ەستونيانىڭ استاناسى تاللين قالاسىندا وتكەن حالىقارالىق تۋرنيردە الماتىلىقتار كۇمىس جۇلدەگەر اتاندى
الماتى ەستەتيكالىق گيمناستيكا مەكتەبىنىڭ «Sunrise» كومانداسى ەستونيانىڭ استاناسى تاللين قالاسىندا وتكەن حالىقارالىق تۋرنيردە كۇمىس جۇلدەگەر اتاندى. جاسوسپىرىمدەر (14–16 جاس) ساناتىندا سىنعا تۇسكەن قىزدارىمىز 10 كوماندا اراسىندا نامىستى قولدان بەرمەي، ەل مەرەيىن ۇستەم ەتتى. ولار فينليانديادان كەلگەن الەم چەمپيوندارىنان كەيىن ەكىنشى ورىنعا جايعاستى. وسىعان وراي ءبىز گيمناستيكا مەكتەبىنىڭ ديرەكتورى ءارى «Sunrise» كومانداسىنىڭ جاتتىقتىرۋشىسى جاننەت جابويەۆامەن اڭگىمەلەسكەن ەدىك.
– تالليندە وتكەن جارىستا ەل نامىسىن قورعاعان قىزدار تۋرالى ايتىپ بەرسەڭىز.
– ءبىزدىڭ گيمناست قىزداردىڭ بارلىعى الماتىدان. ولار: ءامينا بەيعانوۆا (كوماندا كاپيتانى)، توميريس بولات، التىناي نۇركەن قىزى، انەل نۇرسۇلتان، ايلين ماقسۇتوۆا، اميليا قۇنانبايەۆا جانە ادەليا تۇرسىنقوجا. بارلىق قاتىسۋشىلار – ءبىزدىڭ ەستەتيكالىق گيمناستيكا مەكتەبىنىڭ وقۋشىلارى. ونەر وردامىزدا بارلىعى 200-گە جۋىق قىز بار. ولارمەن 10 جاتتىقتىرۋشى جۇمىس ىستەيدى. اتالمىش جارىسقا كوماندانى مادينا مۋتالييەۆا ەكەۋمىز دايىندادىق.
– ەستەتيكالىق گيمناستيكا – قازاقستاندا ەندى دامىپ كەلە جاتقان جاڭا سپورت ءتۇرى. وسى سالا تۋرالى پىكىرىڭىزبەن بولىسسەڭىز.
– بۇل سپورت تۇرىندە كوركەم گيمناستيكا ەلەمەنتتەرى بار. تەك ەستەتيكالىق گيمناستيكا – ۇجىمدىق سپورت. مىسالعا، سينحروندى جۇزۋمەن سالىستىرا الامىز. بارلىق گيمناستيكالىق قوزعالىستار ديناميكالىق تۇرعىدان، جىلدامدىق جاعىنان بىردەي وزگەرىپ، بىركەلكى ورىندالۋى كەرەك. كومپوزيسيادا تولقىن جانە تەربەلۋ قوزعالىستارى، گيمناستيكالىق سەكىرۋلەر، سپيرالدى بۇرىلىستار جانە كوركەم بي سياقتى جان-جاقتى دەنە قوزعالىستارى بولۋى كەرەك.
سپورتشىلار قوزعالىس شەبەرلىگىمەن بىرگە سىمباتتىلىق پەن ۇيلەسىمدىلىكتى قاتار كورسەتەدى. تەك ءبىر كەمشىلىگى – ءبىزدىڭ سپورت وليمپيادا باعدارلاماسىنا ەنبەگەن. سول سەبەپتى، ەستەتيكالىق گيمناستيكا مەملەكەت تاراپىنان قارجىلاندىرىلمايدى. ازىرشە، سپورتشىلارىمىز بارلىق جارىستارعا ءوز قاراجاتىنا بارۋدا.
سۇحباتتاسقان دوسبول اتاجان.