الماتىدا «قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعىنىڭ» ۇيتقى بولۋىمەن جاس پەداگوگتەردىڭ «جاس كەلسە ىسكە...» اتتى سلەتى ءوتتى. جالپى، بۇل سلەت 2019 جىلدان بەرى وتكىزىلىپ كەلەدى. بۇعان قوسا، اتالمىش ورتالىق جانىنان اشىلعان قالامىزداعى «جاس پەداگوگتەر مەكتەبى» دە ءوز جۇمىسىن جانداندىرىپ، «ءوز جۇلدىزىڭدى جاق» دەپ اتالاتىن قالالىق بايقاۋدى وتكىزۋدى داستۇرگە اينالدىرىپ وتىر. بۇل بايقاۋدىڭ ەرەكشەلىگى جەڭىمپاز بولعان جاس مامان «جاڭا مەكتەپكە – جاڭاشىل ۇستاز» اتتى رەسپۋبليكالىق بايقاۋعا قاتىسا الادى.
سونىمەن، كەزەكتى V سلەت الاتاۋ اۋداندىق وقۋشىلاردىڭ يننوۆاسيالىق شىعارماشىلىق ورتالىعىندا ءوتىپ، وعان 600-دەن اسا مەكتەپكە دەيىنگى مەكەمە، ورتا ءبىلىم بەرۋ ۇيىمدارىنان جانە كوللەدجدەردىڭ پەداگوگيكالىق 3 جىلعا دەيىنگى ءوتىلى بار جاس ماماندارى قاتىستى.
سلەت بارىسىندا جاس ماماندار ءوزارا تاجىريبە الماسىپ، شەبەرلىك سىنىپتارىنا قاتىستى. سونىمەن قاتار، «ءوز جۇلدىزىڭدى جاق-2024» بايقاۋىنىڭ 21 جەڭىمپازى مەن ولاردىڭ تالىمگەرلەرى ءبىلىم باسقارماسىنىڭ، قالالىق «ۇستاز» جەرگىلىكتى كاسىپتىك وداعىنىڭ العىس حاتتارىمەن ماراپاتتالدى.