جەكە كاسىپكەرلىككە مەملەكەتتىك قولداۋ بار

قالانىڭ يندۋستريالدى ايماعىندا 2،9 مىڭ جۇمىس ورنى قۇرىلدى

الماتىدا يندۋستريالدى ايماقتىڭ نىساندارى بويىنشا باسپا ءسوز تۋرى ءوتتى. بۇقارالىق اقپارات قۇرالدارىنىڭ وكىلدەرى Teplostil ج ش س قاسبەتتىك جىلۋ پانەلىن وندىرەتىن زاۋىتتى، «Hyundai Trans Kazakhstan» اۆتوكولىك قۇرالدارىن وندىرەتىن زاۋىتتى، «بيجان» ەت وڭدەۋ زاۋىتىن، «المەرەك» مەديسينالىق بۇيىمدار زاۋىتىن، «Ala Estate» ونەركاسىپتىك پاركىن بارىپ كوردى.

باسپا ءسوز تۋرى Teplostil ج ش س ءوندىرىسىن بارىپ كورۋدەن باستالدى. ول جىل سايىن 240 000 شارشى مەتر قاسبەتتىك جىلۋ پانەلىن، كۇشەيتىلگەن پوليستيرول كوبىكتەن جاسالاتىن ساندىك بۇيىم شىعارادى. جوبانىڭ قۇنى 800 ملن تەڭگەنى قۇرايدى، كاسىپورىندا 30 ادام جۇمىس ىستەيدى.

ەكىنشى نىساندا بۇقارالىق اقپارات قۇرالدارىنىڭ وكىلدەرى Hyundai Trans Ka­zakhstan اۆتوكولىك قۇرالىنىڭ وندىرىسىمەن تانىستى. كاسىپورىن اعىمداعى جىلى Hyundai Bayon ىقشام قالالىق كروسسوۆەرىنىڭ پيلوتتىق پارتياسىن شىعارۋعا كىرىستى. قازىرگى ۋاقىتتا زاۋىت شاعىن ءتۇيىن ادىسىمەن شاناعىن دانەكەرلەپ جانە بوياپ، Hyundai اۆتوكولىك قۇرالىنىڭ – Sonata، Elantra، Santa Fe، Palisade، Tucson، Staria، i30، Bayon، سونداي-اق Tucson، Accent سەكىلدى 10 ۇلگىسىن شىعارۋدا. كاسىپورىننىڭ قۋاتتىلىعى جىلىنا 45 مىڭ بىرلىك. زاۋىتتا 800-دەن استام مامان جۇمىس ىستەيدى.

«استانا موتورس» پورتفەلىندەگى №1 برەند – Hyundai. بيىلعى توعىز اي ىشىندە كومپانيانىڭ ەنشىلەس كاسىپورنى – الماتىداعى Hyundai Trans Kazakhstan زاۋىتى وتاندىق نارىق ءۇشىن 20 680 اۆتوكولىك وندىرگەن. جىل سوڭىنا دەيىن Hyundai Trans Kazakhstan قازاقستاندىق تۇتىنۋشىلار ءۇشىن تاعى 10 مىڭ اۆتوكولىك شىعارادى، ال 2023 جىلى ىشكى نارىق ءۇشىن ءوندىرىس جوسپارى 40 مىڭ اۆتوكولىكتى قۇرايدى.

الەمدىك كولىك نارىعىنىڭ تاريحىندا بۇرىن-سوڭدى بولماعان ەڭ اۋىر داعدارىس ورىن الىپ تۇر. گەوساياسي احۋال جارتىلاي وتكىزگىشتەر تاپشىلىعىن جانە لوگيستيكا پروبلەماسىن ءبىرشاما شيەلەنىستىرىپ جىبەردى. ءىرى اۆتوكولىك كونسەرندەرى بۇكىل الەم بويىنشا ءوندىرىستى ازايتىپ كەلەدى. مىسالى، وڭتۇستىك كورەيادا 2022 جىلدىڭ سەگىز ايى ىشىندە 2021 جىلدىڭ ءدال وسى كەزەڭىمەن سالىستىرعاندا Hyundai اۆتوكولىكتەرى 12،7% كەم ساتىلعان، سونداي-اق Hyundai اۆتوكولىگىنە كەزەككە تۇرۋ 2-2،5 جىلدى قۇرادى.

