ۋچاسكەلىك كوميسسيانىڭ جۇمىسى 4 قاراشادان باستالادى
20 قاراشا كۇنى ەلىمىز ءۇشىن ماڭىزدى ناۋقان – قازاقستان رەسپۋبليكاسى پرەزيدەنتىن سايلاۋى وتەدى. وسىعان وراي، ءار پارتيادان ساياسي ۇيىمدار ءوز كانديداتتارىن ۇسىندى. سايلاۋعا بەلسەندى تۇردە قاتىسىپ، داۋىس بەرۋ – ءاربىر ازاماتتىڭ بورىشى. وسى رەتتە الماتى قالالىق سايلاۋ كوميسسياسىنىڭ ءتوراعاسى جاننا اسانوۆامەن حابارلاسىپ، ساياسي ناۋقاننىڭ بارىسى جايلى اڭگىمەلەسكەن ەدىك.
– جاننا بەيسەنتاي قىزى، پرەزيدەنت سايلاۋىنا دايىندىق قالاي جۇرگىزىلۋدە؟
– دايىندىق باستالىپ كەتتى. قازىرگى ۋاقىتتا جەرگىلىكتى اتقارۋشى ورگاندار سايلاۋشىلار ءتىزىمىن ناقتىلاۋدا. سايلاۋشىلاردىڭ داۋىس بەرۋىنە قولايلى ورتا قۇرۋ ءۇشىن سايلاۋ ۋچاسكەلەرىن ءتيىستى ماتەريالدىق-تەحنيكالىق بازامەن قامتۋ جۇمىستارى جۇرگىزىلىپ جاتىر.
سايلاۋ زاڭناماسىنىڭ نەگىزدەرى جانە ونى سايلاۋ ۇدەرىسىندە قولدانۋ بويىنشا ۇيىمداستىرۋشىلاردىڭ كاسىبي بىلىكتىلىگى مەن قۇزىرەتىن ارتتىرۋ ماقساتىندا ارنايى وقىتۋلار ۇيىمداستىرىلعان.
– الماتى قالاسى بويىنشا سايلاۋ كوميسسيالارى قۇرىلدى ما؟
– قالادا 609 سايلاۋ كوميسسياسى قۇرىلعان. بارلىق دەڭگەيدەگى سايلاۋ كوميسسيالارى ساياسي پارتيا جانە قوعامدىق ءبىرلەستىكتەر ۇسىنىستارى نەگىزىندە ءماسليحات ارقىلى سايلانادى. 609 سايلاۋ كوميسسياسىنىڭ 1-ەۋى قالالىق، 8ء-ى اۋداندىق، 600ء-ى ۋچاسكەلىك.
قالا بويىنشا 600 سايلاۋ ۋچاسكەسى بار. ونىڭ 531ء-ى تۇرعىلىقتى مەكەنجايمەن، 69-ى ۋاقىتشا تىركەلگەندەر ءۇشىن قۇرىلعان (اۋرۋحانالار، ساناتورييلەر، اسكەري مەكەمەلەر، ت.ب.)
جالپى، سايلاۋ كوميسسيا مۇشەلەرىنىڭ سانى – 4759. الماتى قالاسىندا بۇگىنگى تاڭدا 1 ملن 161 مىڭعا جۋىق سايلاۋشى تىركەلگەن.
– قالادا تىركەلمەگەن تۇرعىندار قالاي داۋىس بەرەدى؟ ۋاقىتشا تىركەلگەندەر ۋچاسكەسىن قالاي انىقتايدى؟
– سايلاۋشىلاردى سايلاۋشىلار ءتىزىمىنە ەنگىزۋ – سايلاۋعا قاتىسۋ ءۇشىن ەڭ قاجەتتى نارسە. سايلاۋشىلاردىڭ ءتىزىمىن ءتيىستى اكىمدىكتەر «جەكە تۇلعالار» مەملەكەتتىك دەرەكتەر بازاسىنىڭ نەگىزىندە تۇرعىلىقتى جەرى بويىنشا جاسايدى. ناقتى سايلاۋ ۋچاسكەسىنىڭ سايلاۋشىلار تىزىمىنە قوسۋ ءۇشىن، تۇرعىلىقتى جەرى بويىنشا ءتىركەۋ فاكتىسى نەگىز بولىپ ەسەپتەلەدى. ءار سايلاۋشى فاكت بويىنشا ورنالاسقان ۋچاسكە اۋماعىنا قاراماستان، تىركەلگەن اۋماعىنداعى ۋچاسكەگە كەلىپ داۋىس بەرۋى ءتيىس.
الايدا سىزگە سايلاۋعا دەيىن 30 كۇن قالعاندا بەلگىلى بولسا، وندا ءسىزدىڭ 2022 جىلدىڭ 21 قازانىندا تىركەلگەن جەرىڭىز بويىنشا داۋىس بەرۋگە بارۋعا مۇمكىندىگىڭىز بولمايتىن بولسا، ءسىز ءوزىڭىز ورنالاسقان جەرىڭىز بويىنشا اكىمدىككە ءسىزدى سايلاۋ كۇنى ءسىزدىڭ ورنالاسقان جەرىڭىز بويىنشا سايلاۋشىلار تىزىمىنە ەنگىزۋ تۋرالى جازباشا وتىنىشپەن جۇگىنۋگە قۇقىڭىز بار.
