جانار-جاعارمايدىڭ اكسيزدىك مولشەرلەمەلەرى قايتا قارالادى. بۇل تۋرالى ۇكىمەت وتىرىسىندا قارجى ءمينيسترى ەرۇلان جاماۋبايەۆ ءمالىم ەتتى، دەپ حابارلادى اlmaty-akshamy.kz قازاقپارات تىلشىسىنە سىلتەمە جاساپ.
«بيۋدجەتكە قوسىمشا تۇسىمدەردى قامتاماسىز ەتۋ بويىنشا ءقازىر تاۋ-كەن مەتاللۋرگيا كەشەنىندەگى جەر قويناۋىن پايدالانۋشىلاردان تۇسىمدەردى ارتتىرۋعا قاتىستى تەتىكتەر ازىرلەنۋدە»، - دەدى مينيستر.
ونىڭ ايتۋىنشا، جانار-جاعارماي نارىعىندا ۇستەمە باعالارعا شەكتەۋ قويۋ كوزدەلىپ وتىر.
«سونداي-اق، مولشەرلەمەلەر قايتا قارالادى جانە ۇستەمە باعا شەكتەلەدى. بۇل ساتۋشىلاردىڭ قوسىمشا تابىستارىن بيۋدجەتكە تۇسىرۋگە مۇمكىندىك بەرەدى»، - دەدى ەرۇلان جاماۋبايەۆ.
ەسكە سالساق، ۇكىمەت وتىرىسىندا ق ر ۇلتتىق بانكىنىڭ ءتوراعاسى ەربولات دوسايەۆ كاپيتالدى نەگىزسىز شىعارۋعا قارسى ءىس-قيمىل قالاي ۇيىمداستىرىلاتىنىن ءتۇسىندىردى.
«جوعارىدا اتالعان بۇيرىققا سايكەس، وپەراسيالار جۇرگىزۋگە ارنالعان وتىنىمدەر بويىنشا ءىس-قيمىلدار الگوريتمى قابىلداندى، سونداي-اق كۇشەيتىلگەن قارجىلىق مونيتورينگ جۇرگىزىلۋى ءتيىس ترانسشەكارالىق وپەراسيالاردىڭ تىزبەسى بەكىتىلدى. تالاپتار ايقىن بۇزىلعان جاعدايدا، مۇنداي وپەراسيالار جەدەل توقتاتىلاتىن بولادى. قابىلدانىپ جاتقان شارالار اقشانى جىلىستاتۋعا قارسى كۇرەستىڭ ەڭ ۇزدىك الەمدىك پراكتيكاسىنا نەگىزدەلەدى جانە KYC (know your client) قاعيداتتارىن تولىققاندى ەنگىزەدى»، - دەدى ەربولات دوسايەۆ.