ولار بۇل ارەكەتىن ەرلىك دەپ سانامايدى.
الماتىداعى قاڭتار وقيعاسى كەزىندە جارالانعان ءتارتىپ ساقشىلارىنا كومەكتەسكەن 19 جاستاعى بويجەتكەن ماراپاتتالدى. ول كوشە بويىنان ءوتىپ بارا جاتىپ لاڭكەستەردىڭ سوققىسىنا ۇشىراعان پوليسەيلەردى بىردەن ءوزىنىڭ كولىگىنە مىنگىزىپ، ءقاۋىپسىز ورىنعا شىعارعان. تەرروريستەردەن تونگەن قاۋىپتەن قورىقپاي، ەرلىككە بارعان قىزدىڭ وقيعاسى كوپكە ۇلگى، دەپ حابارلايدى Almaty-akshamy.kz Almaty.tv سىلتەمە جاساپ.
نازاربايەۆ داڭعىلىنان ءسال تومەن قاراي، ساتپايەۆ كوشەسىمەن قيىلىساتىن تۇس 5 قاڭتار كۇنى لاڭكەستەردىڭ تولىعىمەن تورۋىلداعان مەكەنىنە اينالعان ەدى. ءدال سول كۇنى 19 جاستاعى قىز كولىگىمەن وسى كوشەنىڭ بويىمەن كەلە جاتادى. كەيىننەن ءتارتىپ ساقشىلارىنىڭ نۇسقاۋىمەن كەرى بۇرىلىپتى. "سول ساتتە جول بويىندا جارالانعان پوليسەيلەردى كورىپ، ءوتىپ كەتە المادىم"، - دەيدى كەيىپكەر. جەڭىل كولىكتىڭ ارتقى بولىگىنە بىردەن 4 پوليسەيدى وتىرعىزىپ، ءقاۋىپتى ايماقتان ولاردى امان الىپ شىققان.
پولينا پروسۆيرينا بۇل ارەكەتىن ەرلىك دەپ سانامايدى. نەبارى 19 جاستاعى بويجەتكەن سول كەزدەگى تونگەن قاۋىپكە قاراماستان، باتىلدىق تانىتىپ، ازاماتتىق ۇستانىمنىڭ جارقىن ۇلگىسىن كورسەتتى.
«باستاپقىدا قاتتى قورىقتىم. دەسە دە، تارتىپسىزدىك كەزىندەگى قۇقىق قورعاۋ قىزمەتكەرلەرىنىڭ ەڭبەگى ەرەن. جارالىلاردى كولىگىمە وتىرعىزىپ، اۋرۋحاناعا اپارعىم كەلگەن. ءبىراق ولار ءوز باسشىلارىنىڭ بۇيرىعىمەن اۋرۋحاناعا ەمەس، باسقا مەكەنجايعا اپارۋىمدى سۇرادى. ايتقاندارىن ورىنداپ، دىتتەگەن جەرلەرىنە امان جەتكىزدىم»، - دەدى قالا تۇرعىنى پولينا پروسۆيرينا.
پولينا وقيعا ورنىندا جالعىز بولماعان. جانىندا اناسى دا بولىپتى. جارالانعان ءتارتىپ ساقشىلارىن ءقاۋىپسىز جەرگە الىپ شىعارۋعا ول دا كومەكتەسكەن. ەلىمىزگە تونگەن سىن ساعاتتا كوپكە ۇلگى بولارلىق بۇل ءىسىن قالالىق پوليسيا دەپارتامەنتىنىڭ باسشىسى قانات تايمەردەنوۆ جوعارى باعالاپ، ولاردى ماراپاتتادى.
«ول كەزدە اينالانىڭ ءبارى دۇربەلەڭگە اينالعان كەز. جولدىڭ بويىندا ۋچاسكەلىك پوليسيانىڭ ماشينالارى مەن قىزمەتتىك كولىكتەر كوپ ەدى. قىزىم كولىك تىزگىنىندە بولدى. مەن بىرتىندەپ ءتارتىپ ساقشىلارىن ارتقى ورىندارعا جايعاستىردىم. وسىلايشا، وقيعا ورنىنان تەزىرەك كەتىپ قالدىق»، - دەيدى قالا تۇرعىنى سۆەتلانا پروسۆيرينا.
وقيعا كەزىندە جارالانعان 4 ءتارتىپ ساقشىنىڭ ۇشەۋى جەتىسۋ اۋداندىق پوليسيا باسقارماسىندا ۋچاسكەلىك پوليسيا بولىپ جۇمىس ىستەيدى ەكەن. قىزمەتكە تۇرعاندارىنا دا كوپ ۋاقىت بولماعان. 22-24 جاس ارالىعىنداعى جاس ماماندار. ءبولىم باسشىسى ءقازىر ولاردىڭ جاعدايى ءبىرقالىپتى ەكەنىن، جۇمىستى ءارى قاراي جالعاستىرىپ جاتقانىن ايتتى.
«ارينە، مەملەكەتتىڭ قامقورلىعىنان ەشقانداي قىزمەتكەرىمىز شەت قالعان جوق. مەملەكەتىمىز ءبىزدىڭ كەز كەلگەن جاراقات العان-الماعانى بار، بارىنە بىردەي كومەك بەرىپ جاتىر. ءقازىر ول ءۇش قىزمەتكەرىمىزدىڭ جاعدايلارى قالىپتى، جۇمىستارىن جالعاستىرىپ جاتىر. ول ۇشەۋىنىڭ جاراقاتى اسا اۋىر ەمەس. جەڭىل جاراقات»، - دەدى جەتىسۋ اۋداندىق پوليسيا باسقارماسىنىڭ ءبولىم باستىعى جانعازى سەيىتقازين.
ايتا كەتەيىك، رەسمي مالىمەتكە سايكەس، قاڭتار وقيعاسى كەزىندە الماتىدا 1 مىڭعا جۋىق ادام جارالانىپ، 11 اسكەري قىزمەتكەر قىزمەت بابىندا كوز جۇمعان ەدى. ونىڭ 9-ى – پوليسيا قىزمەتكەرى.