رەسپۋبليكا سارايىندا «جاس قانات - 2023» جاس ورىنداۋشىلاردىڭ رەسپۋبليكالىق بايقاۋى اياقتالدى. اراعا ءۇش جىل سالىپ زامان تالابىنا ساي جاڭا لەپپەن قايتا ورالعان ءان بايقاۋى بيىل الماتىدا 29-رەت ۇيىمداستىرىلىپ وتىر.
بايقاۋدىڭ سوڭعى كۇنى ەلىمىزدىڭ ءار وڭىرىنەن كەلگەن 20 قاتىسۋشىنىڭ اراسىنان ۇپاي سانى بويىنشا اقتىق سىنعا جولداما العان 8 ۇمىتكەر سىنعا ءتۇستى. فينالدا سايىسكەرلەر بەلگىلى كومپوزيتور، ديريجەر جانە وڭدەۋشى يليا باشقاتوۆتىڭ جەتەكشىلىگىمەن تاماشا كاسىبي Live بەندىنىڭ سۇيەمەلدەۋىمەن ونەر كورسەتتى. مۇنى «جاس قانات» بايقاۋىنىڭ جاڭالىعى دەۋگە بولادى.
يليا باشكاتوۆتىڭ ايتۋىنشا، رەپەرتۋار بويىنشا كونكۋرستىق كونسەرتتەرگە ەنگەن اندەردىڭ باسىم بولىگىن قاتىسۋشىلار وزدەرى تاڭداعان.
سونىمەن، قازىلار القاسىنىڭ شەشىمىمەن بايقاۋدا العاش رەت تاعايىندالعان مۇرات ەرعالييەۆ پەن الەكساندر پونوماريەۆ اتىنداعى «جاس قانات – 2023» بايقاۋىنىڭ باس جۇلدەسى – گران-پري اتىراۋلىق ەرنازار جۇبانعا بۇيىردى. «التىن قاناتتى» (1-ورىن) اقتوبەدەن كەلگەن ارۋ نارعىز جانۇزاقوۆا يەلەندى. «كۇمىس قانات» (2-ورىن) الماتىلىق بەنازير الىمحودجايەۆا بەرىلسە، «قولا قاناتتى» (3-ورىن) الماتىلىق الماگۇل باتتالييەۆا قانجىعاسىنا بايلادى. قالعان ءتورت فيناليست – ورالدىق ارۋجان بيسەمباي، پەتروپاۆلدىق ناريمان جولداسبەكوۆ، پاۆلودارلىق ءمادينا قابدوللا جانە شىمكەنتتىك نۇراسىل ساتىبالدى بايقاۋدىڭ ديپلومانتى اتاندى.
ۇمىتكەرلەر بايقاۋدىڭ ءۇشىنشى كۇنى دجاز جانرىندا، نەگىزىنەن، قازاق، ورىس، اعىلشىن تىلدەرىندە ونەر كورسەتتى. ەلىمىزدىڭ ءار وڭىرىنەن كەلگەن جاس ورىنداۋشىلاردىڭ ىشىندە وسالى جوق. ءادىلقازى مۇشەلەرىنىڭ ايتۋىنشا، ولار وزدەرىنىڭ شىن تالانت ەكەنىن بايقاۋدىڭ العاشقى كۇنىنەن-اق بايقاتقان. سول سەبەپتى شىن تالانتتى انىقتاۋدا ەشقانداي كەلىسپەۋشىلىك بولعان جوق.
جۇلدەلى ورىنداردان بولەك قاتىسۋشىلارعا، ىنتالاندىرۋ رەتىندە ءادىلقازىلار مەن جان-جاقتى قولداۋ كورسەتكەن سەرىكتەس كومپانيالار ارنايى سىيلىقتارىن تابىس ەتتى.
الماتى قالاسىنىڭ نەگىزگى اقپارات قۇرالدارىنىڭ باسىن بىرىكتىرگەن «Alatau aqparat» ج ش س مەدياحولدينگىنىڭ باس ديرەكتورى ەرجان قالىمباي ۇلى ءان الەمىنە قانات قاققان جاس تالانتتارعا جۇرەكجاردى لەبىزىن ءبىلدىرىپ، ارنايى سىيلىعىن تابىستادى.
