ەكى ەل باسشىلارىنىڭ اڭگىمەسى ءداستۇرلى دوستىق رۋحىندا ءوتتى.
اڭگىمە باسىندا قاسىم-جومارت توقايەۆ پەن رەجەپ تاييپ ەردوعان ءبىرىن-بىرى قاسيەتتى رامازان ايىنىڭ باستالۋىمەن قۇتتىقتادى، دەپ حابارلايدى Almaty-akshamy.kz اقوردا سايتىنا سىلتەمە جاساپ.
بيىل ناۋرىز ايىندا قازاقستان مەن تۇركيا ەكى ەل اراسىنداعى ديپلوماتيالىق قاتىناستاردىڭ 30 جىلدىعىن اتاپ ءوتتى. پرەزيدەنتتەر ساۋدا-ەكونوميكالىق بايلانىستاردىڭ دامۋ قارقىنىن وڭ باعالادى. قاسىم-جومارت توقايەۆ ەكىجاقتى ساۋدا-ساتتىق كولەمىن 5 ميلليارد دوللارعا دەيىن، سودان كەيىن كەلەشەكتە 10 ميلليارد دوللارعا دەيىن ارتتىرۋدىڭ ماڭىزدى ەكەنىن ايتتى.
تۇركيا كوشباسشىسى قازاقستان پرەزيدەنتىنىڭ مامىر ايىندا انكاراعا جوسپارلاعان مەملەكەتتىك ساپارى ەكى ەل اراسىنداعى كوپجاقتى قاتىناستاردىڭ دامۋىنا تىڭ سەرپىن بەرەدى دەپ ۇمىتتەنەتىنىن جەتكىزدى.
سونىمەن قاتار مەملەكەتتەر باسشىلارى حالىقارالىق جانە ايماقتىق كۇن تارتىبىندەگى وزەكتى ماسەلەلەر جونىندە دە جان-جاقتى پىكىر الماستى. قاسىم-جومارت توقايەۆ رەجەپ تاييپ ەردوعاننىڭ ۋكرايناداعى جاعدايدى بەيبىت جولمەن رەتتەۋ جونىندەگى بىتىمگەرلىك كۇش-جىگەرىنىڭ تيىمدىلىگىن جوعارى باعالادى.