مەتەورولوگيالىق اگەنتتىك سۋ تاسۋ ءقاۋپى بار ەكەنىن ەسكەرتتى.
«نانمادول» تايفۋنى جاپونيا ارحيپەلاگى ارقىلى تىنىق مۇحيتىنا قاراي جىلجىپ، سەيسەنبى كۇنى وڭتۇستىك-باتىستا قاتتى جاڭبىر جاۋىپ، كوشكىن تۋدىرعاننان كەيىن تومەن قىسىمدى جۇيەگە دەيىن السىرەدى.تابيعي اپاتى سالدارىنان ەكى ادام قازا تاۋىپ، بىرەۋى ءىز-تۇزسىز جوعالىپ كەتتى، 100-دەن استام ادام جاراقات الدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
جاپون تەڭىزىنىڭ جاعالاۋىنان وتكەننەن كەيىن، تايفۋن سەيسەنبى كۇنى تاڭەرتەڭ ەلدىڭ ەڭ ۇلكەن باستى ارالى ءحونسيۋدىڭ سولتۇستىك-شىعىس ايماعىنان جەتتى. مەتەورولوگيالىق اگەنتتىك نوسەر جاۋىنانن زارداپ شەككەن ايماقتاردا ەندى كۇشتى جەل تۇرىپ، سۋ تاسۋ ءقاۋپى بار ەكەنىن ەسكەرتتى.
كۇشتى جەل مەن نوسەر جاڭبىرعا سەبەپشى بولعان ماۋسىمداعى 14ء-شى تايفۋن جەكسەنبى كۇنى كيۋسيۋ ارالىنىڭ وڭتۇستىك-باتىس ايماعىنا جەتكەندە، بۇرىن-سوڭدى بولماعان داۋىل تۇردى.
ميادزاكي پرەفەكتۋراسىندا كوشكىننەن كەيىن تاۋ باۋرايىنداعى قيراپ قالعان ءۇي ىشىنەن ءبىر ەر ادامنىڭ دەنەسى تابىلدى، ال اۋىلشارۋاشىلىق القاپتارىندا سۋ استىندا قالعان كولىكتەن تاعى ءبىر ادامنىڭ دەنەسى شىعارىلدى.
پرەفەكتۋرا بيلىگى مەن تابيعي اپات سالدارىن جويۋ اگەنتتىگىنىڭ مالىمەتىنشە، حيروسيمادا ءبىر ادام ءىز-تۇسسىز جوعالىپ، كەمىندە 115 ادام جاراقات العان.
Kyushu Electric Power كومپانياسى تاڭعى 11-دە 100 مىڭنان استام ءۇي جارىقسىز قالعانىن حابارلاعان.
ميادزاكي پرەفەكتۋراسىنداعى تاۋلى ايماقتا كوشكىن ءجۇرىپ، كوپىر قيراعانى راستالدى، ال شيگا پرەفەكتۋراسىندا ماڭىزدى مادەني قۇندىلىق دەپ تانىلعان حيكونە سارايىنداعى عيماراتتاردىڭ ءبىر بولىگى زاقىمداندى.
سەيسەنبىدە جاپونيانىڭ مەتەورولوگيا اگەنتتىگى ەلدىڭ سولتۇستىك-شىعىسىندا ساعاتىنا 108 شاقىرىم جىلدامدىقپەن جەل سوعادى، ال باتىسىندا تولقىننىڭ بيىكتىگى 7 مەترگە جەتەتىنىن بولجايدى.
سارسەنبى كۇنى جاپونيانىڭ ورتالىق جانە شىعىسىندا، سونىڭ ىشىندە توكيودا 80 ميلليمەترگە دەيىن جاڭبىر جاۋادى دەپ كۇتىلۋدە.
وسىعان دەيىن جاپونيادا تايفۋن سالدارىنان سۋ تاسىپ، 200 مىڭعا جۋىق ءۇي جارىقسىز قالعانىن حابارلاعان بولاتىنبىز.