بەكنۇر نەسىپبايەۆ، «استانا موتورس» كومپانياسىنىڭ  باس ديرەكتورى:

– بۇگىنگى تاڭدا كومپانيادان شىعارىلاتىن اۆتوكولىك تۇرلەرى كوبەيۋدە. وتكەن جىلى قازاقستان نارىعىنا 22 500 اۆتوكولىك ساتىلعان بولسا، وسى جىلى 29 000 اۆتوكولىكتى نارىققا شىعارامىز دەگەن ويدامىز. ءبىر اي بۇرىن قىتايلىق 3 ۇلكەن زاۋىتپەن كەلىسىمشارتقا قول قويدىق. الماتىداعى يندۋستريالدى ايماقتا جاڭادان تاعى ءبىر زاۋىت سالىنادى. ول زاۋىت قازىرگىگە قاراعاندا 3 ەسە ۇلكەن، 90 مىڭ اۆتوكولىك شىعارىلاتىن بولادى. ءار اۆتوكولىك دانەكەرلەۋ جانە بوياۋ ادىسىمەن شىعادى. قۇرىلىسى قاراشا ايىندا باستالىپ، 2 جىلدا بىتەدى دەگەن جوسپار بار. زاۋىتتا 2200 جاڭا جۇمىس ورنى اشىلادى. 100 ملرد تەڭگەدەن استام ينۆەستيسيا قۇيىلادى، 90 مىڭ اۆتوكولىكتىڭ 60 پايىزعا جۋىعى شەتەلگە ەكسپورتتالادى.

سونداي-اق، ب ا ق وكىلدەرى «بيجان» ەوز» ج ش س قىزمەتىمەن تانىستى. جىل سايىن ەت وڭدەۋ زاۋىتى يندۋستريالدى ايماقتا 5 مىڭ توننادان استام ءونىم وندىرەدى، شۇجىق ونىمدەرى مەن جارتىلاي دايىن ونىمدەرى اتاۋىنىڭ 100-دەن استام ءتۇرى بار. كاسىپورىندا 250 جۇمىس ورنى قۇرىلعان.

«وتاندىق ءونىمدى قولداۋ ءبىرىنشى كەزەكتەگى ماسەلە. زاۋىتتا 250-دەن استام ادام جۇمىس ىستەيدى. 1998 جىلى نارىققا شىققان زاۋىتتا العاش رەت 8 قىزمەتكەر ەڭبەك ەتتى. يندۋستريالدى ايماقتاعى زاۋىت 2020 جىلى ىسكە قوسىلدى. 80 ءتۇرلى ەت ونىمدەرىن شىعارادى. قازاقستان نارىعىن ءوزىمىزدىڭ ونىممەن قامتاماسىز ەتۋ – باستى ماقساتىمىز»، – دەيدى «بيجان» ەوز» ج ش س باس ديرەكتورى حاديشا نۇرتاي قىزى.

«المەرەك» ج ش س ءبىر رەت قانا قولدانىلاتىن مەديسينالىق ماقساتتاعى بۇيىمدار وندىرەتىن زاۋىت – ەكسپورتقا باعىتتالعان كاسىپورىن. وتاندىق ءوندىرۋشى ءونىمدى ساتۋدى قازاقستاننىڭ بارلىق وڭىرلەرىنە عانا ەمەس، سونىمەن قاتار، ەۋروازيالىق ەكونوميكالىق وداق ەلدەرىنىڭ نارىعىنا شىعۋدى جوسپارلاپ وتىر. بۇگىندە كاسىپورىن جىلىنا 28 ملن بىرلىك ءونىم شىعارادى، 50 جۇمىس ورنى قۇرىلدى.

