جەتىسۋ وڭىرىندە 20 ءبىلىم بەرۋ نىسانى جاڭارتىلادى

بۇعان 10.8 ملرد تەڭگە قاراستىرىلدى.

الماتى وبلىسىندا 20 ءبىلىم بەرۋ نىسانى جاڭارتىلادى، دەپ Almaty-akshamy قازاقپاراتقا سىلتەمە جاساپ.

الماتى وبلىستىق ءبىلىم باسقارماسى وتكەن جىلى اتقارعان جۇمىسىن قورىتىندىلاپ، الداعى جوسپارلارىن جاريالادى.

جالپى وتكەن جىلى، 18 مەكتەپ كۇردەلى جوندەۋدەن وتكەن بولاتىن، بۇعان قازىنادان 8،3 ملرد تەڭگە ءبولىندى.

«2021 جىلى وڭىردەگى 8 مەملەكەتتىك جانە 7 جەكەمەنشىك مەكتەپ ىسكە قوسىلدى. سونداي-اق، ءبىلىم كۇنى قارساڭىندا پانفيلوۆ اۋدانى اققۇدىق اۋىلىندا اپاتتىق مەكتەپتىڭ ورنىنا 120 ورىندىق جاڭا مەكتەپ پايدالانۋعا بەرىلدى. مەكتەپ قۇرىلىسىن جۇرگىزۋدەگى باستى ءماقسات-ۇش اۋىسىمدى وقىتۋدى جويۋ. بۇل ماقساتتا ىلە، قاراساي، تالعار اۋداندارىندا 7 جوبا جوساپارلانىپ، 6-ۋى ەنگىزىلدى. ايتا كەتەيىك، قاراساي اۋدانى ۇشتەرەك اۋىلىنداعى 600 ورىندىق مەكتەپتىڭ قۇرىلىسى كەلىسىمشارتقا سايكەس 2022 جىلدىڭ ناۋرىز ايىندا اياقتالادى دەپ كۇتىلۋدە»،- دەلىنگەن ۆەدومستۆونىڭ حابارلاماسىندا.

بۇگىندە تالدىقورعان مۋزىكا كوللەدجىنە ارنالعان 100 ورىندىق جاتاقحانا قۇرىلىسىنىڭ جۇمىستارى ءجۇرىپ جاتىر، سونىمەن قاتار، قاراتال اۋدانى ۇشتوبە قالاسىنداعى جاڭادان سالىنىپ جاتقان گۋمانيتارلىق كوللەدجگە ارنالعان 30 ورىندىق جاتاقحانا قۇرىلىسىن سالۋ شارتى جاسالۋدا.تالعار اگروبيزنەس جانە مەنەدجمەنت كوللەدجىنىڭ 112 ورىنعا جاتاقحاناسىن رەكونسترۋكسيالاۋ جوسپرالانۋدا.

بيىل الماتى وبلىسىندا 17 مەتكەپ، 2 كوللەدج، 1 بالاباقشا ۇزىن-سانى 20 ءبىلىم بەرۋ نىسانىنا كۇردەلى جوندەۋ جۇرگىزۋ جوسپارلانۋدا، بۇعان 10.8 ملرد تەڭگە قاراستىرىلدى.