الماتى قالاسى بويىنشا قىلمىستىق-اتقارۋ جۇيەسى دەپارتامەنتىنە قاراستى №11 مەكەمەسىندە، ياعني كامەلەتكە تولماعان جازاسىن وتەۋشى بالالار كولونياسىندا «اناعا قۇرمەت» مۋزەيى وكىلدەرىنىڭ ۇيىمداستىرۋىمەن كورمە ءوتتى.
سونىمەن قاتار، تاۋەلسىز قازاقستاننىڭ تاريحىنداعى تۇڭعىش گەنەرال-ايەل ساۋلە ايتبايەۆا ءدارىس وتكىزدى. ساۋلە مۇحانبەديان قىزى 2017-2022 جىلدارى سەنات دەپۋتاتى، 2018-2019 جىلدارى قازاقستان رەسپۋبليكاسىنىڭ بالا قۇقىقتارى جونىندەگى ۋاكىلى بولعان. ءقازىر قۇرمەتتى ەڭبەك دەمالىسىندا. №11 مەكەمەنىڭ كىتاپحاناسىنا قازاقستان كونستيتۋسياسىنىڭ اۆتورى ناعاشىباي شايكەنوۆ تۋرالى «ونەگەلى ءومىر» كىتابىن سىيعا تارتتى
الماتى قالاسىنداعى «اناعا قۇرمەت» مۋزەيى – ەلىمىزدەگى ەڭ ەركەشە مۋزەي. قىزمەتكەرلەرى بالالار كورسىن دەپ، وزدەرىمەن بىرگە كونە جادىگەرلەردى، انالارىمىز پايدالانعان بۇرىنعى ىدىستاردى، ەرتە زامانداعى باتىرلار قارۋ-جاراقتارىن جانە باسقا دا قۇندى ەكسپوناتتتاردى الا كەلىپ، كەرەمەت كورمە ۇسىندى. بالالار كونە جادىگەرلەردى قولىمەن ۇستاپ، وزدەرىن مۋزەيگە بارىپ قايتقانداي اسەردە بولعانى انىق.
مۋزەي مەڭگەرۋشىسى گۇلنار ءابىش جازالى جاسوسپىرىمدەرگە بوس ۋاقىتتارىندا قولونەرمەن اينالىسۋعا، مەكەمەدەن بوساپ شىققان سوڭ وسىنداي ەركەشە جۇمىستار جاساپ، ادال ەڭبەگى ارقىلى قوعامنان ءوز ورنىن تاۋىپ، ءوز-وزىن جۇمىسپەن قامتي الاتىندارىن اتاپ ءوتتى.
– وسىنداي تانىمدىق ءىس-شارالار جاسوسپىرىمدەردىڭ ەستەتيكالىق تالعامىن ارتتىرىپ، تاريحىمىز تۋرالى كوبىرەك بىلۋگە، قۇرمەتتەۋگە ۇندەيتىنى ءسوزسىز. سوندىقتان ءبىزدىڭ ماقسات – جازالى جەتكىنشەكتەر ءۇشىن وسىنداي جۇزدەسۋلەردى ءجيى ۇيىمداستىرىپ، ولارعا ءومىردىڭ ءمانىن ءتۇسىندىرۋ، جامان جولعا ءتۇسىپ كەتپەي، وزىنە، وتباسىنا، قوعامعا پايدالى ىسپەن اينالىسۋىنا بولاتىن جولداردى كورسەتۋ، – دەيدى №11 مەكەمە باستىعى ادىلەت پولكوۆنيگى المات سۇلەيمەنوۆ.