بۇگىن اقوردا رەزيدەنسياسىندا اقش ەلشىسى دجۋلي ستاففت پەن بولگاريا ەلشىسى گەورگي ۆودەنسكي قازاقستان پرەزيدەنتىنە سەنىم گراموتالارىن تاپسىردى، دەپ حابارلايدى اqshamnews.kz ءتىلشىسى.
مەملەكەت باسشىسى بولگاريا ەلشىسى ارقىلى پرەزيدەنت رۋمەن راديەۆكە سالەمىن جولداپ، ونىڭ بىلتىر ەلىمىزگە جاساعان رەسمي ساپارى ەكىجاقتى قارىم-قاتىناسقا ايتارلىقتاي تىڭ سەرپىن بەرگەنىن ايتتى.
"ءسىزدىڭ ەلىڭىزبەن ىنتىماقتاستىقتى ودان ءارى نىعايتۋعا مۇددەلىمىز. ساياسي، سونداي-اق ەكونوميكالىق باعىتتاعى ىقپالداستىق اياسىن كەڭەيتۋ ءۇشىن قولدان كەلگەن مۇمكىندىكتىڭ ءبارىن جاسايمىز"، – دەدى توقايەۆ.
قاسىم-جومارت توقايەۆ دجۋلي ستاففتپەن اڭگىمەلەسۋ بارىسىندا اقش-قا جاساعان ساپارى تابىستى وتكەنىن ىقىلاسپەن ەسكە الدى.
"پرەزيدەنت دونالد ترامپ مىرزامەن دوستىق راۋىشتە مازمۇندى اڭگىمە ءوربىتىپ، كەلىسسوزدەر جۇرگىزدىك. تاياۋدا ءبىز تەلەفون ارقىلى ەمەن-جارقىن سويلەسىپ، ەكىجاقتى ىنتىماقتاستىعىمىزعا قاتىستى كوپتەگەن ماسەلەنى تالقىلادىق. مەنى جىل سوڭىندا قۇراما شتاتتاردا وتەتىن G20 سامميتىنە قاتىسۋعا شاقىرعانى ءۇشىن العىس ايتامىن. ءبىز كوپتەگەن سالاداعى ستراتەگيالىق سەرىكتەستىگىمىزدى دامىتىپ، نىعايتۋعا كۇش سالامىز"، – دەدى توقايەۆ.
قاسىم-جومارت توقايەۆ ەلشىلەردى ديپلوماتيالىق ميسسيالارىنىڭ رەسمي تۇردە باستالۋىمەن قۇتتىقتاپ، ولاردىڭ مەملەكەتتەرى باسشىلارىنا ىزگى تىلەگىن جولدادى.