملەكەتكە اينالدى.