الماتىدا انتيتەررورلىق ءىس-شارا رەجيمى توقتاتىلدى

لاڭكەستىك قاۋىپتىلىكتىڭ «قىزىل» دەڭگەيى جويىلادى.

تەرروريزمگە قارسى كۇرەس جونىندەگى قالالىق جەدەل شتاب الماتىداعى جاعدايدىڭ تۇراقتانعانى تۋرالى ايتتى، دەپ حابارلايدى Almaty-akshamy.kz.

«قالا اۋماعىندا قابىلدانعان قاۋلىعا سايكەس، 2022 جىلعى 26 قاڭتاردا ساعات 00:00-دەن باستاپ لاڭكەستىككە قارسى انتيتەررورلىق ءىس-شارا رەجيمى توقتاتىلىپ، لاڭكەستىك قاۋىپتىلىكتىڭ «قىزىل» دەڭگەيى جويىلادى»، - دەلىنگەن ءىم باسپا ءسوز قىزمەتىنىڭ حابارلاماسىندا.

سول ۋاقىتتان باستاپ لاڭكەستىك قاۋىپتىلىكتىڭ جوعارى «قىزعىلت سارى» دەڭگەيى بەلگىلەنەدى.

ارنايى جانە قۇقىق قورعاۋ ورگاندارى جاپپاي تارتىپسىزدىكتەرگە قاتىسۋشىلار مەن ۇيىمداستىرۋشىلاردى انىقتاۋ بويىنشا جەدەل-ىزدەستىرۋ ءىس-شارالارىن جالعاستىرۋدا.

تەررورلىق ءقاۋىپتىڭ قازىرگى دەڭگەيىندە قۇقىق قورعاۋ ورگاندارىنا قارۋ-جاراق پەن جارىلعىش زاتتاردى انىقتاۋ ماقساتىندا كولىك قۇرالدارىن تىنتۋگە رۇقسات ەتىلگەن.

«قۇقىق قورعاۋ ورگاندارىنىڭ جۇمىسىنا تۇسىنىستىكپەن قاراپ، شىدامدىلىق تانىتىپ، ولاردىڭ زاڭدى تالاپتارىن بۇلجىتپاي ورىنداۋىڭىزدى سۇرايمىز»، - دەلىنگەن ءىم باسپا ءسوز قىزمەتىنىڭ حابارلاماسىندا.