– ارمىسىزدار، ارداقتى ونەرسۇيەر قاۋىم! بۇگىن ەرەكشە كەش ءوتتى. عالامات شارانى ۇيىمداستىرۋعا قولداۋ بىلدىرگەن ازاماتتارعا، سونىمەن قاتار، ءان دوداسىندا ب ا ق سىناعان بارلىق قاتىسۋشىلارعا ءوزىمنىڭ العىسىمدى بىلدىرگىم كەلەدى. اسەم الماتىنىڭ باۋرايىنا «جاس قانات» بايقاۋىنىڭ قايتا تۇلەۋى، بۇل – قازاق رۋحانياتىنا ۇلكەن ولجا، تاريحي وقيعا دەپ سانايمىز. كەزىندە وسى بايقاۋدان تۇلەپ ۇشقان تالاي دارىندى، تالانتتى ونەرپازدار بۇگىندە قازاق مادەنيەتىنىڭ ءبىر-بىر دارابوزدارىنا اينالىپ، قازاق ونەرىنە ۇلەس قوسىپ ءجۇر. بۇگىنگى جاس تالانتتارعا الدىڭعى تولقىن اعا-اپايلارىنىڭ جولىن بەرسىن دەپ تىلەيمىز. قازاقتا جۇلدىزىڭ بيىك بولسىن، جۇلدىزىڭ جوعارى بولسىن! - دەگەن ادەمى ءسوز بار. ءان الەمىندە جارىق جۇلدىز بولىپ جاناتىن جاستارىمىزدىڭ ونەرى قازاقتىڭ دالاسىندا عانا ەمەس، الەمنىڭ كوگىندە شارىقتايتىنىنا سەنەمىز. «Alatau Aqparat» مەدياحولدينگى ولاردىڭ جەڭىستى، قۋانىشتى ساتتەرىن – ءارقاشان سۇيىنشىلەپ حالىققا جەتكىزۋگە دايىن. ونەرلەرىڭىز ۇستەم بولسىن! قازاق مادەنيەتى جاساي بەرسىن! - دەدى ول.
مەدياحولدينگ باسشىسى ەرجان قالىمباي ۇلى سايىسكەرلەردىڭ اراسىنان فينالعا وتپەسە دە ماراپاتقا لايىق دەپ تانىعان دياس جورابەككە «Alatau aqparat» مەدياحولدينگىنىڭ اتىنان جىل ون ەكى اي بويى FITNESSBLITZ فيتنەس كلۋبىندا دايىندالۋىنا جانە DREAM-MOMENTS دۇكەنىنەن قالامىزدىڭ ەڭ كورىكتى جەرلەرىن كورىپ رۋحاني ءلاززات الۋىنا جولداما ۇسىندى.
ال مەدەۋ ارىنبايەۆ پەتروپاۆلدىق ناريمان جۇلدىزبەكوۆ پەن ورالدىق ارۋجان بيسەمبايدى قازاق انىنە دەگەن قۇرمەتى ءۇشىن ءوزىنىڭ ارنايى سىيلىعىن ۇسىندى. رەنات گايسين نۇراسىل ساتىبالدىمەن ىنتىماقتاسا جۇمىس ىستەيتىندەرىن ايتىپ، ءوز قاناتىنىڭ استىنا الاتىنىن جەتكىزدى. ال بايعالي سەركەبايەۆ ءوزىنىڭ «Emporio Music Fest» مۋزىكالىق فەستيۆالىنىڭ ارنايى جۇلدەسىن ەرنازار جۇبانعا تابىس ەتتى. ول 5-7 شىلدە ارالىعىندا شۆەيساريادا وتەتىن، الەمنىڭ ەڭ تانىمال مۋزىكانتتارى باس قوساتىن ايگىلى «Montreux Jazz Festival» دجاز فەستيۆالىنە جولداما بولاتىن. فيناليستەردەن باسقا، كونكۋرستىڭ تاعى 12 قاتىسۋشىسى ديپلوم-سەرتيفيكاتتار الدى.
