الماتى قالاسى ءبىلىم باسقارماسى «№1 وقۋشىلار ۇيىندە» «ايتىسكەرلەر قاۋىمداستىعى» قۇرىلۋىنا وراي اعىمداعى جىلدىڭ «جاس اقىندار ءمۇشايراسى» ءوتتى. ءمۇشايرا وقۋ-اعارتۋ مينيسترلىگىنىڭ «ءتورت توقسان – ءتورت ونەر» جوباسى نەگىزىندە ۇيىمداستىرىلدى.
ءىس-شاراعا اقىن قۋانىش قولقا، «دارىن» مەملەكەتتىك جاستار سىيلىعىنىڭ يەگەرى سىرىم اۋەزحان، «Jiger» فيزيكا-ماتەماتيكا مەكتەبىنىڭ قازاق ءتىلى ادەبيەتى ءپانىنىڭ ءمۇعالىمى ۇلاربەك جەڭىسبەك ۇلى، جاس ايتىسكەر اقىن بەكسۇلتان دارىن جانە ۇستازدار، ونەرلى جاستار، وقۋشىلار، ت.ب. قاتىستى.
«جاس اقىندار ءمۇشايراسىنىڭ» ماقساتى – قازاق حالقىنا عانا ءتان ونەردى، ياعني ايتىستى جاسوسپىرىمدەر اراسىندا جانداندىرىپ، وقۋشىلاردىڭ ايتىس ونەرىنە دەگەن قىزىعۋشىلىعىن وياتىپ، ءسوز قۇدىرەتىن سەزىنە بىلۋگە ۇيرەتىپ قانا قويماي، ءسوز ساپتاۋعا بەيىم، سۋىرىپسالمالىق قاسيەتى باسىم جاس اقىنداردى قولداۋ جانە ولاردىڭ شىعارماشىلىعىن شىڭداۋ.
مۇشەيرانىڭ نەگىزگى مىندەتتەرى – وقۋشىلاردىڭ قازاق حالقىنىڭ تىلىنە، ادەبيەتىنە، سونىڭ ىشىندە ايتىس ونەرىنە دەگەن قىزىعۋشىلىعىن ارتتىرىپ، ءبىلىمىن كەڭەيتۋ. سونداي-اق، ۇلتتىق رۋحتى كوتەرەتىن ايتىس ونەرىن تەرەڭدەتە ۇيرەنۋگە ىنتالاندىرىپ، جاسوسپىرىمدەردىڭ وزىندىك قابىلەتتەرىن وي ۇشقىرلىعى، قيال جۇيرىكتىگى، ءسوز دالدىگىن جەتىلدىرۋگە جاعداي جاساۋ بولىپ سانالادى.
سونىمەن قاتار ءوز ەلىنە، ءوزىنىڭ وتانىنا ماقتانىش سەزىمىن قالىپتاستىرۋعا، ءبىلىم الۋشىلاردىڭ قازاق حالقىنىڭ تاريحى مەن مادەنيەتىنە دەگەن قىزىعۋشىلىعىن ارتتىرۋعا، اقىنداردىڭ داستۇرلەرىن لايىقتى جالعاستىرۋ ءۇشىن ءوز ۇلەسىن قوسۋعا كەلگەن ءبىرقاتار ايتىسكەر اقىن، ونەرلى جاستار ءوز وي-پىكىرلەرىن ورتاعا سالدى.
«قازاق حالقىنىڭ ءتول ونەرى ايتىستىڭ بالا شىعارماشىلىعى مەن تاربيەسىندەگى ءرولى زور. رۋحاني مۇرالاردى قاستەرلەپ، اۋىز ادەبيەتىنە سۋسىنداپ، العىر دا زەرەك بولۋىنا ىقپالى بار. سوندىقتان، ايتىس ونەرىنىڭ وقۋشىلار اراسىندا ناسيحاتتالىپ، ءىس-شارالاردىڭ وتكىزىلۋى دومبىرانىڭ دا بەدەلىن كوتەرىپ، ءقادىرىنىڭ ارتۋىنا سەپتىگىن تيگىزەدى»، – دەدى ايتىسكەر اقىن سىرىم اۋەزحان.