ءارقايسىمىز ءوز تاڭداۋىمىزدى جاساۋ مۇمكىندىگىنەن قالىس قالمايىق.
الماتى اكىمدىگى «الماتى – ادامدار ءۇشىن جاھاندىق قالا» باعدارلاماسىن ازىرلەدى، وندا مەگاپوليستى 2025 جىلعا دەيىن دامىتۋدىڭ نەگىزگى باسىمدىقتارى مەن 2030 جىلعا دەيىنگى ورتا مەرزىمدى پەرسپەكتيۆالار كورسەتىلگەن. قالا تۇرعىندارى باعدارلامامەن تانىسىپ، ءوز ۇسىنىستارىن «الماتىنى دامىتۋ ورتالىعىنىڭ» سايتىندا 2022 جىلدىڭ 1 شىلدەسىنە دەيىن قالدىرا الادى. بۇل تۋرالى الماتى قالاسى قوعامدىق كەڭەس مۇشەسى جانات قاسىمجانوۆا پىكىر ءبىلدىردى، دەپ حابارلايدى Almaty-akshamy.kz.
«الماتىلىقتار ءۇشىن جاعىمدى جاڭالىق! بۇگىن الماتى قالاسى اكىمدىگىنىڭ «الماتى قالاسىنىڭ 2025 جىلعا دەيىنگى دامۋ جوسپارىنىڭ نەگىزگى باسىمدىقتارى جانە 2030 جىلعا دەيىنگى ورتا مەرزىمدى پەرسپەكتيۆالار» جوباسى تالقىلاۋعا ۇسىنىلدى. بۇل - ءار قالا تۇرعىنىنىڭ ءوز ءۇنىن قوساتىن، ءوز تاڭداۋىن بىلدىرەتىن جانە ءوزىنىڭ سۇيىكتى قالاسىنىڭ كوركەيۋىنە ءوز ۇلەسىن قوسا الاتىن مۇمكىندىك ەكەنىن اتاپ وتكىم كەلەدى. جوبانى دايارلاۋ بارىسىندا قالانىڭ بولاشاق دامۋ باعىتى ءار ءتۇرلى سالاداعى بەلسەندى جانە بىلىكتى ساراپشىلارمەن تالقىلاندى، ەندى قالا تۇرعىندارىنىڭ نازارىنا ۇسىنىلىپ وتىر. سوندىقتان، ءارقايسىمىز ءوز تاڭداۋىمىزدى جاساۋ مۇمكىندىگىنەن قالىس قالمايىق، سەبەبى قالامىزدىڭ جاقسارۋى ءوز قولىمىزدا»،- دەپ جازدى جانات قاسىمجانوۆا.