استانا قالاسىنىڭ قىلمىستىق ىستەر جونىندەگى اۋدانارالىق سوتى قىلمىستىق جولمەن الىنعان اقشانى زاڭداستىردى جانە اسا ءىرى كولەمدە الاياقتىق جاسادى دەپ ايىپتالعان ەرلى-زايىپتى توتاقانوۆتاردىڭ ءارقايسىسىنا 7 جىلدان باس بوستاندىعىنان ايىرۋ جازاسىن تاعايىندادى، دەپ حابارلايدى اqshamnews.kz ءتىلشىسى.
سوت ماتەريالدارىنا سايكەس، 2020–2024 جىلدارى ەرلى-زايىپتى 2019 جىلى تۋعان، اۋىر دياگنوزدارى بار ۇلىن ەمدەتۋگە قاراجات جينايمىز دەگەن جەلەۋمەن جۇيەلى تۇردە اقشا جيناعان. قاراجات تارتۋ ءۇشىن الەۋمەتتىك جەلىلەردە تارگەتتەلگەن جارناما قولدانىلعان.
سوتتىڭ باسپا ءسوز قىزمەتى ءمالىم ەتكەندەي، تولقىن توتاقانوۆا مەن ونىڭ اناسىنىڭ ەسەپشوتىنا شامامەن 2،2 ملرد تەڭگە تۇسكەن. ونىڭ 1،4 ملرد تەڭگەسى قايىرىمدىلىق رەتىندە اۋدارىلعان. الايدا جينالعان اقشانىڭ ەداۋىر بولىگى بالانىڭ ەمىنە ەمەس، وتباسىنىڭ جەكە قاجەتىنە جۇمسالعان.
ناقتىراق ايتقاندا، سوت انىقتاۋىنشا، بالانى ەمدەۋگە بار بولعانى 6،4 ملن تەڭگە عانا كەتكەن. قالعان قاراجات ەرلى-زايىپتىنىڭ جەكە شىعىندارىنا باعىتتالعان: تارگەت جۇرگىزۋ، قىمبات مۇلىك ساتىپ الۋ، قۇمار ويىن ويناۋ، قارىز جابۋ جانە دەپوزيت جيناۋ.
ءىس ماتەريالدارىندا ولاردىڭ ساتىپ العان مۇلكى دە اتالادى. اتاپ ايتقاندا: جالپى قۇنى 47 ملن تەڭگە بولاتىن ەكى پاتەر، 8 ملن تەڭگەگە جەر ۋچاسكەلەرى، سونداي-اق LEXUS RX 300 (28 ملن تگ)، Hyundai Santa Fe (8،2 ملن تگ)، Toyota Camry 75 (15 ملن تگ) جانە Toyota Land Cruiser Prado 150 (سوماسى ناقتىلانباعان) كولىكتەرى الىنعان.
بۇدان بولەك، برەندكە جانە قۇمار ويىنعا 9،7 ملن تەڭگە، Facebook Ads جارناماسىنا 481 ملن تەڭگە، قارىزداردى وتەۋگە 349،5 ملن تەڭگە جۇمسالعانى كورسەتىلگەن. سونداي-اق دەپوزيتتەن پايىزدىق تابىس العانى دا ايتىلدى.
سوت ولاردىڭ ارەكەتتەرىندە ق ر قك 218-بابىنىڭ 2-بولىگى 1-تارماعىندا كوزدەلگەن قىلمىستىق جولمەن الىنعان قاراجاتتى زاڭداستىرۋ بەلگىلەرى بار ەكەنىن اتاپ ءوتتى.
پروكۋرور ەرلى-زايىپتىنىڭ بىرىنە 6 جىل، ەكىنشىسىنە 4،8 جىل سۇراپ، 10 جىل بويى قايىرىمدىلىقپەن اينالىسۋعا تىيىم سالۋدى تالاپ ەتكەن. الايدا سوت جازانى قاتاڭداتىپ، ءارقايسىسىن 7 جىلعا سوتتادى جانە 10 جىل قايىرىمدىلىقپەن اينالىسۋعا تىيىم سالدى.
كامەلەتكە تولماعان بالاسى بارىن ەسكەرىپ، سوت ايەل ادامنىڭ جازاسىن 2 جىلعا شەگەرگەن. سونداي-اق ۇكىممەن ەرلى-زايىپتىنىڭ بارلىق مۇلكى تاركىلەندى.