جارقىن بولاشاققا نەگىز بولعان ساپار

جارقىن بولاشاققا نەگىز بولعان ساپار Egemen.kz


وتكەن اپتادا مەملەكەت باسشىسى قاسىم-جومارت توقايەۆ ۆلاديمير ءپۋتيننىڭ  شاقىرۋىمەن رەسەي فەدەراسياسىنا جۇمىس ساپارىمەن باردى. بۇل – قازاقستان پرە­زيدەنتىنىڭ وسى ەلگە جاساعان بيىل­عى العاشقى ساپارى. ەكى كۇن­ءنىڭ ىشىندە، ياعني 10-11 اقپان كۇن­دەرى مەملەكەت باسشىسى اۋەلى ءماس­كەۋدە، سودان كەيىن رەسەي­ءدىڭ قارقىندى دامىپ كەلە جاتقان ايماعى – تاتارستان رەسپۋب­لي­كاسىندا بولدى.












ءبىزدىڭ پرەزيدەنتىمىز ۆلاديمير پۋتينمەن ماسكەۋدە جوعارى دەڭگەيدە مازمۇندى، ەڭ باستىسى، تابىستى كەزدەسۋ وتكىزدى. ەكى كوشباسشىنىڭ ايتۋىنشا، 4 ساعاتتان استام ۋاقىتقا سوزىلعان اڭگىمە قازاقستان مەن رەسەي اراسىنداعى كۇن تارتىبىندە تۇرعان قازىرگى وزەكتى ماسەلەلەردى اشىق ءارى ءوزارا سەنىم نەگىزىندە تالقىلاۋعا مۇمكىندىك بەردى.








كەلىسسوز فورماتىنىڭ اشىق بولعانى سونداي پرەزيدەنتتەر الەۋمەتتىك ارا قاشىقتىقتى ساقتاماي، قول الىسىپ، بىر-بىرىمەن ءتوس قاعىستىرىپ امانداستى. وسىدان-اق كەزدەسۋدىڭ جوعارى دەڭگەيدە ۇيىمداستىرىلعانىن بايقاۋعا بولادى. قازىرگىدەي «كوۆيد» كەزىندە  مۇنداي جوعارى دەڭگەيدە قابىلداۋ – سيرەك كەزدەسەتىن جاعداي. يران، فرانسيا سياقتى ەلدەردىڭ پرەزيدەنتتەرىن سالقىن قابىلداپ، ولارمەن ۇلكەن اق ۇستەلدىڭ ەكى باسىندا وتىرىپ كەلىسسوز جۇرگىزدى.


قاسىم-جومارت توقايەۆ پەن ۆلاديمير ءپۋتيننىڭ كەزدەسۋى كرەملدىڭ كاميننىي زالىندا ءوتتى. حاتتاما بويىنشا پرەزي­دەنتتەر ءبىر مەتر ارا قاشىقتىقتا وتىردى. قازاقستان پرەزيدەنتىمەن كەزدەسۋدىڭ ەرەكشە فورماتتا ءوتۋى ەكى ەلدىڭ شىنايى دوستىق قارىم-قاتىناستا ەكەنىن كورسەتەدى. مۇنداي ەرەكشە ءىلتيپاتتى بىلتىر جىل سوڭىندا سانكت-پەتەربۋرگتە وتكەن تمد-عا مۇشە مەملەكەتتەردىڭ سامميتىنەن دە بايقاۋعا بولادى.


ۆلاديمير ۆلاديميروۆيچ پەن قاسىم-جومارت كەمەل ۇلى قالا كوشەلەرىمەن جۇرگەندە ءبىر كولىككە وتىرىپ، مەملەكەتتەر اراسىنداعى ەكىجاقتى قاتىناستاردى تالقىلادى.


