بيىلعى جىلدىڭ ءبىرىنشى جارتىسىندا ساقتاندىرىلعان الماتىلىقتار ءمامس جۇيەسى ارقىلى جالپى قۇنى 79،2 ملرد تەڭگە بولاتىن مەديسينالىق كومەك تۇرلەرىن پايدالانعان. بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا وتكەن بريفينگتە مەديسينالىق ساقتاندىرۋ قورىنىڭ الماتى قالالىق فيليالى ديرەكتورى تىلەۋحان ابىلدايەۆ حابارلادى.
ايتۋىنشا، شىعىننىڭ باسىم بولىگى، ياعني 44،1 ملرد تەڭگە ستاسيونارلىق مەديسينالىق كومەككە، 3،2 ملرد تەڭگە – كۇندىزگى ستاسيونارلار كورسەتكەن قىزمەتتەرگە تولەندى.
«مەديسينالىق كومەككە جۇگىنگەن ازاماتتار تاراپىنان ەمدەۋ مەن دياگنوستيكانىڭ باعاسى قىمبات تۇرلەرى، سالالىق مامانداردىڭ كونسۋلتاسيالارى، سونداي-اق زەرتحانا تالداۋلارىنا دەگەن سۇرانىس جوعارى بولعان. جارتى جىلدا اتالعان قىزمەتتەرگە 14،6 ملرد تەڭگە جۇمسالدى»، - دەدى فيليال باسشىسى.
فيليال باسشىسىنىڭ سوزىنە قاراعاندا، سونىڭ ىشىندە كومپيۋتەرلىك توموگرافيا مەن ماگنيتتى-رەزونانستىق توموگرافياعا (كت/مرت) دەگەن سۇرانىس بۇرىنعىشا جوعارى كۇيىندە قالىپ وتىر. التى ايدا الماتى قالاسىندا جالپى سوماسى 890،5 ملن تەڭگەنى قۇرايتىن 46 مىڭنان استام كت جاسالعان. تاعى 33 مىڭنان استام مرت قىزمەتىنە قور 542 ملن. تەڭگە ءبولدى. سونىمەن قاتار، ونكولوگيالىق ناۋقاستاردى نىسانالى تۇردە تەكسەرۋگە ارنالعان 6،4 مىڭ پوزيتروندى-ەميسسيوندىق توموگرافيا جاسالعان، وعان 2،2 ملرد تەڭگەدەن استام قارجى تولەنگەن.
«مىندەتتى الەۋمەتتىك مەديسينالىق ساقتاندىرۋ ەسەبىنەن كۇن سايىن قۇنى بىرنەشە ميلليونعا جەتىپ جىعىلاتىن جوعارى تەحنولوگيالى وپەراسيالار جاسالىپ جاتىر. بيىلعى جىلدىڭ 6 ايىندا الماتى قالاسىندا وسىنداي وتالارعا 11،7 ملرد.تەڭگە جۇمسالىپتى. جارتى جىلدا الماتىلىق ستاسيونارلار ميداعى قان-تامىرلارى مەن قان-تامىر جۇيەلەرىنە 2 226 وتا جاساعان. وپەراسيالاردىڭ جالپى قۇنى 2،7 ملرد. تەڭگەدەن استى. سونىمەن قاتار، ساقتاندىرۋدىڭ ارقاسىندا ترانسپلانتولوگيالىق وپەراسيالار دا كەدەرگىسىز جاسالىپ جاتىر. جارتى جىلدا 34 بۇيرەك الماستىرىلدى، ونىڭ جالپى قۇنى 170 ملن تەڭگەنى قۇرادى»، - دەدى تىلەۋحان ابىلدايەۆ.