ءسىز سايلاۋشىلار تىزىمدەرىندە ءوزىڭىزدىڭ بار-جوعىڭىزدى @almaty_sailau_bot تەلەگرامم بوتى ارقىلى نەمەسە https://open-almaty.kz/ru سايتىنان جسن ەنگىزۋ ارقىلى انىقتاي الاسىز.
ەگەر ءسىزدىڭ تۇراقتى تىركەۋىڭىز بولماعان جاعدايدا، مەملەكەتتىك قىزمەتتەردى ونلاين تۇردە الۋ مۇمكىندىگى شەڭبەرىندە، ءسىز ۇيدەن شىقپاي-اق ەGov ارقىلى تۇراقتى تىركەۋگە تۇرۋىڭىزعا بولادى.
– قالاعا سىرتتان، شەتەلدەن كەلگەن باقىلاۋشىلار تۋرالى ايتىپ بەرسەڭىز؟
– شەتەلدىك باقىلاۋشىلاردىڭ كەلۋى تۋرالى اقپارات سايلاۋ كۇنىنە جاقىنداعاندا انىقتالادى. ازىرشە الماتى بويىنشا ونداي اقپارات جوق.
– سايلاۋشىلار داۋىس بەرۋگە ارنالعان ءۇي-جايلاردان تىس جەرلەردە داۋىس بەرۋىنە بولا ما؟
– ەگەر داۋىس بەرۋشى دەنساۋلىعىنىڭ جاي-كۇيى بويىنشا؛
- ناۋقاس وتباسى مۇشەسىن كۇتۋ سەبەبى بويىنشا؛
سايلاۋ ۋچاسكەلەرى قۇرىلماعان شالعايداعى جانە قاتىناسۋ قيىن اۋدانداردا بولىپ، داۋىس بەرۋ ءۇشىن كەلە المايتىن بولسا، وندا سايلاۋ كۇنى (2022 جىلدىڭ 20 قاراشاسى) جەرگىلىكتى ۋاقىت بويىنشا ساعات ون ەكىدەن كەشىكتىرمەي، ۋچاسكەلىك سايلاۋ كوميسسياسىنا، ءوزى بولاتىن جەردە داۋىس بەرۋدى ۇيىمداستىرۋ تۋرالى جازباشا وتىنىشپەن جۇگىنۋگە قۇقىلى. ارىز بەرگەن سوڭ ۋچاسكەلىك سايلاۋ كوميسسياسى ءسىزدىڭ بولاتىن جەرىڭىز بويىنشا داۋىس بەرۋدى ۇيىمداستىرۋعا ءتيىس.
– سايلاۋ ۋچاسكەسىنە كەلگەن كەيبىر تۇرعىن وزدەرىن تىزىمنەن تابا الماي شاعىمدانىپ جاتادى. سەبەبى نەدە؟
– بىرىنشىدەن، سايلاۋشىنىڭ تۇراقتى تىركەۋىنىڭ بولماۋى، ەكىنشىدەن، سايلاۋشىنىڭ باسقا سايلاۋ ۋچاسكەسىنە قاتەلەسىپ كەءلۋى، ۇشىنشىدەن، سايلاۋشىنىڭ باسقا ءوڭىردە تىركەۋدە بولۋى سەبەپ بولىپ جاتادى.
مۇنداي جاعداي بولماۋ ءۇشىن ازامات داۋىس بەرۋگە بارماس بۇرىن الدىن الا @almaty_sailau2022 تەلەگرامم بوتى ارقىلى نەمەسە https://open-almaty.kz/ru سايتىنان سايلاۋشىلار تىزىمىنەن ءوزىن تەكسەرىپ الۋ قاجەت. جوعارىدا ايتىلعانداي، سايلاۋ قۇعىعىن يەلەندىرەتىن ارەكەتتەردى جاساۋ كەرەك.
سونىمەن قاتار، تاعى ءبىر قوسىمشا جاعداي – ازامات سايلاۋشىلار ءتىزىمىنىڭ ءتىزىمدەر ۋچاسكەسىنە بەرىلگەننەن كەيىن تۇراقتى تىركەۋگە تۇرىپ نەمەسە 18 جاسقا جاڭا تولۋى مۇمكىن. بۇل رەتتە ارينە، تىزىمدە بولمايدى. الايدا، بۇل جەردە دە شەشىم بار: داۋىس بەرۋ كۇنى ۋچاسكەلىك سايلاۋ كوميسسياسى ول ازاماتتى ارنايى فۋنكسيونال ارقىلى تەكسەرىپ، ەگەر سول ۋچاسكەدەگى ءتىركەۋى دالەلدەنسە، تىزىمگە جازباشا تۇردە قوسادى.
– سۇحباتىڭىزعا راحمەت!
سۇحباتتاسقان گۇلجانات سەمبايەۆا.