بولاشاق وتان قورعاۋشىلار – ەلىمىزدىڭ وسكەلەڭ ۇرپاقتارىن پاتريوتتىق رۋحقا تاربيەلەۋ ءۇشىن اتقارىلىپ جاتقان اۋقىمدى جۇمىستار ۇشان-تەڭىز.
اتاپ ايتساق، شەكارا ايماقتارىنداعى مەكتەپتەردە اسكەري-پاتريوتتىق كلۋبتار مەن اسكەري سىنىپتار اشىپ، جاس كادەتتەردىڭ باستاپقى اسكەري دايارلىقتارىن شىڭداۋعا كىرىسكەن شەكاراشىلاردىڭ بۇل ەڭبەكتەرى ەش كەتپەگەنىن ايتۋىمىز كەرەك.
بۇگىنگە دەيىن ۇقك شەكارا قىزمەتى الماتى وبلىسى بويىنشا دەپارتامەنتىنىڭ جانىنان اشىلعان «جاس شەكاراشى» اسكەري-پاتريوتتىق كلۋبىنىڭ كادەتتەرى رەسپۋبليكالىق، حالىقارالىق دەڭگەيدەگى سايىستارعا قاتىسىپ، جۇلدەسىز ورالعان كۇندەرى جوق. بۇدان بولەك، باقىتجان پەرىمبەتوۆ باسقاراتىن كلۋبتىڭ كادەتتەرى دەپارتامەنت اياسىندا وتەتىن شارالارعا بەلسەنە اتسالىسقاندارى، ولاردىڭ تاۋعا جاساعان جورىقتارى جايىندا ۆەدومستۆولىق گازەت بەتىندە از جازىلعان جوق. ەندى مىنە، وسىناۋ العاشقى قارلىعاشتاردىڭ كلۋبىن جاڭا اسكەري سىنىپ تولىقتىرعان...
بۇل – قاراساي اۋدانى بويىنشا شەكارا باسقارماسىنىڭ ۋچاسكەسىندەگى قىرعاۋىلدى اۋىلىنىڭ ك. ۋشينسكيي اتىنداعى ورتا مەكتەبىندە اشىلعان «جاس سارباز» اسكەري-پاتريوتتىق سىنىبى. دەپارتامەنت باستىعى پولكوۆنيك ءا. كايۋپوۆتىڭ تىكەلەي قولداۋىمەن، قىركۇيەكتىڭ باسىندا القىزىل لەنتاسى قيىلعان سۋ جاڭا سىنىپتىڭ 20-دان استام وقۋشىسى بۇگىن ماڭىزدى وقيعانىڭ كۋاسىنە اينالدى. ويتكەنى، وسى ساتتەن باستاپ، ولار تولىققاندى كادەتكە اينالاتىن بولادى.
...اتالعان ءبىلىم وشاعىنىڭ باسشىسى س. ايتۋلوۆا باستاپ كەلگەن 8 «ب» سىنىبىنىڭ كادەتتەرىن ۇستەرىنە كيگەن فورمالارى ەرەكشەلەندىرىپ تۇر ەدى. دەگەنمەن، ولاردى «كادەت» دەپ اتاۋعا ءالى ەرتە. ءقازىر شەكارا بولىمشەسى باستىعىنىڭ تاربيە جانە يدەولوگيالىق جۇمىستارى جونىندەگى ورىنباسارى اعا لەيتەنانت ا. تۇراروۆ باستاعان شەكاراشىلاردىڭ الدىندا «كادەتتەر انتىن» قابىلدايدى. ءارى قاراي، وفيسەر ولاردى وسى ساتتەن باستاپ، كادەت بولعانىن ايعاقتايتىن ارنايى سەرتيفيكات تابىستايدى.
