الماتىدا ارحيۆتانۋ جانە ءىس جۇرگىزۋ بويىنشا VII رەسپۋبليكالىق ستۋدەنتتىك وليمپيادا ءوتتى.
قازاقستان رەسپۋبليكاسى پرەزيدەنتىنىڭ ءارحيۆى ءال-فارابي اتىنداعى قازاق ۇلتتىق ۋنيۆەرسيتەتىمەن بىرلەسە ارحيۆتانۋ جانە ءىس جۇرگىزۋ بويىنشا VII رەسپۋبليكالىق ستۋدەنتتىك وليمپياداسىن وتكىزدى. ءىس-شارا ق ر «ۇلتتىق ارحيۆ قورى جانە ارحيۆتەر تۋرالى» زاڭىنىڭ 25 جىلدىعىنا وراي «تاريحي قۇجات – ۇرپاققا امانات» ارحيۆتىك مارافونىنىڭ اياسىندا ۇيىمداستىرىلدى.
قازاقستان رەسپۋبليكاسى پرەزيدەنتىنىڭ ءارحيۆى اتالمىش وليمپيادانى بيىل جەتىنشى جىل وتكىزدى. وليمپيادانىڭ ماقساتى – ستۋدەنتتەردىڭ عىلىمعا ىنتاسىن ارتتىرۋ، ۇلتتىق ارحيۆ قورىنىڭ قۇجاتتارىن ايگىلەۋ، ارحيۆ ءىسى مەن قۇجاتتانۋدى ناسيحاتتاۋ، ارحيۆ ماماندىعىنىڭ مارتەبەسىن كوتەرۋ، جالپى ارحيۆ ءىسى جانە قۇجاتتانۋدى دامىتۋ.
«اتالعان وليمپيادانى ق ر پرەزيدەنتىنىڭ ءارحيۆى ءال-فارابي اتىنداعى قازاق ۇلتتىق ۋنيۆەرسيتەتىمەن بىرگە 2016 جىلدان باستاپ وتكىزىپ كەلەدى. ءداستۇرلى تۇردە بۇل شاراعا رەسپۋبليكانىڭ جوعارعى وقۋ ورىندارى مەن كوللەدج ستۋدەنتتەرى قاتىسادى.
بۇگىنگى تاڭدا قوعامنىڭ تۇراقتى دامۋى جاعدايىنداعى مەملەكەتتىك قىزمەتتەرگە سيفرلىق تەحنولوگيالاردىڭ ەنگىزىلۋى، اقپاراتتىق-كوممۋنيكاسيالىق تەحنولوگيالاردىڭ ءرولىنىڭ ارتۋى ارحيۆتەردىڭ الدىنا جاڭا مىندەتتەردى بەلگىلەيدى. مەملەكەت تاراپىنان ەلىمىزدەگى ارحيۆ سالاسىن دامىتۋ بويىنشا بەلگىلەنگەن مىندەتتەردى جۇزەگە اسىرۋ ءۇشىن ءبىرىنشى كەزەكتە جوعارى بىلىكتى ماماندار قاجەت»، – دەپ ءىس-شارانىڭ العىسوزىندە ق ر پرەزيدەنت ءارحيۆىنىڭ ديرەكتورى ءاليا مۇستافينا اتاپ ءوتتى.
وليمپيادا ەكى كەزەڭ بويىنشا وتكىزىلدى: ءبىرىنشى – «كرەاتيۆتى ءارحيۆشى» تاقىرىبىندا شىعارماشىلىق تاپسىرمانى ورىنداۋ؛ ەكىنشى – كوماندالىق عىلىمي جوبالاردى قورعاۋ.
كوماندالىق عىلىمي جوبالار «ارحيۆتەگى سيفرلىق تەحنولوگيالار» جانە «باسقارۋدى قۇجاتتامالىق قامتاماسىز ەتۋ سالاسىنداعى يننوۆاسيالار» تاقىرىپتارىندا بولدى.
ايتا كەتكەن ءجون، ق ر پرەزيدەنت ءارحيۆى ارحيۆتانۋ جانە قۇجاتتانۋ پاندەرىن وقيتىن ستۋدەنتتەردى كاسىبي باعدارلاۋ ماقساتىندا ءبىرقاتار ءىس-شارالار وتكىزىلىپ كەلەدى. ارحيۆتە ستۋدەنتتەر ءۇشىن پراكتيكالىق ساباقتار بولادى. جاس ماماندار ارحيۆ ۇيىمداستىراتىن ءىس-شارالارعا، تاريحي كورمەلەرگە، دوڭگەلەك ۇستەلدەرگە، بەلگىلى عالىمدار مەن تاريحشىلارمەن كەزدەسۋلەرگە قاتىسادى. سونىمەن قاتار ەلىمىزدەگى ءبىرقاتار جوعارى وقۋ ورىندارى مەن ورتا ارناۋلى مەكەمەلەردىڭ ستۋدەنتتەرى مەن ماگيسترانتتارى جىل سايىن ارحيۆتە وندىرىستىك جانە عىلىمي-زەرتتەۋ تاجىريبەسىنەن وتەدى.
