الماتىدا رەسپۋبليكالىق «تازا قازاقستان» باعدارلاماسى اياسىندا كوپقاباتتى تۇرعىن ۇيلەردىڭ اۋلا اۋماقتارىندا قوقىس جيناۋ جانە كونتەينەرلىك الاڭداردى سانيتارلىق وڭدەۋ بويىنشا اۋقىمدى جۇمىستار جۇرگىزىلۋدە، دەپ حابارلايدى aqshamnews.kz
18-24 قازان ارالىعىندا «جارقىن كۇز» ەكولوگيالىق اكسياسى شەڭبەرىندە 700-دەن استام كونتەينەرلىك الاڭدى سانيتارلىق وڭدەۋ، جۋۋ جانە دەزينفەكسيالاۋ، سونداي-اق 24 747 كوشە جانە اۋلا قوقىس جاشىكتەرىن تازالاۋ جۇمىستارى اتقارىلادى.
سونىمەن قاتار، اۋلا اۋماقتارىنىڭ سانيتارلىق جانە ەستەتيكالىق جاعدايىن جاقسارتۋ ماقساتىندا قولدانىستاعى كونتەينەرلىك الاڭداردى جاڭعىرتۋ جانە ولاردى تەرەڭدەتىلگەن تيپتەگى كونتەينەرلەرگە اۋىستىرۋ جۇمىستارى جالعاسۋدا. 2024-2025 جىلدار ارالىعىندا 2 مىڭنان استام جاڭا كونتەينەر ورناتۋ جوسپارلانعان.
ەسكە سالا كەتەيىك، الماتىدا «الماتى – ءبىزدىڭ ورتاق ءۇيىمىز» اتتى كۇزگى ناۋقاننىڭ سيكلى وتۋدە، ونىڭ اياسىندا قالادا كۇزگى-قىسقى كەزەڭگە بەلسەندى دايىندىق جۇمىستارى جۇرگىزىلۋدە.