پرەزيدەنت سۇحباتىندا ەلدىڭ جاڭعىرۋدىڭ جاڭا كەزەڭىنە قادام باسقانىن اتاپ، ونىڭ وزەگى ازاماتتاردىڭ ومىرىندە ناقتى وزگەرىستەر جاساۋعا باعىتتالعانىن باسا ايتقان بولاتىن. وسىعان بايلانىستى وڭىرلەردىڭ باستى مىندەتى – رەفورمالاردى ناقتى ىسپەن تولىقتىرىپ، ولاردى ناقتى الەۋمەتتىك-ەكونوميكالىق ناتيجەلەرگە اينالدىرۋ.
كەڭەس بارىسىندا شاعىن جانە ورتا بيزنەستى دامىتۋ، تۋريزم، الەۋمەتتىك قولداۋ جانە ءبىلىم بەرۋ جايى قارالدى. بۇل باعىتتار حالىقتى جۇمىسپەن قامتۋعا، تابىسىنىڭ وسۋىنە جانە قالالىق ورتانىڭ ساپاسىنا تىكەلەي اسەر ەتەدى.
دارحان ساتىبالدى الماتىنىڭ كاسىپكەرلىكتى دامىتۋدا كوشباسشى ورنىن ساقتاپ وتىرعانىن جەتكىزدى. قالادا شامامەن 405 مىڭ شاعىن جانە ورتا بيزنەس سۋبەكتىسى جۇمىس ىستەيدى، بۇل ەلدەگى بارلىق شوب-تىڭ 18 پايىزى. شاعىن جانە ورتا بيزنەستىڭ قالا ەكونوميكاسىنا قوسىپ وتىرعان ۇلەسى 60 پايىزعا جەتسە، وسى سالادا ەڭبەككە جارامدى تۇرعىنداردىڭ 90 پايىزىنا جۋىعى جۇمىسپەن قامتىلعان. 2025 جىلدىڭ قورىتىندىسى بويىنشا شوب-تان 1،2 ترلن تەڭگە سالىق ءتۇسىمى تۇسكەن.
تۋريزم سالاسىندا الماتىدا نەگىزگى كورسەتكىشتەر بويىنشا تۇراقتى ءوسىم بايقالادى. 2025 جىلدىڭ توعىز ايىندا تۋريستەر سانى 8 پايىزعا ارتىپ، 1،9 ملن ادامعا جەتتى، كورسەتىلگەن تۋريستىك قىزمەت كولەمى 17،3 پايىزعا ءوسىپ، 82،4 ملرد تەڭگە بولدى. 2026 جىلى تۋريستىك ينفراقۇرىلىمدى ودان ءارى دامىتۋ جوسپارلانىپ وتىر، ونىڭ ىشىندە 350 شاقىرىم تاۋ سوقپاعىن كوركەيتۋ كوزدەلگەن.
كەڭەس بارىسىندا نيۋ-يورك، ماسكەۋ جانە پاريج قالالارىنىڭ تاجىريبەسى نەگىزىندە «24/7 قالا» مودەلىن ەنگىزۋگە ەرەكشە كوڭىل ءبولىندى. تۇنگى ۋاقىتتاعى قاۋىپسىزدىكتى ارتتىرۋ، قالانىڭ جارىقتاندىرىلۋى، مادەني جانە تۋريستىك نىسانداردىڭ جۇمىس جايى تالقىلاندى.
الەۋمەتتىك سالادا قولداۋعا مۇقتاج ازاماتتارعا مەملەكەتتىك كومەكتىڭ ناقتى ءارى ءتيىمدى جەتۋىنە جانە ماسىلدىققا بەيىمدىلىكتى تومەندەتۋگە باسىمدىق بەرىلدى. 2025 جىلى قالادا الەۋمەتتىك قولداۋ شارالارىنا 38،8 ملرد تەڭگە ءبولىنىپ، شامامەن 330 مىڭ ادام قامتىلدى. سيفرلىق قۇرالدار مەن مۇقتاجدىقتىڭ جاڭا ولشەمدەرىن ەنگىزۋ ناتيجەسىندە اتاۋلى الەۋمەتتىك كومەك الۋشىلار سانى 2023 جىلعى 21 مىڭنان 2025 جىلى 10 مىڭعا دەيىن ازايدى. بۇل الەۋمەتتىك ساياساتتىڭ ءتيىمدى ۇلگىسىنە كوشۋدى كورسەتەدى.
ءبىلىم بەرۋ سالاسىندا جان باسىنا شاققانداعى قارجىلاندىرۋ جانە ساپالى ءبىلىم بەرۋ قىزمەتىنە قولجەتىمدىلىكتى كەڭەيتۋ ماسەلەسى تالقىلاندى. 2026 جىلى الماتىداعى ءبىلىم بەرۋ جۇيەسىن قارجىلاندىرۋعا 432 ملرد تەڭگەدەن استام قاراجات قاراستىرىلعان. بۇل قارجى مەكتەپكە دەيىنگى، ورتا جانە قوسىمشا ءبىلىم بەرۋ، سونداي-اق ەرەكشە ءبىلىم بەرۋ قاجەتتىلىگى بار بالالاردى قولداۋعا باعىتتالادى.
دارحان ساتىبالدى مەملەكەت باسشىسى ايقىنداعان مىندەتتەردى جۇزەگە اسىرۋ جاڭا جۇمىس ورىندارىن اشۋ، الەۋمەتتىك قىزمەتتىڭ قولجەتىمدىلىگىن ارتتىرۋ، ينفراقۇرىلىمدى دامىتۋ جانە قولايلى قالالىق ورتا قالىپتاستىرۋ سىندى قالا باسقارۋىنىڭ بارلىق دەڭگەيىنەن تۇرعىندار ناقتى سەزىنەتىن ناتيجەگە باعىتتالعان ايقىن ۇستانىمدى تالاپ ەتەتىنىن جەتكىزدى.
كەڭەس قورىتىندىسى بويىنشا سالالىق باسقارمالار مەن اۋدان اكىمدىكتەرىنە باسىم باعىتتاردى ىسكە اسىرۋدا ۇيلەسىمدى جۇمىس جۇرگىزۋ، بيۋدجەت قاراجاتىنىڭ ءتيىمدى جۇمسالۋىن قاتاڭ باقىلاۋ جانە قابىلداناتىن بارلىق شەشىمدى الماتىلىقتاردىڭ تۇرمىس ساپاسىن ارتتىرۋعا باعىتتاۋ تاپسىرىلدى.