مەديسينالىق ساقتاندىرۋ قورى الماتى قالاسىنىڭ دەنساۋلىق ساقتاۋ سالاسىنا قوسىمشا 7 ملرد تەڭگە ءبولدى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە مسق الماتى فيليالى ديرەكتورى تىلەۋحان ابىلدايەۆ حابارلادى.
ايتۋىنشا، قوسىمشا قارجى الماتىدا مىندەتتى الەۋمەتتىك مەديسينالىق ساقتاندىرۋ پاكەتىندەگى قىزمەتتەردى پايدالانۋ كورسەتكىشىنىڭ جوعارى بولۋىنا بايلانىستى ءبولىنىپ وتىر.
«جالپى، وڭتۇستىك استانادا مەديسينالىق قىزمەتكە جۇگىنۋ كورسەتكىشى وتە جوعارى. سوندىقتان قور وتكەن اپتادا قالاداعى مەديسينا مەكەمەلەرىن قارجىلاندىرۋعا 7 ملرد تەڭگەگە جۋىق قارجى ءبولدى. بولىنگەن قاراجاتتىڭ 2،8 ملرد تەڭگەسى كونسۋلتاتيۆتىك-دياگنوستيكالىق قىزمەتتەرگە، 4،1 ملرد تەڭگەسى – ستاسيونارلىق كومەككە، 164،5 ملن تەڭگەسى جوعارى تەحنولوگيالىق قىزمەتتەرگە جۇمسالماق»، - دەدى تىلەۋحان ابىلدايەۆ.
فيليال باسشىسىنىڭ دەرەگىنشە، بيىل الماتى قالاسى دەنساۋلىق ساقتاۋ سالاسى بيۋدجەتى 302،4 ملرد. تەڭگەنى قۇراپ وتىر. ونىڭ 156،7 ملرد تەڭگەسى – كەپىلدەندىرىلگەن تەگىن مەديسينالىق كومەككە، 145،7 ملرد. تەڭگەسى ءمامس پاكەتىنە تيەسىلى. سالىستىرار بولساق، بۇل وتكەن جىلدىڭ بيۋدجەتىنەن 17% ارتىق، دەدى ول.
سونىمەن قاتار، تىلەۋحان ابىلدايەۆ مەديسينا ۇيىمدارىنا بولىنەتىن قارجى قىسقارتىلدى دەگەن قاۋەسەتتىڭ شىندىققا جاناسپايتىنىن اتاپ ءوتتى.
«سوڭعى كەزدە جۇرتشىلىق اراسىندا قور مەديسينا ۇيىمدارىنا بولىنەتىن قاراجاتتى قىسقارتتى، سول سەبەپتى حالىققا كورسەتىلەتىن كومەك كولەمى دە قىسقاردى دەگەن پىكىر تاراعانى جاسىرىن ەمەس. بولىنگەن قارجى كولەمى جىل سايىن ارتپاسا، كەمىپ جاتقان جوق. جالپى، قور كەپىلدەندىرىلگەن تەگىن مەديسينالىق كومەك پەن ءمامس شەڭبەرىندە حالىققا كورسەتىلگەن قىزمەت اقىسىن تولەيتىن قارجى وپەراتورى. ياعني، كەلىسىمشارت بەلگىلى ءبىر سوماعا بەكىتىلەدى، كلينيكا سول سوماعا جىل بويى قىزمەت كورسەتەدى. ارتىق تۇتىنۋدى بولدىرماس ءۇشىن مەديسينا ۇيىمدارى كورسەتىلەتىن قىزمەت كولەمىن ءار ايعا ءبولىپ وتىرۋى ءتيىس»، - دەدى فيليال ديرەكتورى.
ەستەرىڭىزگە سالا كەتسەك، قور كورسەتىلگەن قىزمەتتەردىڭ ساپاسىن تەكسەرەدى جانە قىزمەت اقىسى ءتيىستى مونيتورينگتەن كەيىن عانا تولەنەدى. ادەتتە، مونيتورينگ بارىسىندا ستاندارتتار مەن نورماتيۆتەردەن اۋىتقۋ سىندى اقاۋلار انىقتالىپ جاتادى. ەمدەۋ مەكەمەلەرىنە ايىپپۇل سالىنادى، كورسەتىلگەن قىزمەت سوماسى تولىعىمەن نەمەسە ونىڭ بەلگىلى ءبىر بولىگى قورعا قايتارىلادى. ال، كورسەتىلمەگەن قىزمەتتى كورسەتىلدى دەپ قوسىپ جازعان كلينيكالار ءۇش ەسە ايىپپۇل سالىنادى.