ەكى ەل باسشىلارىنىڭ كرەملدە وتكەن كەلىسسوزدەرى ءبىلىم  بەرۋ، سيفرلاندىرۋ، عارىشتى يگەرۋ سالالارى مەن اتوم ەنەرگياسىن بەيبىت ماقساتتا پايدالانۋ باعىتىندا ماماندار دايارلاۋ ءىسى بويىنشا ماڭىزدى كەلىسىمدەر توپتاماسىنا قول قويۋمەن اياقتالدى.


قازاقستاندا رەسەيدىڭ جەتەكشى جو­عارى وقۋ ورىندارىنىڭ فيليالدارى جەلى­­ءسىن كەڭەيتۋ، سونداي-اق ءبىزدىڭ «بولا­شاق» باعدارلاماسى اياسىندا قاجەتتى ماماندار دايارلاۋ جونىندە ماڭىز­دى ۋاع­دالاستىقتارعا قول جەتكىزىلدى. بۇل باعىت بويىنشا الماتىدا ءميفي-دىڭ، اتى­راۋدا گۋبكين اتىنداعى ۋني­ۆەر­سيتەت­ءتىڭ فيليالدارىن اشۋ جۇمىستارى باس­تالىپ تا كەتتى. باۋمان اتىنداعى ءماس­كەۋ مەملەكەتتىك تەحنيكالىق ۋنيۆەر­سي­تە­­تىمەن جانە باسقا دا ءبىرقاتار وقۋ ورنى­­مەن ولاردىڭ وكىلدىكتەرىن اشۋ جايىن­دا كەلىسسوزدەر جۇرگىزىلۋدە. قازاق­ستان­نىڭ «حالىقارالىق باعدارلامالار ورتا­لىعى» اكسيونەرلىك قوعامى رەسەي فەدە­را­سياسىنىڭ ميفي، مفتي، گۋبكين اتىن­داعى رمۋ، باۋمان اتىنداعى ممتۋ، يتمو، ميسيس سياقتى جەتەكشى التى تەح­­نيكالىق ۋنيۆەرسيتەتى مەن «بولا­­شاق» باعدارلاماسى اياسىندا ىنتى­ماق­تاس­تىق ورناتۋ تۋرالى مەموراندۋمعا قول قويدى.


وسى تۇستا اتالعان ماسەلە بويىنشا قاسىم-جومارت كەمەل ۇلىنىڭ اسا پايدالى ۇسىنىسىن قولداعان ۆلاديمير پۋ­ءتيننىڭ ەرەكشە ىقىلاسىن اتاپ وتكەن ءجون.


قازاقستان پرەزيدەنتىنىڭ پىكىرىنشە، وسى يگى باستامالار جاستارىمىزدىڭ وزىق تەحنيكالىق ءبىلىم الۋىنا ءمۇم­كىن­دىك بەرەدى. سونىمەن قاتار قازاقستان رەسپۋب­ليكاسى سيفرلىق دامۋ، يننو­ۆا­سيالار جانە اەروعارىش ونەركاسىبى مينيس­ترلىگى مەن رەسەي فەدەراسياسى سيفرلىق دامۋ، بايلانىس جانە بۇقارالىق كوممۋنيكاسيالار مينيسترلىگى سيفرلاندىرۋ سالاسىندا تاجىريبە الماسۋ تۋرالى مەمو­راندۋمعا قول قويدى. بۇل قۇجات سيفر­لىق دامۋ سالاسىنداعى ىنتى­ماقتاس­تىقتى دامىتۋعا، سونىڭ ىشىندە ەكى ەلدىڭ مەملەكەتتىك قىزمەتشى­لەرىنە قاجەت­ءتى تەحنيكالىق جانە ۇيىمداس­تى­رۋ­شىلىق داعدىلاردى ۇيرەتۋگە باعىتتالعان.


