الماتى قالاسىنداعى قازاقستان رەسپۋبليكاسىنىڭ ۇلتتىق ۇلانى 3650 اسكەري بولىمىندە جاس ساربازداردىڭ سالتاناتتى تۇردە انت قابىلداۋ ءراسىمى ءوتتى.
وتان ءۇشىن وتقا تۇسەر ازاماتتارىمىزدىڭ ومىرىندەگى جاۋاپتى قادام جاساۋ ءىس-شاراسىنا «وڭتۇستىك» وڭىرلىك قولباسشىلىعى قولباسشىسىنىڭ تەحنيكا جانە قارۋ-جاراق جونىندەگى ورىنباسارى پولكوۆنيك يگور پوپوۆسكيي جانە ءبولىمنىڭ اسكەري قىزمەتشىلەرى، سونداي-اق ساربازداردىڭ اتا-انالارى مەن تۋعان-تۋىستارى قاتىستى.
جەتىسۋ وبلىسىنان شاقىرىلعان 40-قا جۋىق جاۋىنگەر قازاقستان حالقىنا ادال بولۋعا، ونىڭ زاڭدارى مەن ۇلتتىق قۇندىلىقتارىن قاستەرلەپ ساقتاۋعا انت بەردى.
– ۇلىمنىڭ وتان الدىنداعى اسكەري انت قابىلداۋ ءىس-شاراسىن كوزىمىزبەن كورىپ، نەگە قۋانباسقا؟! قاراپ تۇرسام، بالامنىڭ جاعدايى جاقسى ەكەن. كەشە عانا اۋىلدان شىعارىپ سالعان بوزبالا ەدى. بۇگىن ساپتا سىمداي تارتىلىپ، ەسەيىپ قالعانداي. ءبىز ءۇشىن ونىڭ اماندىق-ساۋلىعى، وتان الدىندا اتقارعان قىزمەتى ماڭىزعا يە. سوندىقتان دا ونىڭ اسكەري انت قابىلداۋ شاراسىن كورىپ، كوڭىل مارقايتۋ ءۇشىن ارنايى كەلىپ وتىرمىن، – دەيدى جەتىسۋ وبلىسىنان اسكەرگە شاقىرىلعان قاتارداعى اقىلبەك ءدارىبايدىڭ اناسى دامەلى سابىرحان قىزى.
سالتاناتتى جيىندا اسكەري مۋزىكانىڭ اۋەنىمەن قاتار-قاتار ساپ تۇزەپ، ءبىر اي بويى ۇيرەنگەن سان الۋان اسكەري قيمىلدارىن كورسەتكەن ساربازداردىڭ ەپتىلىگى مەن شەبەرلىگىنە جينالعان قاۋىم ۇلكەن قوشەمەت ءبىلدىردى.