وڭىرلەردە وتىن تاپشىلىعى مەن ىركىلىستەر بولماۋى ءتيىس.
پرەمەر-مينيستر ءاليحان سمايىلوۆتىڭ توراعالىعىمەن وتكەن كەزەكتى ۇكىمەت وتىرىسىندا كۇن تارتىبىنەن تىس ىشكى نارىقتى جانار-جاعارمايمەن قامتاماسىز ەتۋ ماسەلەسى قارالدى، دەپ حابارلايدى Almaty-akshamy.kz Egemen.kz سىلتەمە جاساپ.
ۇكىمەت جانارماي نارىعىنداعى جاعدايدى تۇراقتاندىرۋ ءۇشىن قاجەتتى شۇعىل شارالاردى قابىلدادى.
وڭىرلەردى مۇناي ونىمدەرىمەن قامتاماسىز ەتۋ بويىنشا كۇندەلىكتى جۇمىس جۇرگىزەتىن جەدەل كوميسسيا قۇرىلدى. ءار وبلىستا مۇناي بازالارى مەن ۇساق جانار-جاعارماي قۇيۋ بەكەتتەرىن باقىلاۋ جونىندەگى وڭىرلىك كوميسسيالار قۇرىلدى. زاۋىتتاردا مۇناي وڭدەۋ جانە ديزەل وتىنىن ءوندىرۋ كولەمى ۇلعايتىلدى. مۇناي ونىمدەرىن اكەتۋگە جول بەرمەۋ ماقساتىندا قاجەتتى ەكسپورتتىق شەكتەۋلەر ەنگىزىلدى، ديزەل وتىنى ىشكى نارىققا دەلدالدارسىز جەتكىزىلەدى.
«قابىلدانىپ جاتقان شارالاردىڭ ناتيجەسىندە جانار-جاعارماي نارىعىنداعى احۋال ءبىر قالىپقا كەلىپ جاتىر. دەگەنمەن جاعدايدى ۇنەمى نازاردا ۇستاپ، قاتاڭ باقىلاۋ قاجەت. مىسالى، كەيبىر وڭىرلەردە سۇيىتىلعان گازدىڭ تاپشىلىعى ورىن الىپ وتىر. سوندىقتان كەشەندى جۇمىستى ودان ءارى جالعاستىرۋ كەرەك، وڭىرلەردە وتىن تاپشىلىعى مەن ىركىلىستەر بولماۋى ءتيىس»، - دەدى ءاليحان سمايىلوۆ.
ۇكىمەت باسشىسى مينيسترلىكتەرگە ءبىرقاتار تاپسىرما بەردى. تاپسىرما بويىنشا ەنەرگەتيكا مينيسترلىگى مەن سيفرلىق دامۋ مينيسترلىگى 15 قىركۇيەكتەن باستاپ جانارماي قۇيۋ ستانسيالارىندا جانار-جاعارماي بوساتۋدى ەسەپكە الۋدىڭ سيفرلىق جۇيەسىن ەنگىزۋى كەرەك.
اۋىل شارۋاشىلىعى مينيسترلىگى بيىلعى جىلدىڭ سوڭىنا دەيىن اۋىل شارۋاشىلىعى وندىرۋشىلەرى ءۇشىن جەڭىلدىكتى ديزەل وتىنىن ءبولۋ جۇيەسىن ەنگىزۋدى قامتاماسىز ەتۋى ءتيىس.
2023 جىلدان باستاپ ەنەرگەتيكا مينيسترلىگى مۇنايدى وڭدەۋدىڭ جاڭا جۇيەسىنە كوشۋدى ىسكە اسىرۋى كەرەك. بۇل جۇيە مۇناي ونىمدەرىن ساتۋ كەزىندە قاجەتسىز دەلدالداردىڭ قاتىسۋىنا جول بەرمەيدى.