بارىپ كورۋدىڭ تاعى ءبىر نىسانى «Ala Es­tate» ونەركاسىپتىك پاركى بولدى، وندا بۇگىنگى كۇنى وتاندىق دايىنداۋشىلاردىڭ بولمەارالىق ەسىكتەرىنىڭ وندىرىستەرى («LePorte M» ج ش س جانە «ابسوليۋت فلور» ج ش س) جانە «Qulpinay» ج ش س كونديتەرلىك كومپانياسى ورنالاستىرىلعان. اۋدانى 4،3 مىڭ شارشى مەتردى قۇرايتىن ونەركاسىپتىك پارك شاعىن جانە ورتا بيزنەس سۋبەكتىلەرىنە 1 شارشى مەترى ءۇشىن 1200 تەڭگە مولشەرىندە جەڭىلدەتىلگەن، بەكىتىلگەن جالعا الۋ مولشەرلەمەسى بويىنشا دايىن ينفراقۇرىلىمىمەن دايىن وندىرىستىك ءۇي-جايلار بەرەدى. جوبا 140 جاڭا جۇمىس ورنىن قۇرۋعا مۇمكىندىك بەردى. بۇگىندە الماتى يندۋستريالدى ايماعىندا جەكە ينۆەستيسياسى 119،8 ملرد تەڭگەنى قۇرايتىن 20 جوبا ىسكە اسىرىلدى، 647،5 ملرد تەڭگەگە ءونىم ءوندىرىلدى، 20،7 ملرد تەڭگە سالىق اۋدارىمدارى تولەندى، 2913 جۇمىس ورنى قۇرىلدى.

2022 جىلى 65 جۇمىس ورنى قۇرىلا وتىرىپ، سوماسى 4،6 ملرد تەڭگەنى قۇرايتىن «كاز-ديا-تەست» ج ش س زاۋىتى ىسكە قوسىلدى. جىلدىڭ سوڭىنا دەيىن 211 جۇمىس ورنىن قۇرا وتىرىپ، جالپى سوماسى 6،8 ملرد تەڭگەنى قۇرايتىن 5 كاسىپورىندى («VALTHERM»، «City Stone»، «TEPLOSTIL»، «Stroy Produc­tion»، «ەلەكتروبار») ىسكە قوسۋ جوسپارلانىپ وتىر. بۇدان باسقا، 2022 جىلى جەكە ينۆەستيسيانىڭ جالپى سوماسى 1،5 ملرد تەڭگەنى قۇرايتىن، جالپى الاڭى 15 300 شارشى مەتر بولاتىن 4 شاعىن ونەركاسىپتىك پاركتى ىسكە قوسۋ جوسپارلانىپ وتىر.

«اقشامنىڭ» انىقتاماسى:

الماتى يندۋستريالدى ايماعى جەكە كاسىپكەرلىككە مەملەكەتتىك قولداۋ كورسەتۋ ماقساتىندا قۇرىلدى جانە الماتى قالاسىندا ونەركاسىپتىڭ باسىم سالالارىن (ماشينا جاساۋ، تاماق، جەڭىل، فارماسيەۆتيكا، حيميا ونەركاسىبى، لوگيستيكا، قۇرىلىس ماتەريالدارىنىڭ ءوندىرىسى) دامىتۋ ءۇشىن كوزدەلگەن. بۇل رەتتە ونەركاسىپ كاسىپورىندارىن قالانىڭ تۇرعىن اۋدانىنان باسقا جاققا قايتا ورنالاستىرۋعا، تەحنولوگيالىق، يننوۆاسيالىق ونىمدەر شىعارۋعا، يمپورتتى اۋىستىرۋعا باعىتتالعان ينۆەستيسيالىق جوبالارعا باسىمدىق بەرىلەدى. ونەركاسىپتىك ايماق اۋماعىندا بارلىق قاجەتتى ينفراقۇرىلىم – گازبەن قامتاماسىز ەتۋ، سۋمەن قامتاماسىز ەتۋ، ەلەكتر ەنەرگياسى، كارىز قۇبىرى، نوسەر كارىزى، ينتەرنەت، كابىلدىك تەلەفونيا، جول جەلىسى بار، «يندۋستريالدى» جەكە تەمىرجول ستانسياسىنىڭ قۇرىلىسى جۇرگىزىلۋدە.