بۇدان بىلاي كيبەرالاياقتاردىڭ جاسىرىن نومىرلەرى، ورنالاسقان جەرى، پايدالاناتىن موبيلدىك قوسىمشالارى انىقتالادى.
بايلانىس وپەراتورلارىمەن كەلىسىمشارت جاسالدى. ينتەرنەت-الاياقتىقتىڭ الدىن الۋ ءۇشىن، ىشكى ىستەر مينيسترلىگى مەن سيفرلىق دامۋ مينيسترلىگى بىرلەسكەن شارالاردى ىسكە اسىرماق، دەپ حابارلايدى Almaty-akshamy.kz.
«كوبىنە الاياقتار شەتەلدەن بولادى. ولارعا ءوز وتانداستارىمىز كومەكتەسىپ جاتادى»، - دەيدى سيفرلىق دامۋ ءمينيسترى باعدات مۋسين.
ايتا كەتسەك، 2016 جىلى 1000 كيبەرقىلمىس تىركەلسە، بىلتىر 21 مىڭ، ال بيىل جارتى جىلدا 11 763 قىلمىس انىقتالعان.
«بۇعان پاندەميا مەن شەكتەۋ شارالارى جانە ونلاين ساتىپ الۋ اسەر ەتىپ وتىر»، - دەيدى ماماندار. ينتەرنەت-الاياقتاردىڭ كەسىرىنەن 7 ملرد تەڭگە شىعىن كەلىپ، 17 ۇيىمداسقان توپ ۇستالعان.
«ءبىز ءوز تاراپىمىزدان بايلانىس وپەراتورلارىمەن بىرلەسىپ، وسى ماسەلەنى شەشۋ جولدارىن قاراستىرۋ ارقىلى ناتيجەگە قول جەتكىزدىك. قازىرگى كەزدە بايلانىس وپەراتورلارى، ياعني «Kcell»، «تەلە2» تەلەكوممۋنيكاسيا وپەراتورلارىنىڭ اراسىندا تەلەكوممۋنيكاسيا جەلىلەرىندە رۇقسات ەتىلمەگەن قىزمەتتى، ونىڭ ىشىندە الاياقتىق ارەكەتتەردى بولدىرماۋ بويىنشا ىنتىماقتاستىق تۋرالى كەلىسىمگە قول قويىلدى»، - دەيدى ق ر سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين.