وتاندىق كءاءسىپورىندار 400-دەن استام كوللەدجدى ءوز قامقورلىعىنا الدى
«ءىرى بيزنەستەر كوللەدجدەردى قامقورلىققا الىپ، جاستار نەگە ولاردان تءاجىريبە الماسقا، زەرتحانالار مەن شەبەرحانالاردى نەگە جابدىقتاماسقا؟ بۇل باعىتتا جۇمىس ىستەپ جاتقان جەكەلەگەن كورپوراسيالاردىڭ بار ەكەندىگىن بىلەمىن. دەگەنمەن، مۇنى جاپپاي جولعا قويۋ كەرەك».
ق ر پرەزيدەنتى قاسىم-جومارت توقايەۆ.
مەملەكەت باسشىسى قاسىم- جومارت توقايەۆ تەحنيكالىق جانە كاسىبي ءبىلىم بەرەتىن وقۋ ورىندارىنىڭ ەڭبەك نارىعىنداعى ناقتى سۇرانىسىنا بەيىمدەلۋى جانە ەلىمىزدىڭ جاڭا ەكونوميكالىق باعدارىنىڭ مىندەتتەرىنە ساي بولۋى كەرەك ەكەنىن ۇنەمى ايتىپ وتىرادى. وسى سالانى ودان ءارى دامىتۋ ءۇشىن ناقتى تاپسىرمالار بەرگەن ەدى. ەل پرەزيدەنتى جۇكتەگەن تاپسىرمالاردىڭ ءبىرى – ءىرى بيزنەستىڭ كوللەدجدەردى قامقورلىعىنا الىپ، قولداۋ كورسەتۋى تۇرعىسىندا بولعاندىقتان، ءقازىر بۇل باستاما بىردەن جۇزەگە اسىپ جاتىر. ماسەلەن، تاپسىرماعا سايكەس، بۇگىندە ەلىمىزدىڭ 498 كاسىپورنى 410 كوللەدجدى ءوز قامقورلىعىنا الدى. سونىمەن قاتار، اتالمىش كاسىپورىن وكىلدەرى قامقورشىلىق كەڭەستىڭ قۇرامىنا كىرىپ، كوللەدجدەردەگى وزەكتى ماسەلەلەردىڭ تىكەلەي شەشىلۋىنە مۇرىندىق بولىپ وتىر.
ءدال قازىرگى كەزدە پرەزيدەنت تاپسىرماسىنا ساي ەلىمىزدەگى بارلىق كوللەدجدەر ستۋدەنتتەردى تاجىريبەدەن، پەداگوگتاردى تاعىلىمدامادان وتكىزۋگە كىرىسىپ تە كەتتى. بۇگىنگە دەيىن 300 مىڭنان استام ستۋدەنت پەن 5 مىڭنان استام پەداگوگ كاسىپورىندار بازاسىندا تاجىريبە جيناپ، تاعىلىمدامادان ءوتتى. جالپى، وسى جوبانى قولعا الماس بۇرىن ەڭ الدىمەن كوللەدجدەردى ءوز قامقورلىعىنا الاتىن ءىرى كاسىپورىنداردىڭ تىزبەسى جاسالعان ەدى. سوسىن مەملەكەت باسشىسى ەلىمىزدىڭ ءىرى بيزنەس وكىلدەرىمەن كەزدەسكەن كەزدە وسى باستامانى كوتەرىپ، كاسىپورىنداردى ارناۋلى وقۋ ورىندارىن قامقورلىققا الۋعا شاقىردى. ءوز سوزىندە مەملەكەت باسشىسى تەحنيكالىق ماماندىقتار بويىنشا بىلىكتى مامانداردىڭ جوقتىعىنا شاعىمداناتىن بيزنەس وكىلدەرىنە قاراتا: «ءىرى بيزنەستەر كوللەدجدەردى قامقورلىققا الىپ، جاستار نەگە ولاردان تاجىريبە الماسقا، زەرتحانالار مەن شەبەرحانالاردى نەگە جابدىقتاماسقا؟ بۇل باعىتتا جۇمىس ىستەپ جاتقان جەكەلەگەن كورپوراسيالاردىڭ بار ەكەندىگىن بىلەمىن. دەگەنمەن، مۇنى جاپپاي جولعا قويۋ كەرەك»، – دەگەن ەدى.
ارينە، كوپ ۇزاماي بۇل باستاما كاسىپورىن وكىلدەرى تاراپىنان قىزۋ قولداۋ تاۋىپ، ەلىمىزدەگى كوللەدجدەر كاسىپورىنداردان قوسىمشا 10 مىڭ مامان دايارلاۋعا تاپسىرىس الدى. قازىرگى تاڭدا بۇل جۇمىستاردى وقۋ اعارتۋ مينيسترلىگى تىكەلەي نازارىندا ۇستاپ وتىر. مينيسترلىك جەرگىلىكتى اكىمشىلىكتەرمەن بىرلەسىپ، كاسىپورىنداردىڭ تاپسىرىسى بويىنشا كادرلاردى ماقساتتى دايارلاۋدى جالعاستىرىپ جاتىر. بۇل تۇرعىدا كاسىپورىندار كوللەدجبەن ماقساتتى مامان دايارلاۋ تۋرالى شارت جاساسىپ، ولاردىڭ تاعىلىمدامادان ءوتۋىن ۇيىمداستىرۋ جانە تۇلەكتەردى ودان ءارى جۇمىسقا ورنالاستىرۋ بويىنشا مىندەتتەمەنى ءوز موينىنا الدى. سونىمەن قاتار، قازىرگى كەزدە ءبىلىم بەرۋ باعدارلاماسى جۇمىس بەءرۋشىنىڭ تالابىنا ساي جاڭارتىلىپ، دۋالدى وقىتۋ ماسەلەسى دە جۇيەلى تۇردە قولعا الىنۋدا.
