ەلىمىزدە جەتىم بالالاردى قابىلدايتىن كاسىبي وتباسى ينستيتۋتى ەنگىزىلەدى.
وقۋ-اعارتۋ ۆيسە-مينيسترى ەدىل وسپان اتا-انانىڭ قاراۋىنسىز، تۇرمىستىق قيىن جاعدايدا قالعان بالالاردى قابىلداۋشى وتباسى ينستيتۋتىن زاڭعا ەنگىزۋ ماسەلەسىن ءتۇسىندىردى، دەپ حابارلايدى aqshamnews.kz
«بالالار وسىنداي جاعدايعا تاپ كەلگەن كەزدە ولار بالالاردى قولداۋ ورتالىقتارىنا، ياعني، ينتەرناتتارعا ورنالاستىرىلادى. قانداي دا ءبىر وتباسىدا ءومىر سۇرگەن بالا ءۇشىن بۇل سترەسس. سوندىقتان زاڭ جوباسى ارقىلى ارنايى دايىندىقتان وتكەن، اككرەديتاسيادان وتكەن وتباسىلار تاڭدالىپ، بالالار سولارعا ۋاقىتشا ورنالاستىرىلادى. بۇل وتباسىلار 24/7 رەجيمىندە جۇمىس ىستەيدى، ياعني كەز كەلگەن ۋاقىتتا وسىنداي جاعداي بولا قالعان جاعدايدا بالالاردى قابىلداۋعا، ولارعا وتباسىلىق قامقورلىق كورسەتۋگە دايىن بولۋعا ءتيىس»، - دەيدى ەدىل وسپان.
ونىڭ سوزىنشە، قابىلداۋشى وتباسىلارعا تۇسكەننەن كەيىن ءبىرىنشى كەزەكتە بالالاردى ءارى قاراي ءوزىنىڭ تۇراقتى وتباسىنا ورنالاستىرۋ مەحانيزمدەرى جۇمىس ىستەيدى. ياعني، بالالاردى قابىلداپ الاتىن اتا-اناسىنىڭ جاقىن تۋىستارى ىزدەستىرىلەدى.
ال زاڭدا جاقىن تۋىستار ءتىزىمى ناقتى كورسەتىلگەن. ولار: اتاسى، اجەسى جانە اتا-اناسىنىڭ تۋعان باۋىرلارى مەن اپا-قارىنداستارى. مۇنداعى نەگىزگى ساياسات – اتا-اناسىنىڭ قامقورلىعىنسىز قالعان بالالاردى جاقىن تۋىستارىنا بەرۋ.
«قابىلداۋشى وتباسىلار بويىنشا زاڭ جوباسىن ازىرلەۋ بارىسىندا پيلوت وتكىزدىك. وسى زاڭ جوباسىندا ءبىرقاتار نورما ۇسىنىلىپ وتىر. ءبىرىنشى، مۇنداي وتباسىلاردى پسيحولوگيالىق دياگنوستيكادان وتكىزۋ. ودان كەيىن ولاردى وقىتۋ، اككرەديتاسيادان وتكىزۋ. مۇنداي شارانى اقمولا وبلىسىندا وتكىزدىك. ءقازىر وسى تاسىلمەن 4 وتباسى جۇمىس ىستەپ جاتىر. ولار بالا قابىلداۋعا دايىن، تاجىريبەلى، بالالارمەن جۇمىس ىستەۋگە ماشىقتانعان وتباسىلار»، - دەيدى ول.
ۆيسە-مينيستردىڭ سوزىنشە، زاڭ جوباسى قابىلدانعان جاعدايدا بۇل نورما زاڭدى كۇشىنە ەنگەنشە 6 اي ۋاقىت كەرەك. جەرگىلىكتى اكىمدىكتەر وسى ارالىقتا زاڭنامادا بەلگىلەنگەن تارتىپكە سايكەس، قابىلداۋشى وتابسىلاردى دايىندايدى. وسىلايشا نورما كەزەڭ-كەزەڭىمەن ەنگىزىلەدى.