سونداي-اق تاراپتاردىڭ سيفرلىق سالا باسشىلارىن دايارلاۋ باعدارلاماسىن بىرلەسىپ ىسكە اسىرۋ، IT ماماندارىن دايارلاۋ جانە ولاردىڭ بىلىكتىلىگىن ارتتىرۋدىڭ قارقىندى باعدارلاماسىن ىسكە قوسۋ، Astana Hub حالىقارالىق تەحنوپاركى بازاسىندا سيفرلىق ترانسفورماسيا قۇرالدارىن قامتاماسىز ەتۋ جانە قولداۋ جونىندە كەلىسىم جاسالدى. سونىمەن بىرگە ەلدەرىمىزدىڭ سيفرلىق ترانسفورماسياسى اياسىندا جاساندى ينتەللەكت قۇرالدارىن قولدانۋ جانە اۋقىمدى دەرەكتەردى تالداۋ سالاسىندا تاجىريبە الماسۋعا ۋاعدالاستى.


كەلىسسوز «قازاقستان تەمىرجولى» ۇك» اق مەن «ترانسماشحولدينگ» اق اراسىنداعى ىنتىماقتاستىق تۋرالى ماڭىزدى كەلىسىممەن قورىتىندىلاندى.  بۇل قۇجات مانيەۆرلى جانە ماگيسترالدى لوكوموتيۆتەردى، جۇك ۆاگوندارىن جانە رەسەي تەمىرجول ماشينا جاساۋ سالاسىنىڭ باسقا دا ونىمدەرىن جەتكىزۋدى كوزدەيدى.  «ترانسماشحولدينگ» – تەمىر جول ماشيناسىن جاساۋ سالاسىنىڭ ءىرى ءوندىرۋشىسى جانە ۇزاق جىلدان بەرى قازاقستان تەمىر جولىنىڭ نەگىزگى سەرىكتەستەرىنىڭ ءبىرى.


كەزدەسۋ بارىسىندا ۆلاديمير پۋتين رەسەيدىڭ قاسىم-جومارت توقايەۆتى بارىنشا قولدايتىنىن ايتتى.


– ءبىز رەسەي مەن قازاقستاننىڭ ىنتىماقتاستىعى ودان ءارى كەڭەيىپ، ارتا تۇسەتىنىنە سەنىمدىمىز. قازاق­ستان پرەزيدەنتى ءوز ەلىندە ازاماتتار­دىڭ الەۋمەتتىك تۇرعىدان قورعالۋىن قام­تاماسىز ەتۋگە، سىبايلاس جەمقورلىقتى جويۋعا، ەكونوميكانى جاڭعىرتۋعا، ەلدىڭ كۇشتىك قۇرىلىمدارىن نىعايتۋعا باعىت­تالعان ءبىرىنشى كەزەكتەگى شارا­لاردىڭ كەشەندى جوسپارىن ىسكە اسىرا باس­تاي­تىنىن ايتتى. ءبىز قازاقستاندىق ءارىپ­تەستەرىمىزگە بەكىتىلگەن جوسپارلارىنىڭ تابىستى ورىندالۋىنا تىلەكتەسپىز جانە بۇعان جان-جاقتى كومەكتەسۋگە دايىنبىز، – دەدى رەسەي پرەزيدەنتى.


بيىل قازاقستان رەسپۋبليكاسى مەن رەسەي فەدەراسياسى اراسىنداعى قارىم-قاتىناستار تاريحىندا اتاۋلى داتا بار ەكەنىن اتاپ وتكىم كەلەدى. بۇل ەلدە­ءرىمىز اراسىنداعى ديپلوماتيالىق قاتى­ناستاردىڭ 30 جىلدىعى.