ايتۋ كەرەك، ءبىزدىڭ الدىمىزدا كوزدى اشىپ-جۇمعانشا كادەتكە اينالىپ شىعا كەلگەن بالالاردىڭ باقىتتان بال-بۇل جانعان جۇزدەرىن كورۋ ءبىر عانيبەت بولدى. وزدەرىنىڭ دە بۇگىنگى شاراعا ابدەن دايىندالعانى، ولاردىڭ اسكەريلەرگە بارىنشا ۇقساۋعا تىرىسقان قيمىل-قوزعالىستارىنان بايقالىپ تۇر.
تاعى ءبىر قۋانارلىعى، بۇگىن 10 سىنىپتىڭ 5 وقۋشىسى دەپارتامەنت باسشىسىنىڭ اتىنا اسكەري جوعارى ءبىلىم وشاقتارىنا وقۋعا تۇسكىسى كەلەتىندەرى تۋرالى ءوتىنىش قالدىردى. ءارى قاراي، ولاردىڭ قۇجاتتارىن دايىنداۋمەن دەپارتامەنتتىڭ لاۋازىمدى تۇلعالارى اينالىسادى...
وسىلايشا، «ەرلىك ساباعىنىڭ» اشىلۋىمەن انت قابىلداۋ ءراسىمى اياقتالىپ، كادەتتەر سارباز اعالارىمەن بىرگە ەستەلىك سۋرەتكە تۇسكەن سوڭ بولىمشەنىڭ ومىرىمەن تانىسۋعا كىرىستى. الدىمەن، بولىمشەنىڭ جەلكەسىندە تۇرعان شەكارالىق باقىلاۋ مۇناراسىنا كوتەرىلىپ، اينالاعا دۇربىمەن شولۋ جاساپ، وزدەرىن ناعىز شەكاراشى سەزىنگەن كادەتتەر ءارى قاراي ءىز زەردەلەيتىن قالاشىققا باردى. مۇندا اعا لەيتەنانت ارمان تۇراروۆ ولارعا شەكارا بۇزۋشىنىڭ ءىزىن تابۋ ءۇشىن نە ىستەيتىندەرىن قىزىقتى ەتىپ اڭگىمەلەگەن.
بالالاردى شەكاراشىلاردىڭ ەل شەبىندەگى سەنىمدى كومەكشىلەرى – قىزمەتتىك يتتەر دە ءوز تىلدەرىندە «قۋانا» قارسى العان. ءبىر قىزىعى، جاي كەزدەرى ازاماتتىق كيىمدەگى ادامداردى كورە سالىپ، اينالاسىن ازان-قازانعا تولتىرىپ شىعا كەلەتىن يتتەر ءبىزدىڭ جاس دوستارىمىزدىڭ الدىندا موماقان بولا قالعان. سويتسەك، قىزمەتتىك يتتەردى «تىنىشتاندىرعان» بالاقايلاردىڭ ۇستىندەگى فورما كورىنەدى... ءيتپىسىڭ دەگەن!
ءسويتىپ، قازاق-قىرعىز شەكاراسىن كوزدەرىنىڭ قاراشىعىنداي كۇزەتىپ جۇرگەن قاسكەلەڭدىك شەكاراشىلاردىڭ تىنىس-تىرشىلىگىمەن تانىسىپ، ەرەكشە اسەرگە بولەنگەن «جاس سارباز» اسكەري-پاتريوتتىق سىنىبىنىڭ كادەتتەرى شارا سوڭىندا قايتادان ساپقا تۇردى. سوسىن ءبىلىم وشاعىنىڭ باسشىسى ساپۋرا ءالىمحان قىزى وزدەرىن قۇشاق جايا قارسى الىپ، تاماشا كوڭىل-كۇي سىيلاعان شەكاراشىلارعا العىس ايتىپ، قىزمەتتەرىنە ساتتىلىك تىلەدى.
اينالىپ كەلگەندە، وسىنىڭ بارلىعى قاتارىمىزدى جاس پاتريوتتاردىڭ تولىقتىرعانىن بىلدىرەتىن...