«جاردەم» مەديسينالىق پويىزىنىڭ دارىگەرلەرى ەلىمىزدىڭ شالعاي اۋداندارىنىڭ 40 مىڭنان استام تۇرعىنىنا تەگىن كومەك كورسەتتى

5 اي ىشىندە 140-تان استام جەڭىل حيرۋرگيالىق وتا جاسالدى.

6 قاراشادا قازاقستاننىڭ باتىس جانە وڭتۇستىك وڭىرلەرى بويىنشا جۇرەتىن «جاردەم» مەديسينالىق پويىزى شالعايداعى ستانسيالاردىڭ تۇرعىندارىنا تەگىن مەديسينالىق كومەك كورسەتۋ ءۇشىن الماتىعا كەلدى، دەپ حابارلايدى Almaty-akshamy.kz الماتى قالالىق قوعامدىق دەنساۋلىق ساقتاۋ باسقارماسىنا سىلتەمە جاساپ.

«مەديسينالىق پويىز 79 شالعاي ستانسيادا جۇمىس ايالدامالارىمەن 12 مىڭ شاقىرىمنان استام جول ءجۇردى. 40 مىڭنان استام تۇرعىن تەگىن مەديسينالىق كومەك الدى. پويىز جۇمىس ىستەگەن 5 اي ىشىندە 140-تان استام جەڭىل حيرۋرگيالىق وتا جاسالدى» - دەدى نازگۇل يمانعالييەۆا، قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى.

كومەك سۇراعاندارعا جالپى تاجىريبەلىك دارىگەرلەر، تەراپيەۆت، پەدياتر، حيرۋرگ، ۋرولوگ، نيەۆروپاتولوگ، وفتالمولوگ، لور، اكۋشەر-گينەكولوگ، ستوماتولوگ، پسيحولوگ، دەرماتوۆەنەرولوگ ماماندار كەڭەس بەردى. 13 مىڭنان استام ۋلترادىبىستىق زەرتتەۋلەر جانە 9 مىڭعا جۋىق ەكگ تەكسەرۋلەرى جۇرگىزىلدى.

بۇل جوبانىڭ باستى ماقساتى – ەلىمىزدىڭ شالعايداعى ستانسيالارى مەن جاقىن ورنالاسقان اۋىلدارىنىڭ ساپالى مەديسينالىق كومەككە قولى جەتپەيتىن تۇرعىندارىن تەگىن مەديسينالىق تەكسەرۋدەن وتكىزۋ جانە دياگنوستيكالاۋ.