وسى ۋاقىت ىشىندە مىزعىماس دوس­تىققا، ورتاق تاريحقا، قازاقستان مەن رەسەي حالىقتارىنىڭ مەنتالدىق تۇرعى­دان جاقىندىعىنا سۇيەنە وتىرىپ، جو­عارى دەڭگەيدەگى باسشىلارىمىز مەم­لەكەتارالىق ۇلگىلى ىنتىماقتاستىق ورناتتى. وسى ىنتىماقتاستىق بارلىق سالا بويىنشا زور جەتىستىك پەن تابىسقا قول جەتكىزدى. ءبىزدىڭ مەملەكەتتەرىمىز ارا­سىنداعى ءوزارا قارىم-قاتىناستار حالىقارالىق قوعامداستىققا ناعىز تاتۋ كورشىلىكتىڭ، سەنىمدى وداقتاستىق پەن ستراتەگيالىق سەرىكتەستىكتىڭ جارقىن ۇلگىسىن كورسەتتى.


قاسىم-جومارت توقايەۆتىڭ رەسەي فەدەراسياسى ۇكىمەتىنىڭ ءتوراعاسى ميحايل ميشۋستينمەن كەزدەسۋى وتە ناتيجەلى بولدى.  بۇل جۇزدەسۋدە ەلدەرىمىز اراسىنداعى ىسكەرلىك سەرىكتەستىكتى ودان ءارى ىلگەرىلەتۋ ماسەلەلەرى تالقىلاندى. پرەزيدەنت بارلىق كۇش-جىگەردى، ەڭ الدىمەن، ساپار بارىسىندا قول جەتكىزىلگەن ۋاعدالاستىقتاردى ىسكە اسىرۋعا جانە ناقتى ناتيجەلەرگە قول جەتكىزۋگە شاقىردى.


ماسكەۋدەگى تابىستى كەلىسسوزدەردەن كەيىن مەملەكەت باسشىسى رەسەي فەدە­راسياسىنداعى جۇمىس ساپارىن تاتارستان رەسپۋبليكاسىندا جالعاستىردى. قاسىم-جومارت كەمەل ۇلى مىڭجىلدىق تاريحىمەن جانە اسا باي مادەني مۇراسىمەن تانىمال قازان قالاسىنا العاش رەت ات باسىن بۇردى.




قازاق پەن تاتار - ەجەلدەن توسكەيدە مالى، توسەكتە باسى قوسىلعان تۋىستاس حالىق. ءبىزدىڭ تاريحىمىز ورتاق، ءدىنىمىز بەن ءتىلىمىز ءبىر. سوناۋ XVI عاسىردىڭ ورتاسىندا يۆان گروزنىي قازاندى باسىپ العانداعى قىرعىن ءبىزدىڭ فولكلورىمىزدا ەرەكشە ءىز قالدىرعان. قازاقتىڭ «شورا باتىر»، «نارىك باتىر» جىرلارىندا وسى شايقاستار باياندالادى. سوندا قازاندى جاۋ قورشادى دەپ اتتانىپ بارا جاتقان قازاقتىڭ باتىرى شورا:


«نارىكتىڭ ۇلى شورامىن،


مەن قازانعا بارامىن.


مەن قازانعا بارعانشا،


قان جاۋماسىن، قار جاۋسىن،


مەن قازانعا بارعان سوڭ،


قار جاۋماسىن، قان جاۋسىن»، – دەپ جىرلاعان ەكەن. «قازان جورىعى» دەپ اتالاتىن كۇي دە بار.


ال تۇتاس ۇلتتى جاڭا ساپاعا كوتەرگەن الاش زيالىلارىنىڭ دا قىزمەتى مەن ءومىرى وسى قازان قالاسىمەن تىكەلەي بايلانىستى. كوبى وسىندا ءبىلىم الىپ، تاتار ارۋلارىنا ۇيلەندى. تاتار اۆتونومياسى مەن الاش اۆتونومياسى ۇنەمى تىزە قوسىپ، بىرگە كۇرەسكەنىن تاريحتان بىلەمىز. قازاقتىڭ العاشقى كىتاپتارى دا وسى قالادا باسىلدى. كورنەكتى الاش قايراتكەرى ءۋاليتحان تاناش ۇلى قازاندا ءومىر ءسۇرىپ، تاتار ۇكىمەتىندە قىزمەت ىستەگەن. دەمەك، تۋىستاس ەكى حالىق ەجەلدەن جۇبىن جازباعان. تاتار اعايىنداردىڭ قازاق حالقىنا دەگەن ايىرىقشا ىقىلاسى عاسىرلار بويى جالعاسىپ كەلەدى.


