جاپوندىقتار قازاقستاندىق قوعامنىڭ بىرىگۋ ماقساتتارىن قولدايتىندارىن جەتكىزدى
ناۋرىز مەيرامى قارساڭىندا، سونداي-اق قازاقستان مەن جاپونيا اراسىنداعى ديپلوماتيالىق قارىم-قاتىناستاردىڭ ورناتىلعانىنا 30 جىل تولۋىنا وراي جاپونياداعى ق ر ەلشىلىگى جاپون دوستارىنىڭ قاتىسۋىمەن دوڭگەلەك ۇستەل ۇيىمداستىردى، دەپ حابارلايدى Almaty-akshamy.kz.
سونىمەن قاتار ءىس-شارا بارىسىندا «دوستىق» وردەنى جانە «قازاقستان تاۋەلسىزدىگىنە 30 جىل» مەدالىمەن ماراپاتتاۋ ءراسىمى ءوتتى.
دوڭگەلەك ۇستەل بارىسىندا قازاقستان پرەزيدەنتى قاسىم-جومارت توقايەۆتىڭ «جاڭا قازاقستان: جاڭارۋ مەن جاڭعىرۋ جولى» اتتى قازاقستان حالقىنا جولداۋىنىڭ نەگىزگى تۇستارى تالقىلاندى. قاتىسۋشىلارعا جۇزەگە اسىرىلىپ جاتقان ساياسي جانە الەۋمەتتىك-ەكونوميكالىق رەفورمالاردىڭ بارىسى تۋرالى باياندالدى.
قازاقستاندى ودان ءارى دامىتۋعا جانە قوعامىمىزدى دەموكراتيالاندىرۋعا ىقپال ەتەتىن سۋپەرپرەزيدەنتتىك فورمادان پارلامەنتى كۇشتى پرەزيدەنتتىك رەسپۋبليكاعا كوشۋ سياقتى ماڭىزدى ساياسي باستامالارعا ەرەكشە نازار اۋدارىلدى.
قازاقستان ەلشىسى سابر ەسىمبەكوۆ مەملەكەت باسشىسىنىڭ جولداۋىندا ازاماتتاردىڭ مەملەكەتتىك باسقارۋ ىسىنە قاتىسۋ دەڭگەيىن ارتتىرۋ ماقساتى ايقىندالعانىن اتاپ ءوتتى. دوڭگەلەك ۇستەل قاتىسۋشىلارى مەملەكەتتىڭ تيىمدىلىگىن، ساياسي ۇدەرىستەردىڭ اشىقتىعى مەن باسەكەگە قابىلەتتىلىگىن ودان ءارى ارتتىرۋ مىندەتتەرىن قولدادى. قازاقستاننىڭ جاپوندىق دوستارى سونىمەن قاتار بولاشاق ىلگەرىلەۋدىڭ باستى فاكتورى رەتىندە قازاقستاندىق قوعامنىڭ بىرىگۋ ماقساتتارىن قولدايتىندارىن جەتكىزدى.
ءوز كەزەگىندە، قاتىسۋشىلار ەكىجاقتى ىنتىماقتاستىقتىڭ جاي-كۇيى مەن بولاشاعىن تالقىلاپ، قازاقستان مەن جاپونيا اراسىنداعى ءوزارا ىقپالداستىقتى كەڭەيتۋدىڭ جاڭا باعىتتارىن بەلگىلەدى.
سونىمەن قاتار، ق ر پرەزيدەنتى ق.توقايەۆتىڭ جارلىقتارىمەن ماراپاتتالعان، حح عاسىردىڭ باسىنداعى قازاق زيالىلارىنىڭ تاريحىن زەرتتەۋشىسى، حوككايدو ۋنيۆەرسيتەتىنىڭ پروفەسسورى توموحيكو ۋياماعا ءىى دارەجەلى «دوستىق» وردەنىن جانە 1993-1996 جىلدار ارالىعىندا قازاقستاندا قىزمەت اتقارعان جاپونيانىڭ قازاقستانداعى تۇڭعىش ەلشىسى اكيرا ماسۋيگە «قازاقستان تاۋەلسىزدىگىنە 30 جىل» مەرەيتويلىق مەدالىن تاپسىرۋ ءراسىمى ءوتتى.
ماراپاتتالعاندار مەملەكەت باسشىسىنا جانە قازاقستان حالقىنا جوعارى ناگرادالار ءۇشىن العىس ءبىلدىرىپ، قازاقستاننىڭ ودان ءارى گۇلدەنە بەرۋىن تىلەدى. پروفەسسور ت.ۋياما بۇل ناگرادانى بۇكىل عىلىمي-زەرتتەۋ كورپۋسى مەن قازاقستاندىق ارىپتەستەرىنە ارنايتىنىن ايتىپ، العىس سەزىمى مەن جىلى لەبىزىن قازاق تىلىندە جەتكىزدى.