ق ر ءىىم ۇلتتىق ۇلانى الماتى قالاسى ءبىلىم باسقارماسىنىڭ №166 ليسەيىمەن كەلىسىمگە قول قويدى. ونىڭ اياسىندا اسكەري قىزمەتشىلەر تاربيە جۇمىستارى مەن پاتريوتتىق ءىس-شارالارعا بەلسەندى قاتىساتىن بولادى.
بىرلەسكەن باستاما جاستاردىڭ بويىندا ءوز ەلى ءۇشىن ماقتانىش سەزىمىن قالىپتاستىرۋعا، قۇقىق قورعاۋ سالاسى قىزمەتىنىڭ مارتەبەسىن كوتەرۋگە جانە اسكەري مانسابىن دارىپتەۋگە باعىتتالعان.
جاڭا كەلىسىم بويىنشا وتكىزىلگەن العاشقى ءىس-شارا بارىسىندا «وڭتۇستىك» وڭىرلىك قولباسشىلىعىنىڭ وفيسەرلەرى ليسەيدىڭ 9-11 سىنىپ وقۋشىلارىمەن كەزدەستى. وندا وتاندى قورعاۋدىڭ، اسكەردە قىزمەت ەتۋدىڭ ماڭىزدىلىعى مەن قۇقىق ءتارتىبى اسكەرلەرى قاتارىندا قىزمەت ەتۋ مۇمكىندىكتەرى تالقىلاندى. سونداي-اق، وقۋشىلارعا ق ر ءىىم ۇلتتىق ۇلان اكادەمياسىنداعى وقۋ جۇيەسى تۋرالى ايتىلدى.
– مەكتەپ قابىرعاسىنان باستاپ پاتريوتتىق تاربيە بەرگەن ءجون. بۇگىندە باستى مىندەتتەردىڭ ءبىرى – مەملەكەتىمىزدىڭ قاۋىپسىزدىگىن قامتاماسىز ەتۋ. ءبىزدىڭ بولاشاعىمىز جاستاردىڭ قولىندا. مۇنداي ىنتىماقتاستىق وقۋشىلارعا قاۋىپسىزدىك پەن قوعامدىق ءتارتىپتى قامتاماسىز ەتۋدەگى ۇلتتىق ۇلاننىڭ ءرولىن جاقسى تۇسىنۋگە كومەكتەسەتىن ازاماتتىق-پاتريوتتىق تاربيە باعدارلاماسىنىڭ ءبىر بولىگىنە اينالدى، – دەدى 5571 اسكەري ءبولىم كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پودپولكوۆنيك ۇلىقبەك قارايەۆ.