10 اقپان كۇنى اقشام ۋاقىتىندا بەلگىلى تاتار اقىنى عابدوللا توقاي اتىنداعى تاتارستان استاناسىنىڭ حالىقارالىق اۋەجايىندا قاسىم-جومارت توقايەۆتى رەسپۋبليكا باسشىسى رۋستام ميننيحانوۆ پەن ونىڭ دەلەگاسياسى قارسى الدى. اقىن ەسىمىنىڭ ەلىمىزبەن تىعىز بايلانىستى بولۋىنىڭ دا استارىندا ءبىر سىر بارداي. قۇيرىقتى جۇلدىزداي جارق ەتكەن عابدوللا توقاي نەبارى 26 جاسىنىڭ 12 جىلىن ورال قالاسىندا وتكىزگەن. وسى جەردە تاتار ادەبيەتىنىڭ التىن قورىنا ەنگەن ءبىرقاتار تۋىندىسىن جازىپ ۇلگەردى. ورال قالاسىندا ونىڭ قۇرمەتىنە قويىلعان بيۋست پەن كوشە اتاۋى بار. قازاقستاننىڭ باسقا قالالارىندا، سونىڭ ىشىندە نۇر-سۇلتان، الماتى جانە شىمكەنتتە اقىن عابدوللا توقاي اتىنداعى كوشەلەر بار.


ءبىزدىڭ ساپارىمىز كەزىندە قازاندا قار جاۋعانىمەن، اياز اسا قاتتى بولعان جوق. قالانىڭ كوركى كوز توياتىنداي. قازان – تاريحى تەرەڭ زاماناۋي مەگاپوليس.


مەملەكەت باسشىسىنىڭ تاتارستانعا ساپارى عاسىرلىق تاريحى بار قازان كرەملىنەن باستالدى. قاسىم-جومارت توقايەۆ مۇندا «قۇل شاريف» مەشىتى مەن بلاگوۆەششەنسكيي سوبورىن ارالاپ كوردى. پرەزيدەنت بىر-بىرىنەن قول سوزىم جەردە تۇرعان مۇسىلمان مەشىتى مەن پراۆوسلاۆ شىركەۋىنىڭ ورنالاسۋىن دوستىق سيمۆولى دەپ اتاپ ءوتتى.


قازان كرەملىنىڭ اۋماعىندا پرەزيدەنت سارايى ورنالاسقان. قاسىم-جومارت توقايەۆ پەن رۋستام ميننيحانوۆ وسىندا رەسمي دەلەگاسيالاردىڭ قاتى­سۋىمەن ەكىجاقتى كەزدەسۋ وتكىزدى. قازاق كوشباسشىسىنىڭ رەسپۋبليكاعا ساپارى كەزىندە تاتارستان باسشىسى بىرگە جۇرگەنىن اتاپ وتكەن ءجون. ارالارىندا دوستىق قاتىناستىڭ ورناعانى ايتپاسا دا تۇسىنىكتى. بۇل – ولاردىڭ سوڭعى 10 ايدىڭ ىشىندەگى ءۇشىنشى كەزدەسۋى.


كەزدەسۋ باسىندا پرەزيدەنت مەم­لەكەتتىك تىلدە ءسوز سويلەپ، ديپلوماتيالىق قىزمەتى اياسىندا جانە بۇۇ باس حات­شىسىنىڭ ورىنباسارى لاۋازىمىندا جۇرگەندە التى قۇرىلىقتى ارالاسا دا، قازان قالاسىنا العاش رەت كەلىپ وتىرعانىن ايتتى. «مۇنىم ۇيات بولدى، ءبىراق ەشتەن كەش جاقسى»، - دەپ ازىلدەدى پرەزيدەنت.