بيىل «جاس قانات – 2023» بايقاۋىنان بولەك، اڭىزعا اينالعان «ازيا داۋىسى» فەستيۆالى دە قايتا جاندانۋدا. وعان دايىندىق بارىسىندا تەمىربەك جۇرگەنيەۆ اتىنداعى قازاق ۇلتتىق ونەر اكادەمياسى مەن حالىقارالىق «ازيا داۋىسى» فەستيۆالىنىڭ باسىن قوسقان قىزىقتى شىعارماشىلىق جوبا ۇيىمداستىرىلعان بولاتىن. جوبا اياسىندا اكادەميا ستۋدەنتتەرى اراسىندا فەستيۆالدىڭ ەرەكشە ءستيلىن ساقتاي وتىرىپ، جاڭا ساحناعا سەنوگرافيا جاساۋ تاپسىرىلعان. كوميسسيا تاپسىرمانىڭ ءساتتى ءارى جوعارى دەڭگەيدە ورىنداعان دانا نۇرشايەۆا مەن ءاليحان ساتىبالدىنى جەڭىمپاز دەپ تانىدى. ارنايى سىيلىقپەن ماراپاتتالعان جەڭىمپازدار «ازيا داۋىسى 2023» فەستيۆالىنە سەنوگرافيا جاساۋ ءۇشىن شىعارماشىلىق توپقا شاقىرىلدى.
الماتىدا «ازيا داۋىسى» مەن «جاس قاناتتىڭ» قايتا جاندانۋىن ارمانداعان مۇرات ەرعالييەۆ پەن الەكساندر پونوماريەۆتىڭ وڭ قولى بولعان تۇلعا، بايقاۋدىڭ ۇيىمداستىرۋشىسى، «ازيا داۋىسى» ستۋدياسىنىڭ باسشىسى يرينا كوۆىرياكونىڭ ايتۋىنشا، «بۇل ءان بۇرىنعى اننەن وزگەرەك» بولدى. بىرىنشىدەن، جاندى مۋزىكا! ۇمىتكەرلەردى 60 ادامنان تۇراتىن ەڭ مىقتى وركەستر سۇيەمەلدەدى. ەكىنشىدەن، Live بەند بولدى. سايىسكەرلەردىڭ كەرەمەت ونەر كورسەتكەنى سونشا، بارلىعى 2 شىلدەدە وتەتىن «ازيا داۋىسى پيكنيگىنە» شاقىرىلدى.
– ەندى ءبىز «جاس قانات – 2024» بايقاۋىنا دايىندىقتى باستايمىز. قۋاندىم، جىلادىم... سايىسكەرلەر ءان سالعاندا جانارىم جاسقا تولىپ، تولقىعان ساتتەرىم كوپ بولدى. مەن ءۇشىن كيەلى ساحناداعى ءاربىر ءسات ەموسياعا تولى اسەر قالدىردى، - دەدى ول بايقاۋ سوڭىندا.
بايقاۋ سوڭىندا ءۇش كۇن بويى جاس تالانتتاردىڭ ءۇمىت تولى جانارى مەن ءلۇپىل قاققان جۇرەگىنىڭ دۇرسىلىنە كۋا بولعان الماتىلىق كورەرمەندەر «جاس قانات – 2023» جاققان جاڭا جۇلدىزدارعا قول شاپالاقتاپ، قوشەمەت كورسەتتى.
P.S. «Alatau aqparat» ج ش س مەدياحولدينگى «جاس قانات – 2023» ءان بايقاۋىنا سىيلىق ۇسىنعان سەرىكتەستەرىمىز – DREAM MOMENTS دۇكەنىنە جانە FITNESS BLITZ فيتنەس كلۋبتار جەلىسىنە شىن جۇرەكتەن العىس بىلدىرەدى!