الماتىدا 2023 جىلى جەتىسۋ جانە اۋەزوۆ اۋداندارىندا 2 جاڭا ەمحانا اشىلدى، سونىمەن قاتار، 2023 جىلدىڭ سوڭىنا دەيىن اياقتاۋ جوسپارلانىپ وتىرعان 4 ودا (وتباسىلىق دارىگەرلىك امبۋلاتوريا) قۇرىلىسى باستالدى.
بۇل تۋرالى الماتى قالاسىنىڭ اكىمى ەربولات دوسايەۆ ق ر پرەزيدەنتى قاسىم-جومارت توقايەۆتىڭ قاتىسۋىمەن وتكەن الماتى قالاسىن دامىتۋ جونىندەگى كەڭەستە مالىمدەدى، دەپ حابارلايدى Almaty-akshamy.kz.
«قازىرگى ۋاقىتتا الدىڭعى قاتارلى حالىقارالىق تاجىريبە بازاسىندا ازىرلەنگەن مساك (مەديسينالىق-سانيتارلىق العاشقى كومەك) جاڭا ءبىرىڭعاي ستاندارتىنا سايكەس، 11 ەمحانا مەن ودا ءۇشىن جسق ازىرلەۋ جۇرگىزىلۋدە. بۇل ستاندارت مەديسينالىق كومەك كورسەتۋ رەگلامەنتەرىنە، جوبالىق-تەحنولوگيالىق شەشىمدەرگە، سيفرلاندىرۋعا جانە ەمحانالاردىڭ مەنەدجمەنتىنە قولجەتىمدىلىك، ساپا، تەحنولوگيالىلىق جانە جايلىلىق سىندى 4 نەگىزگى كريتەريي بويىنشا تۇبەگەيلى وزگەرىستەردى كوزدەيدى. قالانىڭ جۇمىس ىستەپ تۇرعان 10 ءىرى كوپسالالى ستاسيونارلارى مەن پەرزەنتحانالارىن سالۋ جانە جاڭعىرتۋ بويىنشا كەشەندى باعدارلاما باستالدى»، – دەدى ەربولات دوسايەۆ.
ءارى ونىڭ ايتۋىنشا، دەنساۋلىق ساقتاۋدىڭ كادرلىق الەۋەتىن كۇشەيتۋگە ەرەكشە كوڭىل بولىنەدى. وسىلايشا، 3 500 دارىگەر مەن مەدبيكە ەلىمىزدىڭ عىلىمي مەديسينالىق ورتالىقتارى مەن گەرمانيا، يزرايل، تۇركيا كلينيكالارىندا بىلىكتىلىگىن ارتتىرادى. قالانىڭ تاپسىرىسى بويىنشا بيىل 1 قىركۇيەكتەن باستاپ 140 رەزيدەنت پەن ماگيسترانتتى وقىتۋ باستالادى.
«جالپى، بيىل ءبىرىنشى جارتىجىلدىقتا ءبىز نەگىزگى كورسەتكىشتەردىڭ جاقسارعانىن كورەمىز. جالپى ءولىم-جىتىم 11%-عا، انا ءولىمى 32،4%-عا، ءسابي ءولىمى 35،5%-عا تومەندەدى»، - دەدى قالا باسشىسى.