وسى كەزدەسۋگە تاتارستانداعى قا­زاق­تاردىڭ ۇلتتىق-مادەني اۆتو­نومياسىنىڭ باسشىسى ساعيت جاقسىبايەۆ تا كەلىپ،  قاسىم-جومارت توقايەۆقا قازاق قاۋىمداستىعىنىڭ قۇرىلۋ تاريحى مەن قىزمەتى جونىندە ايتتى. 1992 جىلى ول تاتارستان حالىقتارى اسسامبلەياسىنىڭ نەگىزىن قالاپ، 2007 جىلعا دەيىن وسى ۇيىمدى باسقاردى. قازىرگى ۋاقىتتا رەسپۋبليكادا 2 مىڭعا جۋىق قازاق تۇرادى، ولاردىڭ باسىم كوپشىلىگى – ستۋدەنتتەر.


كەزدەسۋ بارىسىندا ساۋدا-ەكونو­ميكالىق جانە ينۆەستيسيالىق كووپەراسيانى دامىتۋعا باسا ءمان بەرىلدى. قازاق­ستان مەن تاتارستاندى ەكى حالىق­تىڭ تاريحي تامىرىنىڭ، رۋحاني قۇن­دىلىقتارىنىڭ جاقىن بولۋى عانا ەمەس، بەلسەندى ەكونوميكالىق قاتىناستار دا تىعىز بايلانىستىرادى.


رەسەي سۋبەكتىلەرىنىڭ ىشىندە جە­تەكشى ورىن الاتىن جانە دامۋ قار­قى­نى جىل سايىن ۇدەپ كەلە جاتقان تاتارستاننىڭ قازاقستانمەن اراداعى ىنتىماقتاستىعىنىڭ اۋقىمدى بولۋى وسىنىڭ ايقىن دالەلى.


تاتارستان ەكونوميكاسىنىڭ فلاگمانى بولىپ سانالاتىن «تانەكو» مەن «كاماز» كومپانيالارىن ءوزارا ءىس-قيمىلدىڭ جارقىن مىسالى رەتىندە اتاۋعا بولادى. قازاقستان پرەزيدەنتىنىڭ نيجنەكامسك جانە نابەرەجنىە چەل­نى قالالارىندا ورنالاسقان زاۋىتتاردى ارالاپ كورۋى تاتارستانعا ساپارىنىڭ ەڭ ماڭىزدى بولىگى بولدى. بۇل كورپوراسيالاردىڭ ەلدەرىمىز ارا­سىنداعى ساۋدا-ەكونوميكالىق قاتى­ناستاردىڭ دامۋىنا قوسقان ۇلەسى زور ەكەنى ءسوزسىز. مىسالى، ءقازىر قوستاناي جانە قاراعاندى وبلىستارىندا كاماز اۆتوبولشەكتەرى مەن «تاتنەفت» اۆتوكولىك دوڭگەلەكتەرىن شىعاراتىن زاۋىتتاردى سالۋ بويىنشا ءۇش جوبا بەلسەندى جۇزەگە اسىرىلماق. بۇل كومپانيالاردىڭ قاتىسۋىمەن تاعى دا ءۇش ءىرى جوبا قولعا الىنادى. ءوز كەزەگىندە تاتارستاندا قازاقستاندىق كاپيتالدىڭ قاتىسۋىمەن 40-قا جۋىق بىرلەسكەن كاسىپورىن تابىس­تى جۇمىس ىستەپ جاتىر.  


