اسكەري ءومىردىڭ ايبىنى سانالاتىن قازاقستان رەسپۋبليكاسىنىڭ ۇلتتىق ۇلانى ەل يگىلىگى مەن قوعامدىق قاۋىپسىزدىك جولىندا 32 جىل قاتارىنان تاباندى تۇردە قىزمەت ەتىپ كەلەدى. قۋاتتى قۇرىلىمنىڭ قاتارى بيىل دا ساربازدارمەن تولىعىپ وتىر، دەپ حابارلايدى اlmaty-akshamy.kz.
الماتىنىڭ قاق تورىنەن ورىن تەپكەن 5571 اسكەري بولىمىنە كەشە عانا اياق باسقان جاس ساربازدار انت قابىلدادى. ۇلتتىق ۇلاننىڭ گەنەرال-مايور تالاپكەر امىرەيەۆ باسقاراتىن «وڭتۇستىك» وڭىرلىك قولباسشىلىعىنا قاراستى 5571 اسكەري ءبولىمىنىڭ جاس جاۋىنگەرلەرى ماۋسىمنىڭ باسىنان بەرى جەتىگەن ەلدى مەكەنىندە ورنالاسقان 5574 اسكەري ءبولىمىنىڭ وقۋ ورتالىعىندا جاس جاۋىنگەر كۋرسىنان وتكەن بولاتىن. وقۋ ورتالىعىنىڭ جۇمىسىنا 5571 اسكەري ءبولىمى كومانديرىنىڭ ورىنباسارى پودپولكوۆنيك نۇرلان سۇگىرالييەۆ باسشىلىق جاسادى. 
ۇلتتىق ۇلان قاتارىنا ەلىمىزدىڭ بارلىق ايماعىنان، ءبىر اي بۇرىن شاقىرىلعان 600-گە جۋىق سارباز از ۋاقىتتىڭ ىشىندە اسكەري تارتىپكە ۇيرەنىپ، العاشقى دايىندىق كەزەڭىنەن ءوتتى. ۇلتتىق ۇلاننىڭ مىندەتتەرىمەن تانىستى. اسكەرگە ىشتەي ءتاس-تۇيىن دايىندىقپەن كەلگەن كەشەگى بوزبالا بۇگىن سارباز بولىپ، وتانىنا ادال قىزمەت ەتۋگە انت بەردى. ولاردىڭ قاتارىندا شىرايلى شىمكەنت شاھارىنان كەلگەن جاس سارباز ديماش بەيبىتوۆ تە بولدى. تەمىرجول سالاسىنداعى «تاسىمالداۋدى ۇيىمداستىرۋ» ماماندىعىن مەڭگەرگەن ول كوللەدج ءبىتىرىپ، ديپلوم العان كۇنى-اق اسكەرگە اتتانىپتى.
– ديماش – ۇلدان كورگەن تۇڭعىش نەمەرەم بولعاندىقتان، مەن ءۇشىن ونىڭ اماندىق-ساۋلىعى، وتان الدىندا اتقارعان قىزمەتى زور ماڭىزعا يە. سوندىقتان دا مەن ونىڭ اسكەري انت قابىلداۋ ءىس-شاراسىن كورىپ، كوڭىل مارقايتۋ ءۇشىن سوناۋ شىمكەنتتەن ارنايى كەلدىم، – دەيدى جاس ساربازدارعا باتاسىن بەرگەن 60 جاستاعى اقساقال بەيبىت ارىسبايەۆ.
سالتاناتتى راسىمنەن كەيىن جاس جاۋىنگەرلەر كەلگەن قوناقتار مەن اتا-انالارعا ءبىر اي كولەمىندە ۇيرەنگەن جاۋىنگەرلىك ۇرىس، قارۋمەن جانە قارۋسىز ساپتىق تاسىلدەردى ورىنداۋدان كورىنىس كورسەتتى. سونداي-اق ءبولىمنىڭ اسكەري وركەسترىنىڭ اۋەلەگەن پلاس-كونسەرتى مەن دەفيلە قويىلىمدارى تاماشالاندى.
اسكەري انت قابىلداۋ ءىس-شاراسى سوڭىندا جاس جاۋىنگەرلەرگە اتا-انا، تۋىستارىمەن بىرگە قالا ارالاپ، سەرۋەندەپ قايتۋ مۇمكىندىگى بەرىلدى. اسكەري ءبولىم باسشىلىعىنىڭ شەشىمىمەن، جاۋىنگەرلەر جوسپار بويىنشا ۋاقىتىلى قالاعا شىعىپ، بەلگىلەنگەن كەزدە اسكەري بولىمگە قايتا ورالدى.