ەلىمىزدە دومبىراشىلار وداعى قۇرىلدى
«دومبىراشىلار وداعى» رەسپۋبليكالىق قوعامدىق بىرلەستىگى بيىل 10 تامىز كۇنى قۇرىلعان. قوعامدىق بىرلەستىكتىڭ ماقساتى – ۇلتتىق ونەرىمىزدى كەڭىنەن دارىپتەپ، جاستاردىڭ ءداستۇرلى ونەرىمىزگە قىزىعۋشىلىعىن وياتىپ، ۇلتتىق قۇندىلىعىمىزدى دامىتۋ جولىندا ەڭبەك ەتۋ. جاس ونەرپازداردىڭ شىعارماشىلىعىنىڭ وركەندەۋىنە كومەك كورسەتۋ. ءتۇرلى بايقاۋلار، باعدارلامالار، كونسەرتتەر ۇيىمداستىرۋ، دەپ حابارلايدى Almaty-akshamy.kz
ءداستۇرلى ءانشى، قازاقستاننىڭ ەڭبەك سىڭىرگەن ءارتىسى، «قۇرمەت» وردەنىنىڭ يەگەرى رامازان ستامعازييەۆ مۇنداي وداقتى قۇرۋ جونىندەگى باستامالار بۇرىننان كوتەرىلىپ كەلگەنىن ايتتى.
«ۇلتتىق ونەرىمىزدىڭ قامىتىن كيىپ، سونىڭ كوكپارىندا جۇرگەن الدىڭعى جانە ورتاڭعى بۋىن ونەرپازداردىڭ قانشاما ايتاتىن، كورسەتەتىن دۇنيەسى حالىققا جەتپەي قالىپ جاتىر. بۇگىندە ەلىمىزدە دومبىراشىلار وداعى قۇرىلدى، ەندى بارلىق ونەر ادامدارى مۇشەلىككە وتسە، العا قويعان ۇلكەن شارۋالارىمىزدى جۇزەگە اسىرامىز. سونداي-اق انشىلەردىڭ شىعارماشىلىق كەشتەرى، عىلىمي ەڭبەكتەرى مەن جازبالارىن وسى وداق ارىلى جيناستىرىپ، وي ەلەگىنەن وتكىزىپ، ىسكە اسىرساق دەپ وتىرمىز. وسى اتقارىلعان شارۋالاردى Dombyra تەلەارناسى ارقىلى حالىققا جەتكىزسەك دەپ ماقسات تۇتىپ وتىرمىز»، - دەيدى ءانشى.
«دومبىراشىلار وداعى» رەسپۋبليكالىق قوعامدىق بىرلەستىگىنىڭ باسشىسى قانات ەرجىگىتوۆ ۇلتتىق ونەردى كەڭىنەن ناسيحاتتاۋ ءۇشىن Dombyra تەلەارناسىن «وتاۋ-تۆ» سپۋتنيكتىك جەلىسىنە قوسۋ قاجەتتىگىن ايتتى.
«ءداستۇرلى ونەردى تىڭداۋشى كورەرمەنىمىز اۋىلدا تۇرادى. ەلىمىزدە 5 مىڭ اۋىل بار، ولاردىڭ بارلىعى وسى سپۋتنيك جەلىسىنە قوسىلعان. ءقازىر رەسپۋبليكا دارەجەسىندەگى انشىلەردىڭ باسىن بىرىكتىرىپ وتىرمىز، ەندى مۇشەلەردىڭ اتىنان مەملەكەت باسشىسىنا حات جازساق، «وتاۋ-تۆ» سپۋتنيك جەلىسىنە قوسىلامىز دەگەن سەنىمدەمىز. العا قويعان باسقا دا جوسپارىمىز كوپ»، - دەدى قانات ەرجىگىتوۆ.
ءداستۇرلى ءانشى، ەڭبەك سىڭىرگەن قايراتكەر ساۋلە جانپەيىسوۆا دومبىراشىلار وداعى كۇيشىلەردىڭ عانا ەمەس، قولىنا دومبىرا ۇستاعان بارلىق ونەر ادامىنا ورتاق ەكەنىن ايتادى.
«ەلىمىزدە جازۋشىلار، سۋرەتشىلەر، جىرشىلار، كۇيشىلەر جانە تاعى باسقا ونەر ادامدارىنىڭ وداقتارى بار. جىل سايىن 1 شىلدە - دومبىرا كۇنى دەپ اتالىپ وتەدى. سول كەزدە دومبىرامەن ءان ايتىپ جۇرگەن انشىلەر شەت قالىپ، الدىعا كۇيشىلەر شىعاتىن. ءقازىر ول جاعداي رەتتەلدى، ول كەزدە ءبىز دە ونەر كورسەتەتىن بولدىق. بىزگە قاي سالادا بولماسىن بىرلىك كەرەك، ونسىز ەشتەڭەنى تىندىرا المايتىنىمىزعا كوزىمىز جەتتى. ورتاق ماسەلەلەردى بىرگە تالداپ، بىرگە شەشۋ ءۇشىن وداقتىڭ پايداسى زور»، - دەدى ساۋلە جانپەيىسوۆا.