سونىمەن قاتار قاسىم-جومارت توقايەۆ نيجنەكامسك قالاسىنداعى «تانەكو» كەشەنىن ارالاۋ بارىسىندا «تاتنەفت» كاسىپورنىندا تاعى­لىم­دامادان ءوتىپ جاتقان قازاقستاندىق جاس ماماندارمەن كەزدەستى. جۋىردا «تاتنەفت» كومپانياسى مەن سەمەي قالاسىنىڭ گەولوگيالىق بارلاۋ كوللەدجى اراسىندا ىنتىماقتاستىق تۋرالى كەلىسىمگە قول قويىلدى. ناتيجەسىندە، بيىل­دان باستاپ قازاقستاندىق كوللەدجدىڭ ستۋدەنتتەرى وسى كاسىپورىندا وندىرىستىك تاجىريبەدەن وتەتىن بولدى. وسىنداي كەزدەسۋ نابەرەجنىە چەلنى قالاسىندا دا ءوتتى. «كاماز» كومپانياسىنىڭ زاۋى­تىندا بىلىكتىلىگىن ارتتىرعان قازاق­ستاندىقتار، ەلگە ورالعان سوڭ قوستا­نايداعى وسى كاسىپورىننىڭ زاۋىتىندا جۇمىس ىستەيتىن بولادى.


تاتارستان – رەسەيدىڭ بارلىق جاعىنان دامىعان ايماعى. بۇل رەسپۋب­ليكا ءوزىنىڭ ۇلتتىق ەرەكشەلىگىن ساقتاي وتىرىپ، تەحنولوگيالىق دامۋدا قۋاتتى سەرپىلىس جاساي الدى.


قازان قالاسىندا قازاقستان پرەزي­دەن­ءتىنىڭ قۇرمەتىنە تاتارستان پرەزيدەنتىنىڭ اتىنان سالتاناتتى قابىلداۋ مەن كونسەرت ۇيىمداستىرىلدى. شارا اياسىندا قازاق، تاتار، ورىس حالىق اندەرىمەن قوسا ءشامشى قالداياقوۆ پەن باسقا دا كومپوزيتورلاردىڭ تۋىندىلارى ورىندالدى.


قاسىم-جومارت توقايەۆ ءاربىر ءىسسا­پاردان ەلگە ورالعان سايىن ءداستۇرلى ءتۇر­دە ەل ىشىندەگى جانە شەتەلدىك ساپار­لاردىڭ ناتيجەسى تۋرالى اسەرىمەن بولىسەدى. وسى ساپارعا قاتىستى مەملەكەت باسشىسى رەسەي فەدەراسياسىنا قىسقا مەرزىمدى، ءبىراق وتە مازمۇندى ساپارى­نىڭ ناتيجەسىنە كوڭىلى تولاتىنىن، ونىڭ قازاقستان مەن رەسەي اراسىن­داعى ستراتەگيالىق ارىپتەستىك پەن وداقتاستىقتى ودان ءارى نىعايتۋ تۇرعى­سىنان تابىستى بولعانىن اتاپ ءوتتى. قاسىم-جومارت توقايەۆ رەسەي فەدە­راسياسىنا جاساعان وسى جولعى ساپارى مەن جوعارى دەڭگەيدە وتكەن كەلىسسوزدەرىن قازاقستان مەن رەسەي اراسىندا كەيىنگى جىلدارداعى كەزدەسۋلەردىڭ ىشىندەگى ەڭ ماڭىزدىسى دەپ ەسەپتەيدى. رەسەي پرەزيدەنتى دە وسىنداي كوزقاراستا دەپ ويلايمىن.


Egemen Qazaqstan


 






ءسىزدىڭ رەاكسياڭىز؟
ۇنايدى
0
ۇنامايدى
0
كۇلكىلى
0
شەكتەن شىققان
0
سوڭعى جاڭالىقتار

16:33

16:28

13:27

12:23

12:17

12:15

12:13

12:05

12:03

12:01

11:59

11:57

11:55

11:53

11:51

11:46

11:43

11:41

11:39

11:37

11:34

11:31

11:29

11:26

11:24