جانتاق قىزىلوردالىقتار ءۇشىن تاڭسىق ەمەس.
بۇگىندە ەمدىك سۋسىن تەك قىزىلوردادا عانا ەمەس، الىس-جاقىن شەت ەلدەرگە دە ساتىلىمعا شىقتى، دەپ حابارلايدى aqshamnews.kz
ماماندىعى ەكونوميست، ءۇش بالانىڭ اناسى جۇلدىز كوشجانوۆا بالا كۇتىمىندە وتىرىپ، نەمەن اينالىسۋ كەرەكتىگىن زەرتتەي باستايدى. وسى كەزدە ونىڭ نازارىنا "تۇيە تىكەنەگى" نەمەسە "جانتاق" دەپ تە اتايتىن ەمدىك ءشوپ ىلىگەدى.ءسويتىپ ول ءبىر جىلدان بەرى تۇيە تىكەنەگىنەن شاي دايىنداپ كەلەدى. شامامەن ايىنا 23 كگ ءونىم ساتادى.
بۇل تۇيەنىڭ سۇيىكتى ءشوبى، دەگەنمەن ەجەلدە قازاق حالقى بۇل ءشوپتى ەمدىك ماقساتتا پايدالانعان، ءتىپتى شاي دا ازىرلەگەن. قۇپيا قۇرام بابادان بالاعا بەرىلىپ كەلەدى.
"شايدى دەمدەۋ ءۇشىن ايەلدەر مامىر ايىندا گۇلدەگەن وسىمدىك تىكەندەرى مەن جاپىراقتارىن جينايدى. باستىسى تىكەندى وسىمدىكتەن جاراقات الىپ قالماۋ قاجەت. جانتاقتىڭ تامىرىندا ءبىرشاما پايدالى زاتتار بار. ماسەلەن: اسكوربين، ورگانيكالىق قىشقىلدار، رەزەڭكە جانە ەفير مايلارى. ول سۋىققا، تاماقتان ۋلانۋعا، ريەۆماتيزمگە جانە باسقا دا ءتۇرلى اۋرۋلارعا كومەكتەسەدى. سونداي-اق، شارشاۋدى باسىپ، ءشولدى قاندىرادى"، - دەيدى جۇلدىز.
جۇلدىزدىڭ ايتۋىنشا، جانتاقتان جاسالعان شايدى وتباسى مۇشەلەرى تۇگەل دەرلىك ىشەدى. ونى سەكسەۋىل نەمەسە اعاش جاعىپ ساماۋرىندا قايناتقان دۇرىس. دەگەنمەن ارنايى قايناتۋ تالاپتارى جوق. ادەتتەگى شاي سياقتى، بىرنەشە قاسىق قۇرعاق وسىمدىكتى قايناعان سۋعا بۇقتىرۋ كەرەك. قالاۋىڭىز بويىنشا قوسىمشا زاتتار قوسۋعا بولادى، ءبىراق ءسۇت قاتۋعا بولمايدى.
"ارالدا وسەتىن تۇيە تىكەنەگىنەن دايىندالعان شايدى تانىمال ەتۋ ءۇشىن، ونى برەند رەتىندە قالىپتاستىرۋدى ۇيعاردىم. ءدال وسى ۋاقىتتا "ءبىر اۋىل — ءبىر ءونىم" جوباسى جاريالاندى. وعان قاتىسىپ، گرانت ۇتىپ الدىم. جوبانىڭ ارقاسىندا ەندى ءونىمىم جاپونياداعى دۇكەن سورەلەرىنە ءتۇسۋى مۇمكىن"،- دەدى جۇلدىز.