كونستيتۋسيالىق ءىس جۇرگىزۋدى جۇزەگە اسىرۋ ءتارتىبى ەگجەي-تەگجەيلى رەگلامەنتتەلگەن.
قاڭتار ايىنان باستاپ قازاقستاندا كونستيتۋسيالىق سوت ىسكە قوسىلادى. بۇل تۋرالى ق ر ادىلەت ۆيسە-مينيسترى الما مۇقانوۆا ءمالىم ەتتى، دەپ حابارلايدى Almaty-akshamy.kz.
كونستيتۋسيالىق سوت – بۇل مەملەكەتتىڭ كونستيتۋسيالىق نەگىزدەرىن جانە ادامنىڭ كونستيتۋسيالىق قۇقىقتارىن قورعاۋعا ارنالعان الەمدىك مودەل. قازاقستاندا وسىنداي ينستيتۋتتى قۇرۋ ەلىمىزدىڭ قۇقىق قورعاۋ جۇيەسىن جاڭعىرتۋ ءۇشىن جاڭا مۇمكىندىكتەر اشادى. بۇل تۋرالى ورتالىق كوممۋنيكاسيالار قىزمەتىندە وتكەن بريفينگ بارىسىندا ق ر ادىلەت ۆيسە-مينيسترى الما مۇقانوۆا ءمالىم ەتتى.
«كونستيتۋسيالىق سوتتىڭ قىزمەتى ءۇشىن زاڭنامالىق، قۇقىقتىق نەگىزدى قامتاماسىز ەتۋ، وعان كونستيتۋسيامەن جۇكتەلگەن وكىلەتتىكتەردى ىسكە اسىرۋ ماقساتىندا «قازاقستان رەسپۋبليكاسىنىڭ كونستيتۋسيالىق سوتى تۋرالى» كونستيتۋسيالىق زاڭ قابىلداندى. كونستيتۋسيالىق زاڭ كونستيتۋسيالىق سوتتىڭ جانە ونىڭ سۋديالارىنىڭ مارتەبەسىن، ولاردىڭ وكىلەتتىكتەرىن، كەپىلدىكتەرى مەن قامتاماسىز ەتىلۋىن تولىق اشادى. سونداي-اق كونستيتۋسيالىق ءىس جۇرگىزۋدى جۇزەگە اسىرۋ ءتارتىبى ەگجەي-تەگجەيلى رەگلامەنتتەلگەن. كونستيتۋسيالىق سوت ەلىمىزدىڭ بارلىق اۋماعىندا كونستيتۋسيانىڭ ۇستەمدىگىن قامتاماسىز ەتەتىن ورگان بولىپ تابىلاتىنىن جانە بيلىكتىڭ سوت تارماعىنا جاتپايتىنىن اتاپ وتكىم كەلەدى، ويتكەنى بۇل ماسەلە كونستيتۋسيادا ناقتى شەشىلگەن. بۇل كونستيتۋسيالىق سوت سوت شەشىمدەرىن قايتا قارامايدى نەمەسە كۇشىن جويمايدى دەگەندى بىلدىرەدى. 2023 جىلدىڭ 1 قاڭتارىنان باستاپ كونستيتۋسيالىق سوت ءوز قىزمەتىن باستايدى»، - دەدى سپيكەر.
ونىڭ ايتۋىنشا، رەفورمانىڭ باستى جاڭالىعى – ازاماتتارعا كونستيتۋسيالىق سوتقا تىكەلەي جۇگىنۋ قۇقىعىن بەرۋ بولىپ تابىلادى. بۇرىن مۇنداي مۇمكىندىك قاراستىرىلماعان بولاتىن. ەندى كونستيتۋسيالىق سوت ازاماتتاردىڭ وتىنىشتەرى بويىنشا ولاردىڭ قۇقىقتارى مەن بوستاندىقتارىن تىكەلەي قوزعايتىن نورماتيۆتىك قۇقىقتىق اكتىلەردى كونستيتۋسياعا سايكەستىگىن قارايتىن بولادى. ازاماتتارمەن قاتار، باس پروكۋرور مەن ادام قۇقىقتارى جونىندەگى ۋاكىل كونستيتۋسيالىق سوتقا جۇگىنۋگە قۇقىلى. وسى ەرەجەلەردىڭ بارلىعى كونستيتۋسيالىق زاڭدا ءتيىستى رەتتەۋدى تاپتى.