ال تاۋىقتىڭ سان ەتىنىڭ باعاسى 23%-عا وسكەن.
ءبىراق قازاقستاندا قۇس ەتىن ءوندىرۋ ارتىپ كەلەدى، دەپ حابارلايدى Almaty-akshamy.kz ەnergyprom.kz سايتىنا سىلتەمە جاساپ.
اعىمداعى جىلدىڭ قاڭتار ايىندا قازاقستاندا 8،3 مىڭ توننا جاڭا نەمەسە سالقىنداتىلعان قۇس ەتى ءوندىرىلدى، بۇل ءبىر جىل بۇرىنعىدان 0،5 پايىزعا ارتىق. مۇزداتىلعان قۇس ەتىن ءوندىرۋ ءبىر جىلدا 9،7 پايىزعا ءوسىپ، 11،6 مىڭ توننانى قۇرادى.
وڭىرلىك تۇرعىدان العاندا، اقمولا وبلىسى جاڭا سويىلعان نەمەسە سالقىنداتىلعان قۇس ەتىن ءوندىرۋ بويىنشا كوشباسشى بولىپ تۇر: 2،9 مىڭ توننا. ۇزدىك ۇشتىككە شىعىس قازاقستان مەن الماتى وبلىستارى دا كىردى.
مۇزداتىلعان قۇس ەتىن ءوندىرۋ بويىنشا الماتى وبلىسى كوش باستاپ تۇر: 5،7 مىڭ توننا. ەكىنشى جانە ءۇشىنشى ورىندا اقمولا جانە شىعىس قازاقستان وبلىستارى ورنالاسقان.
جالپى العاندا، 2021 جىلدىڭ قاڭتار-جەلتوقسان ايلارىندا ەلىمىزدە 110،3 مىڭ توننا سالقىنداتىلعان جانە 127،4 مىڭ توننا مۇزداتىلعان قۇس ەتى ءوندىرىلدى، ال ءبىر جىل بۇرىن بۇل كورسەتكىش 100،5 مىڭ جانە 112 مىڭ توننا بولعان.
2021 جىلدىڭ 12 ايىنىڭ قورىتىندىسى بويىنشا، جەرگىلىكتى كاسىپورىندار قۇس ەتىنە جانە تاعامدىق جاناما ونىمدەرگە دەگەن سۇرانىستى (ىشكى نارىقتاعى ساتۋ مەن ەكسپورتتى قوسقاندا) (2020 جىلدىڭ وسى كەزەڭىندە 56،3% بولعان) 62،6%-عا قاناعاتتاندىرا الدى. يمپورتتىڭ ۇلەسى 37،4 پايىزدى قۇرادى. قازاقستان 168،5 مىڭ توننا «اق» ەتتى يمپورتتادى، بۇل ءبىر جىل بۇرىنعىدان 7،6%-عا از.
ىشكى نارىقتاعى ساتۋ ءبىر جىلدا 5،2%-عا ءوسىپ، 426،5 مىڭ توننانى قۇرادى.
اعىمداعى جىلدىڭ اقپان ايىندا قازاقستان رەسپۋبليكاسىنداعى بولشەك ساۋدا نۇكتەلەرىندە تاۋىقتىڭ قۇنى جىلىنا 17،2%-عا ءوسىپ، كەلىسى 1،1 مىڭ تەڭگەگە، تاۋىقتىڭ اياقتارى – بىردەن 22،8%-عا، كەلىسى 958 تەڭگەگە دەيىن ءوستى.
تاۋىق ەتى شىمكەنتتە ءبىر جىلدا بىردەن 35،2%-عا ايتارلىقتاي قىمباتتادى. قىمباتشىلىقتان الدا تۇرعان وبلىستار قاتارىنا تۇركىستان جانە قاراعاندى وبلىستارى دا كىردى. تاۋىق ەتى باعاسىنىڭ ەڭ جوعارى جىلدىق ءوسىمى تۇركىستان (جىلىنا بىردەن 55،8%)، اقتوبە (41،3%) جانە ماڭعىستاۋ (37،6%) وبلىستارىندا بايقالدى.
اقتاۋدا جانە (كەلىسى 1،3 مىڭ تەڭگە)، نۇر-سۇلتاندا تاۋىق ەتىنىڭ (كەلىسى 1،1 مىڭ تەڭگە) ەڭ قىمبات ەكەنى بەلگىلى بولدى.
ال قازاقستاننىڭ جۇمىرتقا وندىرۋشىلەرى قاۋىمداستىعى رەسەيگە سالىنعان سانكسيالاردىڭ ۆاليۋتا باعامىنا اسەرىنە الاڭداۋلى، دەپ حابارلايدى حابار24. دوللارعا قاتىستى رۋبل باعامى تەڭگەگە قاراعاندا تەزىرەك قۇلدىرادى. بۇل اراقاتىناس كورشى مەملەكەتتىڭ ونىمدەرىن ارزانداتادى. بۇل قازاقستانعا تاۋاردىڭ ارزان باعامەن اكەلىنۋىنە اكەلىپ سوعادى، ال ەلدەگى قۇس فابريكالارى جوسىقسىز باسەكە جاعدايىندا ساتىپ الۋشى ءۇشىن كۇرەسۋگە ءماجبۇر بولادى، دەپ سانايدى قاۋىمداستىق.