ءوز كەزەگىندە بۇل كوللەدج تۇلەكتەرىنىڭ جۇمىسپەن قامتىلۋىنا ءوز ىقپالىن تيگىزەتىنىن ۋاقىت دالەلدەپ بەردى. دۋالدى وقىتۋدىڭ ناتيجەسىندە تۇلەكتەر كاسىپورىنداردا 100% جۇمىسقا ورنالاسۋ مۇمكىندىگىنە يە بولىپ وتىر. وسى جىلعى وقۋ جىلىندا كاسىپورىنداردىڭ تاپسىرىسى بويىنشا 10 مىڭ ستۋدەنت قابىلدانسا، كەلەسى وقۋ جىلىندا قوسىمشا 10 مىڭ تۇلەكتى قابىلداۋ جوسپارلانىپ وتىر. بيىلعى جىلدىڭ تاعى ءبىر جاڭالىعى – كوللەدج تۇلەكتەرىنە ديپلوممەن قاتار، مامان رەتىندەگى بىلىكتىلىگى دەڭگەيىن انىقتايتىن كارتا بەرىلەتىن بولدى.
سونىمەن قاتار، بيىلعى جىلى تەگىن تەحنيكالىق جانە كاسىپتىك بىلىممەن قامتي ءتۇسۋ ماقساتىندا مەملەكەتتىك تاپسىرىستىڭ كولەمى 50 مىڭعا ۇلعايىپ وتىر. مۇنىڭ ءوزى مەملەكەت تاراپىنان جاستاردىڭ قانداي دا ءبىر ماماندىق يەسى بولۋىنا جاسالىپ وتىرعان جاعداي. وسىلايشا مەملەكەت باسشىسىنىڭ تاپسىرماسىنا سايكەس سۇرانىسقا يە ماماندىقتار بويىنشا تەگىن تەحنيكالىق جانە كاسىپتىك بىلىممەن 100% قامتۋ جۇمىسى جالعاسىپ، مەملەكەتتىك تاپسىرىس 50 مىڭ ورىنعا ارتىپ وتىر. ەگەر كوللەدج تۇلەكتەرى ۋنيۆەرسيتەتكە ءتۇسىپ، ءبىلىمىن جالعاستىرعىسى كەلسە، وندا تەك ەكى پاننەن عانا ۇبت تاپسىرادى. ءوز ماماندىعى بويىنشا ءبىلىم الۋدى جالعاستىرعىسى كەلەتىن كوللەدج ستۋدەنتتەرى 60 سۇراقتان تۇراتىن قىسقارتىلعان ۇبت تاپسىرادى.
جالپى، «ءبىلىم تۋرالى» زاڭعا وزگەرتۋلەر مەن تولىقتىرۋلار ەنگىزىلىپ، كوللەدجدەرگە قابىلداۋ كۆوتاسى قايتا قارالعان ەدى. ماسەلەن، كوپبالالى وتباسى بالالارىنا 5%، تولىق ەمەس وتباسى بالالارىنا 1%، مۇمكىندىگى شەكتەۋلى بالالارى بار وتباسى بالالارىنا 1% گرانت بولىنەدى. تەگىن تەحنيكالىق جانە كاسىپتىك بىلىممەن ەڭ الدىمەن، الەۋمەتتىك از قامتىلعان وتباسىلاردىڭ بالالارى قامتىلادى. مۇنىڭ ءوزى ەداۋىر كومەك. بيىلدان باستاپ مەملەكەتتىك تاپسىرىسقا ساي تەحنيكالىق ماماندىقتار بويىنشا كادرلار دايارلاۋدىڭ دا سانى ارتا ءتۇستى. مەتاللۋرگيا، IT، قۇرىلىس، ينجەنەريا، قىزمەت كورسەتۋ سالالارىنا باسىمدىق بەرىلىپ، تەحنيكالىق ماماندىقتار بويىنشا قابىلدانعان ستۋدەنتتەردىڭ ۇلەسى 50 پايىزعا ارتتى. مەملەكەت باسشىسىنىڭ تاپسىرماسى بويىنشا كوللەدجدەرگە اكادەميالىق دەربەستىك بەرىلدى. ەڭبەك نارىعىنىڭ جىلدام دامۋىن ەسكەرسەك، اتالعان شارا ءبىلىم بەرۋ باعدارلامالارىنىڭ مازمۇنىن ۋاقىتىلى جاڭارتۋعا مۇمكىندىك بەرىپ وتىر. وسىلايشا، ەلىمىزدىڭ كوللەدجدەرى جۇمىس بەرۋشىلەرمەن بىرلەسىپ ءبىلىم بەرۋ باعدارلامالارىنىڭ مازمۇنى مەن وقۋ مەرزىمىن دەربەس ايقىنداۋعا مۇمكىندىك الدى. ەڭ باستىسى، جاس ماماننىڭ جۇمىسقا ورنالاسۋىنا كەپىلدىك بەرىلگەنى بولىپ وتىر.