مەنىڭ قارسى الدىمدا 450-دەي سارباز ساپ تۇزەپ تۇردى. بۇل – ۇقك شەكارا قىزمەتى الماتى وبلىسى بويىنشا دەپارتامەنتىنە قاراستى قاراساي اۋدانى شەكارا باسقارماسىنىڭ اقجارداعى تەحنيكالىق جانە كاسىبي دايارلىق بولىمىندەگى كورىنىس. قاربالاس. ويتكەنى، شەكاراشىلار ساپىنا الىنعان ساربازدار ءبولىمنىڭ ورتالىق الاڭىندا ساپپەن ءجۇرۋدىڭ قىرلارى مەن سىرلارىن ۇيرەنۋگە كىرىسىپ كەتكەن ەدى.
«ءبىز جانباساق، لاپىلداپ!..» وسىندايدا، ءاربىر ولەڭى وت بولىپ كەلەتىن ماعجان جۇمابايەۆتىڭ جاستارى ەرىكسىز ەسكە تۇسەدى. ال مىنا الاڭداعى ساربازدار شە؟ لاپىلداپ جانۋعا دايىن با؟ سويتسەك، دايىن ەكەن. ءتىپتى، شەكاراعا تاپ بولىپ، شەكاراشى اتانۋ ءۇشىن وزدەرىنە قويىلاتىن تالاپتاردىڭ ۇدەسىنەن شىققاندار جەتكىلىكتى كورىنەدى. مۇندا، تاعى، باۋىرجانشىلار مەكتەبىنىڭ تۇلەگى دە بار. قۋانارلىعى سول، كەشەگى كادەت ءوزىنىڭ اسكەري مەكتەپتەن العان ءبىلىمىن ءوزى سەكىلدى جاس ساربازدارعا ۇيرەتۋگە بەلسەنە كىرىسىپ كەتىپتى. ءبىزدى ءتانتى ەتكەن دە جاس جىگىتتىڭ وسى قادامى ەدى. وسىنىڭ ءوزى بولەك ماقالاعا سۇرانىپ تۇرعاندىقتان، قاتارداعى جاۋىنگەر جانتەمىر جاقسىلىق تۋرالى بولەك قالام تەربەۋدى شەشتىك.
ساپتىق الاڭ. مۇندا اسكەر قاتارىنا بۇرىنىراق الىنعانى بار، كەيىنىرەك كەلگەنى بار، بارلىعى ساپتىق دايىندىققا قاتىستى جاتتىعۋلاردى ورىنداپ جاتىر. قيمىلدارى ءار ءتۇرلى. كومانديرى «وڭعا» دەسە، سولعا بۇرىلعان ساربازداردى كورىپ، باسىمىزدى ەرىكسىز شايقادىق...
دەسەك تە، بۇل ۋاقىتشا كورىنىس ەكەنىن بىلەمىز. ءدال ءقازىر الاڭدا تۇرعان ساربازدار ەندى ءبىر ايدان كەيىن مۇلدە تانىماستاي بولىپ وزگەرەتىنىنە، بۇيرىقسىز قوزعالمايتىن ناعىز شەكاراشىعا اينالاتىنىنا سەنىمىمىز كامىل.
التى نەمەسە توعىز ايدان كەيىن ولاردىڭ اراسىنان سۋىرىلىپ شىعىپ، كەلىسىمشارتتىق اسكەري قىزمەتشى، وتاندىق نەمەسە شەتەلدىك اسكەري جوعارى وقۋ ورىندارىنىڭ كۋرسانتى بولىپ شىعاتىندارى دا عاجاپ ەمەس.
تەك، مۇنى ۋاقىت كورسەتەدى. ال ءقازىر ولار دا: «بىلسەم، كورسەم، ۇيرەنسەم» دەگەن جالعىز-اق تىلەك بار.
بۇل تۋرالى قاراساي اۋدانى بويىنشا شەكارا باسقارماسى باستىعىنىڭ ورىنباسارى – ءبولىم باستىعى پودپولكوۆنيك ساعادات اۋەزوۆ بىزگە بەرگەن سۇحباتىندا بىلاي دەيدى:
– بۇگىنگە دەيىن ءبىز 500-گە جۋىق اسكەرگە شاقىرىلۋشىنى قارسى الىپ، ابدەن ۇيرەنشىكتى بولعان مىندەتىمىزگە كىرىسىپ كەتتىك. جىگىتتەردىڭ اراسىندا سپورتشى، جوعارى نەمەسە ارنايى ورتا بىلىمدىلەر از ەمەس. اقىل توقتاتقان، سابىرلى. ۇيرەتكەن نارسەنى تەز قاعىپ الۋعا تىرىسىپ تۇرادى. ءبىز دە ءوز كەزەگىندە ولارمەن اڭگىمە وتكىزىپ، ازاماتتىق بورىشتارىن وتەگەن سوڭ وزدەرىنە بەرىلەتىن مۇمكىندىكتەر تۋرالى ايتىپ، جولدارىن تۇسىندىرۋگە تىرىسامىز. كۇنى كەشە عانا دەپارتامەنت باستىعىنىڭ ورىنباسارى پولكوۆنيك ا. مۇنالبايەۆ وسىندا كەلىپ، ساربازدارمەن اڭگىمەلەستى. اسكەري ءومىردىڭ قاتال ءتارتىبىن ءتۇسىندىردى. وقۋعا تۇسۋگە شاقىردى. قالا بەردى، شەكارا باسقارماسىنىڭ ايەلدەر كەڭەسى دە بىزگە ءجيى كەلىپ، جەكە قۇراممەن جەكە جۇمىس ىستەۋدە.
وسىلايشا، جىلداعى داستۇرمەن، «ءبىر جەڭنەن باس، ءبىر جاعادان قول شىعارساق»، ۇتىلماسىمىز انىق.
ءيا، ساردار دۇرىس ايتىپ تۇر ەدى. ناعىز اسكەري ورتا جاس ساربازدارعا قۇشاعىن اشتى. ەندىگى مىندەت ايقىن. «كۇز-2024» شاقىرىلىمى دايىندىقتان ءوتىپ، شەكاراشىلىق شەبەرلىكتەرىن شىڭداعان سوڭ ءبىر-بىر ماماندىق يەلەرى اتانىپ، شەكاراعا اتتانادى. بۇل ءۇشىن ولار بارىنە شىداۋعا بار!